كەشە جەمقورلىققا قارسى كۇرەس اگەنتتىگى مەن ەلوردالىق اكىمدىكتىڭ «استانا – ادالدىق الاڭى» اتتى بىرلەسكەن جوباسىن تالقىلاۋ ماقساتىندا قالا باسشىسى التاي كولگىنوۆ پەن اتالمىش اگەنتتىك توراعاسى اليك شپەكباەۆ بىرقاتار ۇيىم وكىلدەرىمەن كەزدەسۋ وتكىزدى.
جيىندا ءسوز العان ەلوردا اكىمى التاي كولگىنوۆ «استانا – ادالدىق الاڭى» اياسىندا اتقارىلىپ جاتقان جۇمىستاردىڭ ماڭىزىنا توقتالدى:
– بۇگىندە نۇر-سۇلتانداعى ەكى اۋداننىڭ, اتاپ ايتساق, ەسىل جانە سارىارقا اۋدانىنىڭ اكىمدىكتەرى open-office فورماتىندا جۇمىس ىستەيدى. ياعني اكىمدىككە تالاپ-تىلەگىن ارقالاپ كەلۋشى تۇرعىنداردى بيۋروكراتيا بۇرىنعىداي اياقتان شالمايدى, كەرىسىنشە ولاردىڭ مۇڭ-مۇقتاجىن بارىنشا تەز ارادا شەشىپ بەرۋگە تىرىسادى. وسىلايشا مەملەكەت باسشىسىنىڭ تاپسىرماسىمەن «قۇلاعى تۇرىك مەملەكەت» ءپرينتسيپىن تاجىريبەدە پايدالانىپ كەلەمىز, – دەدى شاھار باسشىسى.
بۇدان كەيىن التاي كولگىنوۆ جوعارىدا اتالعان جوبانىڭ تاعى ءبىر جەتىستىگى – iQala ورتالىعىن دا مىسالعا كەلتىردى. ونىڭ ايتۋىنشا, بۇدان ەرتەرەك ۋاقىتتارى ەلوردالىقتار جارىق, سۋ نەمەسە جىلۋعا قوسىلۋ ءۇشىن ءاربىر مونوپوليسكە بارىپ, ۋاقىتى مەن اقشاسىن شىعىندايتىن ەدى. ال قازىر بۇل شارۋانىڭ بارلىعىن iQala ورتالىعىندا نەمەسە سايتتا ءبىر عانا ءوتىنىش تاستاۋ ارقىلى بىتىرۋگە بولادى. بۇگىنگى تاڭدا ورتالىق 92 قىزمەت ءتۇرىن ۇسىنادى, ال قاراشا ايىنىڭ سوڭىنا دەيىن تاعى 47 قىزمەت قوسىلادى دەپ جوسپارلانۋدا.
قالالىق اكسەللەراتور جوباسىن دا ايتپاي كەتۋگە بولماس. ونىڭ اياسىندا شۇعىل مەرزىم ىشىندە قالا تىرشىلىگىندەگى تۇيتكىلدەر بويىنشا ارنايى جۇمىس توپتارى قۇرىلىپ, ماسەلەنى شەشۋ ءۇشىن شارالار اتقارىلادى. بۇگىندە ەلوردالىق اكسەللەراتور ءۇش باعىتتا جۇمىس ىستەۋدە. ونىڭ ءبىرىنشىسى — ەلەكتروندى پيك ماسەلەسى. جالپى مۇنى جەرگىلىكتى ءوزىن ءوزى باسقارۋ ينستيتۋتى دەسەك بولادى. جۇمىسباستى ادامدار ارتىق ۋاقىتتارىن شىعىنداماي, ەلەكتروندى قىزمەتتىڭ وسى ءتۇرىن پايدالانا الادى. سونداي-اق سانيتارلىق تازالاۋ جانە قوعامدىق كولىك تە اكسەللەراتور تاقىرىپتارىنىڭ ءبىرى بولىپ وتىر. ونىڭ قۇرامىنا كەز كەلگەن بەلسەندى تۇرعىن مۇشە بولا الاتىنىن اتاپ وتكىم كەلەدى, – دەدى اكىم ءوز سوزىندە.
قوعامنىڭ تسيفرلانۋى دا – حالىقتىڭ جايلى ءارى ىڭعايلى تۇرمىسى ءۇشىن وتە كەرەك. مىسالى, بۇرىنىراق ەلوردا ەمحانالارىندا جاندى كەزەك ەدى. وندايدا ىشىندەگى پىسىقاي بىرەۋلەرى ءبىرىنشى بولىپ كىرىپ كەتىپ, سوڭىنان كەزەكتە تۇرعان وزگەلەرى ءبىر-بىرىمەن ۇرسىسىپ, ىڭعايسىز جاعدايلار تۋاتىن. قازىر ەندى ەلەكتروندى كەزەك جۇيەسى ەنگىزىلگەننەن كەيىن وتكەن جولى №2 ەمحاناعا باس سۇقسام, ءبارى تاماشا. ەشقانداي ۋ-شۋسىز ادامدار ءوز تالوندارى بويىنشا كەزەك كۇتىپ وتىر.
ءوز كەزەگىندە جەمقورلىققا قارسى كۇرەس اگەنتتىگىنىڭ توراعاسى اليك شپەكباەۆ «ادالدىق الاڭى» جوباسىنىڭ ارقاسىندا ادالدىق دۇكەندەرىنىڭ اشىلۋى, ساتۋشىسىز كاسسالاردىڭ ورناتىلۋى ءتارىزدى يگى باستامالاردىڭ قوعام اراسىندا قولداۋ تاپقانىن جەتكىزدى.
جوبانىڭ جەمىستى ناتيجەلەرىنىڭ ءبىرى رەتىندە نۇر-سۇلتان قالاسى بيۋدجەتىنىڭ ينتەراكتيۆتى كارتاسىن دا ايتۋعا بولادى. بۇل جايلى «استانا – ادالدىق الاڭى» جوباسىنىڭ كۋراتورى, قالا اكىمىنىڭ ورىنباسارى باقتيار ماكەن:
– سايتتا قالا بيۋدجەتىنەن بارلىق مەملەكەتتىك قىزمەت سالاسىنا بولىنەتىن قارجىنىڭ پايدالانىلۋى اشىق كورسەتىلەدى. سەبەبى حالىقتى قاي سالاعا قانشا قاراجات ءبولىنىپ جانە ونىڭ قالايشا جۇمسالىپ جاتقانى قىزىقتىرادى. بارلىعى اشىق بولعاندا, تۇرعىنداردىڭ دا ارتىق سۇراعى بولمايدى. ازىرشە ءتۇسىپ جاتقان ساۋالداردىڭ كوبى قالاداعى بەتى اشىق كارىز قۇدىقتارى تۋرالى. قوعام بەلسەندىلەرىنىڭ بىرلەسىپ جۇمىس ىستەۋىنىڭ ارقاسىندا بۇل ماسەلە ءوز شەشىمىن تاپتى, – دەپ ءتۇسىندىردى.
سونداي-اق اكىم ورىنباسارى جوبا اياسىندا ەلوردا مەكتەپتەرىندەگى اكىمشىلىك ورىنداردىڭ وڭتايلاندىرىلعانىن ايتتى.
«قازىر قالاداعى 85 ءبىلىم ورداسىنىڭ 67-دە اكىمشىلىك ورنى وڭتايلاندى. مەكتەپ ديرەكتورىنىڭ بولمەسى ءبىرىنشى قاباتقا كوشىرىلدى. ءبىر جاعىنان, بۇل اتا-انالارعا دا ىڭعايلى بولدى. ال بوساعان كابينەت وقۋشىلارعا قوسىمشا ساباق وتكىزۋگە بەرىلدى. ەندى قالعان 18 مەكتەپ تە ءدال وسىلاي وڭتايلانادى» دەدى ول.
سونداي-اق جيىندا ءبىلىم بەرۋ, ەكولوگيا جانە ت.ب. سالالارداعى جاڭا جوبالاردى ىسكە اسىرۋ جونىندە قوعامدىق ۇيىمداردىڭ وكىلدەرى ءسوز سويلەدى.
