كەشە اقوردادا پرەزيدەنت اكىمشىلىگىنىڭ باسشىسى اسەت يسەكەشەۆتىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسى ءوتتى. كەڭەستە ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋدىڭ ناتيجەلەرى تالقىلاندى.
ۇلتتىق كوميسسيانىڭ توراعاسى وتىرىستى اشا وتىرىپ, «رۋحاني جاڭعىرۋ» باعدارلاماسى پرەزيدەنتتىڭ بيىلعى جولداۋىندا ايتىلعان نەگىزگى باعىتتاردى ىسكە اسىرۋ اياسىندا ەرەكشە ماڭىزعا يە ەكەندىگىن اتاپ ءوتتى. سونداي-اق, ول اتالمىش باعدارلامانىڭ ورىندالۋىن جاڭا مازمۇنمەن جانە باعىتتارمەن تولتىرۋدىڭ قاجەتتىگىنە توقتالدى.
– مەملەكەت باسشىسىنىڭ تاپسىرماسىنا سايكەس تاياۋ ۋاقىتتا جاڭادان «اۋىل – ەل بەسىگى» جانە «ءوز جەرىڭدى تانىپ ءبىل» جوبالارى ىسكە قوسىلادى, ولار اۋىلدىق جەرلەردىڭ دامۋىنا قوسىمشا سەرپىن بەرمەك, – دەدى ءا.يسەكەشەۆ.
كوميسسيا وتىرىسىندا پرەزيدەنت اكىمشىلىگىنىڭ وكىلدەرى, بىرقاتار مينيسترلەر مەن اكىمدەر ءسوز سويلەدى. تالقىلاۋلار قورىتىندىسى بويىنشا ۇلتتىق كوميسسيانىڭ توراعاسى ۇكىمەتكە 2018-2019 جىلدارعا ارنالعان «رۋحاني جاڭعىرۋ» باعدارلاماسىن ىسكە اسىرۋ جونىندەگى بىرىڭعاي جوسپار ازىرلەۋدى, اۋىل شارۋاشىلىعى مينيسترلىگىنە «اۋىل – ەل بەسىگى» الەۋمەتتىك جوباسىن ىسكە قوسۋدى تاپسىردى.
