اكتسيا اياسىندا – تەگىن زاڭ كومەگى
استانادا قازاقستان رەسپۋبليكاسى كونستيتۋتسياسىنىڭ 20 جىلدىعىنا وراي «ادىلەت كەڭەس بەرەدى» ءۇش كۇندىك اكتسياسى ءوتتى.
ءىس-شارا اياسىندا قالالىق ادىلەت دەپارتامەنتىندە قۇرامىنا بىلىكتى زاڭگەرلەر مەن ادۆوكاتتار, نوتاريۋستار, سوت ورىنداۋشىلارى مەن باسقا دا جاۋاپتى قىزمەتكەرلەر ەنگەن اقپاراتتىق-ناسيحاتتىق توپ جۇمىس ىستەپ, زاڭگەرلىك كەڭەستەر بەردى, قاجەتتى قۇجاتتاردى تولتىرۋعا كومەكتەر تەگىن بەرىلەدى.
بۇل اكتسيا ەكىنشى رەت «پريگورودنىي» الابىنىڭ تۇرعىندارىنا, استانا قالاسىنىڭ مەديتسينالىق-الەۋمەتتىك مەكەمەسىندەگى قارتتار مەن مۇمكىندىگى شەكتەۋلى جاندارعا, سونىمەن قاتار ەتس-166/1 جانە ەتس-166/10 مەكەمەلەرىندەگى سوتتالعاندارعا, سارىارقا اۋدانىنىڭ ارداگەرلەرىنە جانە ەسىل اۋدانىنىڭ حالىققا قىزمەت كورسەتۋ ورتالىعىنا جينالعان ازاماتتارعا ارنالىپ وتكىزىلدى.
«ادىلەت كەڭەس بەرەدى» اكتسياسى اياسىندا قويىلعان سۇراقتار دا ءارتۇرلى بولدى. بىرنەشە ادام جۇمىسقا ورنالاستىرۋ جونىندە ءوتىنىش جازىپ, ولارعا بوس ورىندار ۇسىنىلدى. دەگەنمەن, ەلوردالىق جۇمىسپەن قامتۋ ورتالىعى ديرەكتورىنىڭ ورىنباسارى ا.بايمولدين جۇمىسقا ورنالاسۋدى قالايتىندارعا الدىمەن بەيبىتشىلىك كوشەسى 25-ۇيدە ورنالاسقان جۇمىسپەن قامتۋ ورتالىعىنا بارۋعا كەڭەس بەردى. وندا كەلىپ, تىركەلگەندەرگە ماماندىعىنا سايكەس جۇمىس ۇسىنىلادى, كەيدە وڭتايلى كاسىپ تابىلىپ تا جاتادى.
سونداي-اق, مۇلىكتى زاڭداستىرۋ, جىلجىمايتىن مۇلىككە قۇجات دايارلاۋ, بالا اسىراپ الۋ, تىركەۋ ىسىندە انىقتاما بەرۋ, قازاقستاندىق ازاماتتىقتى الۋ, ازاماتتىق اكتىلەردى تىركەۋ سەكىلدى ساۋالدارعا دا تولىققاندى جاۋاپ بەرىلدى.
كەزدەسۋ بارىسىندا ازاماتتاردىڭ مەملەكەتتىك تۇرعىن ءۇي قورىنان ءۇي الۋ, جەكە قۇرىلىستاردى بۇزۋ جانە ولارعا بەرىلەتىن قارجى, جەكە مۇلىكتى زاڭداستىرۋ ءتارتىبى, سونىمەن قاتار جوعالعان قۇجاتتاردى قايتا قالپىنا كەلتىرۋ, جىلجىمايتىن مۇلىككە قايتا قۇقىق يەلەنۋ ءتارتىبى, باسپانا الۋ جانە كوممۋنالدىق قىزمەت كورسەتۋ كەزىندە بەرىلەتىن جاردەماقىلار سەكىلدى ساۋالدار كوبىرەك قىزىقتىراتىنى بايقالدى.
اكتسيا كەزىندە قويىلعان ساۋالداردىڭ بارلىعىنا اقپاراتتىق-ناسيحات توبىنىڭ وكىلدەرى تاراپىنان تولىققاندى جاۋاپتار بەرىلىپ, قاجەتتى قۇجاتتاردى دايارلاۋعا جانە سوتقا ارىز بەرۋدە كومەك كورسەتىلدى.