قار تازالاۋ قارقىن الدى

دەمالىستا ءبىر كۇن, ءبىر ءتۇن جاۋعان قار ەلوردانى دەمدە اق كورپەگە ورادى. قازىر قالانى قاردان تازارتۋ, كوكتايعاقتىڭ الدىن الۋ ءۇشىن قۇم-تۇز قوسپاسىن سەبۋ جۇمىستارى قارقىن الدى. كوممۋنالدىق قىزمەت ءۇش اۋىسىمدى رەجيمگە كوشىپ, تاۋلىك بويى جۇمىس ىستەۋدە. كەشە شاھاردى سانيتارلىق تازالاۋعا 1061 ارنايى تەحنيكا جۇمىلدىرىلىپ, 1606 جۇمىسكەر تارتىلدى.ال تۇنگى مەزگىلدە 867 تەحنيكا مەن 254 جول جۇمىسشى قار كۇرەۋمەن اينالىستى. سوڭعى تاۋلىكتە عانا قالا سىرتىنا 15470 تەكشە مەتر قار شىعارىلدى. ال جالپى قار تۇسكەلى 128606 تەكشە مەتر جينالىپ, تىسقا تاسىلعان.
قالا تۇرعىندارى الەۋمەتتىك جەلىدە اۋلا قارىن تازارتۋ ماسەلەسىن ءبىراز تالقىعا سالدى. ونىڭ ءبىرى – بۇل جۇمىس اكىمدىكتىڭ شارۋاسى دەسە, ەندى ءبىرى – ول پاتەر يەلەر كووپەراتيۆىنە تيەسىلى دەگەن پىكىر ايتادى.
وسى رەتتە ەسىلدىڭ سول جاعالاۋىنداعى كوپپاتەرلى تۇرعىن ۇيلەردىڭ بىرىندەگى پيك توراعاسى «جۇرتشىلىق پيك-ءتىڭ جۇمىسىنان حابارى بولماي, سىنعا الىپ جاتادى. شىن مانىندە, اۋلادا تۇرعان ۇيدەن بەس مەتر قا­شىقتىققا دەيىنگى ارالىقتاعى قاردى تازالاۋ – ءبىزدىڭ موينىمىزدا. اۋلاداعى دۇكەن يەلەرى دە ءوز اۋماعىنان بەس مەترگە دەيىن تازالاۋى مىندەتتى. ال ارى قاراي قالالىق كوممۋنالدىق قىزمەتتىڭ جۇمىسى. بۇل نۇر-سۇلتان قالاسىنىڭ اۋماعىن اباتتاندىرۋ قاعيدالارىنىڭ ءبىرىنشى تاراۋىندا كورسەتىلگەن» دەيدى.
قالاي دەگەنمەن, كوشەنى قاردان تازالاۋ قارقىن الىپ, جۇمىس ءۇش اۋىسىممەن جۇرگىزىلۋدە.