ادىلبەك نيازىمبەتوۆ, بوكسشى, لوندون وليمپياداسىنىڭ كۇمىس جۇلدەگەرى: شارشى الاڭعا وزىمە سەنىپ شىعامىن
–لوندون وليمپياداسىنىڭ كۇمىس جۇلدەگەرى اتانعاندا قانداي سەزىمدە بولدىڭىز؟
ەرنۇر بيمۋرزين, قالا تۇرعىنى
– ءدال سول ساتتە كوڭىلىم كونشىمەگەنى راس. ەگەر مەن 16:15 ەسەبىمەن ۇتىلعان بولسام, وندا جەڭىلگەنىمدى مويىندار ەدىم. قىرسىق قىلعانداي ەسەپتىڭ تەڭ تۇسكەندىگىنە كۇيىندىم. تەڭ ءتۇسىپ تۇرىپ جەڭىمپاز اتانباۋ قيىن ەكەن. ودان كەيىن ءوز-وزىمە كەلە الماي ءبىراز ءجۇردىم. الداعى ۋاقىتتا جىبەرگەن قاتەلىكتەرىمدى قايتالاماۋعا تىرىسامىن. قازىر تەك شۇكىرشىلىك ەتەمىن. كەيىن اعايىن-تۋىستارىم, دوستارىم, جانكۇيەرلەرىم كوڭىل-كۇيىمدى كوتەرىپ, قولداۋ ءبىلدىردى. ءالى-اق جەڭىسكە جەتەتىنىمە سەندىردى. كۇمىس تە جۇلدە ەكەندىگىنە, مىقتىلاردىڭ سايىسىنان وزىق شىققانىما شۇكىرشىلىك ەتەمىز. لوندون وليمپياداسىنان العان اسەرىم ماڭگى ەسىمدە قالادى.
–جارىستان كەيىن قىزدار تاراپىنان مازالاۋشىلار كوپ پە؟ وندايدا نە دەپ جاۋاپ بەرەسىز؟
اينۇر سالاماتوۆا, ەۇۋ ستۋدەنتى
–جالعىز قىزدار عانا ەمەس, جانكۇيەرلەرىم, ەل اعالارى حابارلاسىپ, قۇتتىقتادى. كوبىسى اق تىلەكتەرىن جاۋدىرىپ جاتادى. وندايدا مەن دە ءوز تاراپىمنان العىسىمدى بىلدىرەمىن. كوشەدە دە تانىپ سۋرەتكە تۇسۋگە شاقىرادى. وندايعا ەش قارسىلىعىم جوق. مۇنىڭ ءوزى مەن ءۇشىن زور قۋانىش. مەنى قولداعاندارى ءۇشىن بارلىعىنا العىسىمدى ايتامىن.
–ادەمى بوكستاسىپ, قارسىلاس سوققىسىنان جالتارا بىلەتىن ەرەكشەلىكتى بايقايمىز. دەگەنمەن, كەيدە رينگتە سىرت كوزگە سەنىمسىزدەۋ جۇرگەندەي كورىنىپ قالاسىڭ. مۇنىڭ سەبەبى نە؟
نۇرمان ساتەنبەكوۆ, سپورت شەبەرى
– رينگكە شىققانىمدا وزىمە ءجۇز پايىز سەنىمدى بولامىن. سىرت كوزگە سەنىمسىزدەۋ كورىنىپ جاتسام, ول – مەنىڭ رينگتە ۇستانعان تاكتيكامنىڭ ءبىرى. ۇزدىكسىز شابۋىلداعان قارسىلاسىمدى كۇتىپ الامىن دا, قارىمتا سوققى جاسايمىن. كەيدە كۇتىپ جۇرەمىن دەپ كوپ ۋاقىت وتكىزىپ الىپ, قاتەلىككە بوي الدىرىپ جاتاتىنىم راس.
–الەۋمەتتىك جەلىلەردى قانشالىقتى ءجيى پايدالاناسىز؟ سول كەزدە ءسىزدىڭ ۇلتىڭىزعا قاتىستى بىرقاتار تالاستار بولىپ جاتتى…
گۇلسارا مانات, مەدبيكە
–سولاي ما؟ وندايدى ەستىمەپپىن. ۇلتىم – قازاق. وزبەكستاننىڭ نوكىس قالاسىندا تۇرعانىمىز راس. 2002 جىلى ءوز ەلىمىزگە كوشىپ كەلدىك. قازىر وتباسىممەن اقتاۋ قالاسىندا تۇرىپ جاتىرمىن. ءوزىم الەۋمەتتىك جەلىلەردى كوپ پايدالانبايمىن.
–بوس ۋاقىتىڭىزدى قالاي وتكىزەسىز؟
نۇرجان كەلىسوۆ, قالا تۇرعىنى
–بوس ۋاقىتىم كوپ بولا بەرمەيدى. قازىر جاتتىعۋ جۇمىستارى باستالىپ كەتتى. ەگەر بوس ۋاقىتىم بولىپ جاتسا, ۇيىقتاعاندى, فۋتبول ويناعاندى جاقسى كورەمىن. اراسىندا دوستارىممەن كەزدەسىپ تۇرامىن.
–وليمپيادادان العان اقشاڭىزدى قايدا جۇمسادىڭىز؟
مايرا شاراپات, ستۋدەنت
–اتا-اناما بەردىم.
–ادىلبەك بالام, وليمپياداداعى ءاربىر جەكپە-جەگىڭدى ءجىتى باقىلاپ وتىردىم. جەڭىسىڭمەن قۇتتىقتايمىن! قاي جەكپە-جەگىڭ ءوز كوڭىلىڭنەن شىقتى؟
ەرنار جۇماشكە, زەينەتكەر
–ۇلكەن راحمەت! وليمپيادا ويىندارىنىڭ ءجونى ارقاشان دا بولەك بولاتىنى بەلگىلى. شارشى الاڭداعى بارلىق ايقاسىم مەن ءۇشىن وتە قيىن بولدى. ءار كەزەڭنەن اسقان سايىن قارسىلاستارىم دا شيرىعا ءتۇستى. ولاردىڭ ەشقايسىسىن «اناۋ مىقتى, مىناۋ ءالسىز» دەپ ايتا المايمىن. ەشقايسىسى وسال ەمەس. تەك تاكتيكالىق تۇرعىدان ءادىس قولدانىپ, رينگتە شەبەرلىكپەن جۇمىس ىستەي الساڭ, كەز كەلگەنىن ۇتۋعا بولادى.
–لوندون وليمپياداسىندا تورەشىلەردىڭ باعالاۋىنا كوڭىلىڭىز تولدى ما؟
تەمىرلان اسپانبەكوۆ, سپورت جانكۇيەرى
–قارسىلاسىڭدى ايقىن باسىمدىقپەن ۇتپاساڭ, تاعدىرىڭدى تورەشىلەر شەشەدى دەگەن ءسوز بار عوي. ءارى سپورتشىلاردىڭ بارلىعى دا جاقسى دايىندالعاندىقتان, ءار جەكپە-جەك جوعارى دەڭگەيدە ءوتتى. ەشقايسىسى وڭايلىقپەن ەسە جىبەرگەن جوق.
–وليمپيادادان العان مەدالىڭىزدى قايدا ساقتايسىز؟
ەراسىل قاجىحانوۆ, وقۋشى
–ۇيىمدە تۇر.
–قاشان ۇيلەنەسىز؟ ءسىزدىڭ قيالىڭىزداعى ارۋ قانداي؟
دينارا سادىق, ستۋدەنت
–شاڭىراق كوتەرۋ ازىرگە ويىمدا جوق. مەنىڭ قيالىمداعى ارۋ «اقىلىنا كوركى ساي» قازاقتىڭ قاراپايىم قىزى بولۋى كەرەك.
ەركەجان ساتىمبەك