كەشە استانا قالاسى اكىمدىگىندە پرەمەر-ءمينيستردىڭ ورىنباسارى بەردىبەك ساپارباەۆتىڭ توراعالىعىمەن «تۇرعىنداردىڭ الەۋمەتتىك الەۋەتى – استانا برەندى» تاقىرىبىندا كەڭەس ءوتتى. جيىنعا ەلوردا اكىمى ادىلبەك جاقسىبەكوۆ, دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا, ءبىلىم جانە عىلىم ءمينيسترى اسلان ءسارىنجىپوۆ, مادەنيەت جانە سپورت ءمينيسترى ارىستانبەك مۇحامەديۇلى جانە رەسپۋبليكالىق ۇيىمداردىڭ, قالالىق باسقارمالاردىڭ, جوعارى وقۋ ورىندارىنىڭ, مەديتسينالىق مەكەمەلەردىڭ باسشىلارى قاتىستى.
جۇمىسسىزدىققا جول بەرىلمەيدى
جيىندى اشقان استانا قالاسىنىڭ اكىمى ادىلبەك جاقسىبەكوۆ كەڭەستىڭ جۇمىسى بارىسىندا ەلوردا اكىمدىگى مەن سالالىق مينيسترلىكتەر اراسىندا دەنساۋلىق ساقتاۋ, الەۋمەتتىك قورعاۋ, ءبىلىم سالاسى مەن مادەنيەت پەن سپورتتى دامىتۋ بويىنشا 2015-2017 جىلدارعا ارنالعان مەموراندۋمدارعا قول قويىلاتىنىن ايتا كەلە, بۇل ماڭىزدى قۇجاتتار ەلوردالىق تۇرعىنداردىڭ ءال-اۋقاتىن جاقسارتۋعا ىقپال ەتەتىنىنە سەنىم ءبىلدىردى.
كەڭەستە ءسوز سويلەگەن قر پرەمەر-ءمينيسترىنىڭ ورىنباسارى بەردىبەك ساپارباەۆ مەملەكەت باسشىسىنىڭ تاپسىرماسىمەن ۇكىمەت اكىمدىكتەر مەن ءىرى كاسىپورىنداردىڭ, ورتالىق مەملەكەتتىك ورگانداردىڭ اراسىندا وندىرىستىك ۇردىستەردى تۇراقتاندىرىپ, جۇمىس ورنىن ساقتاۋ, ەڭبەككەرلەردىڭ قۇقىلارى مەن مۇددەسىن قورعاپ, ەڭبەك زاڭدارىن ساقتاۋدى قامتاماسىز ەتۋ جونىندەگى ىنتىماقتاستىق مەموراندۋمدارىن بەكىتۋگە قاتىستى كەشەندى شارالار جۇرگىزىپ جاتقانىنا توقتالىپ, ەلوردا اكىمدىگىندە ءوتىپ جاتقان جيىن دا وسى ماقساتتى كوزدەپ وتىرعانىن جەتكىزدى. «جاھاندىق داعدارىسقا قاراماستان ءبىزدىڭ ەلىمىزدە الەۋمەتتىك سالاعا بولىنگەن شىعىندار ەشبىر قىسقارتۋعا ۇشىراعان جوق جانە بيىل ونىڭ كولەمى 4 تريلليون تەڭگەنى قۇراپ وتىر. ەكونوميكالىق داعدارىس جاعدايىندا ۇكىمەتتىڭ باستى مىندەتى – تۇرعىنداردى ەڭبەكپەن قامتۋ جانە جۇمىسسىزدىقتى بولدىرماۋ. بۇگىندە ءبىز وسى ماڭىزدى مىندەتتەردى ىسكە اسىرۋ جولىندا جۇيەلى جۇمىستاردى جۇزەگە اسىرىپ كەلەمىز» دەدى پرەمەر-ءمينيستردىڭ ورىنباسارى.
بەردىبەك ساپارباەۆتىڭ ايتۋىنشا, «نۇرلى جول» باعدارلاماسى بويىنشا مەملەكەت حالىق الدىنداعى الەۋمەتتىك مىندەتتەمەلەرىن جۇزەگە اسىرۋ جولىندا ايتارلىقتاي جۇمىستاردى قولعا العان. اتاپ ايتقاندا, بۇگىندە استانا قالاسىندا رەسپۋبليكالىق بيۋدجەت ەسەبىنەن الەۋمەتتىك ماڭىزى بار 17 نىسان سالىنىپ جاتىر. قازىرگى كۇنى 3-6 جاس ارالىعىنداعى بۇلدىرشىندەردى بالاباقشامەن قامتۋ جاعدايى رەسپۋبليكا بويىنشا 79 پايىز بولسا, استانادا بۇل كورسەتكىش – 58 پايىز دەڭگەيىندە. بالاباقشا كەزەگىن ازايتۋ ءۇشىن ەلوردادا ءۇش بالاباقشانىڭ قۇرىلىسىن باستاپ, ون ءبىر مەكتەپكە دەيىنگى مەكەمە قۇرىلىسىن اياقتاۋ كوزدەلگەن. وسىلايشا, ەلباسىنىڭ تاپسىرماسى بويىنشا 2020 جىلعا قاراي بالدىرعانداردى 100 پايىز بالاباقشامەن قامتاماسىز ەتۋ مىندەتى تۇر.
ەلىمىزدەگى جالپى ورتا ءبىلىم بەرەتىن ۇيىمداردىڭ جاعدايىنا توقتالعان ۇكىمەت باسشىسىنىڭ ورىنباسارى رەسپۋبليكا بويىنشا اپاتتى جاعدايداعى– 99, ءۇش اۋىسىممەن وقيتىن 136 مەكتەپ بار ەكەندىگىن, ولارداعى ورىن تاپشىلىعى 15 مىڭنان اساتىنىن ايتتى. ال, استانا مەكتەپتەرىنىڭ ىشىندە بىرەۋى – اپاتتى جاعدايدا بولسا, ەكەۋى ءۇش اۋىسىممەن وقيدى. كەلەسى جىلى ەلوردادا ۇلتتىق قور ەسەبىنەن ارقايسىسى 1150 ورىندىق ەكى مەكتەپتىڭ قۇرىلىسى باستالماق. ءسويتىپ, 2017 جىلعا قاراي بۇل ماسەلە تولىعىمەن شەشىمىن تاپپاق.
قر پرەمەر-ءمينيستردىڭ ورىنباسارى ءوز سوزىندە استاناعا ەلباسى ەرەكشە كوڭىل اۋدارىپ وتىرعانىن, اسىرەسە, تۇرعىنداردىڭ جايلى ءومىر سۇرۋىنە تىكەلەي قاتىستى الەۋمەتتىك سالالار نازاردان تىس قالمايتىنىن اتاپ ءوتتى.
– استانا – بيزنەستى دامىتۋدىڭ لوكوموتيۆى. مۇندا جوعارى تەحنولوگيالىق وندىرىستەر ورنالاسقان. سوڭعى جىلدارى پرەزيدەنتتىڭ تاپسىرماسىمەن اشىلعان مادەني-سپورت نىسانداردىڭ ءوزى ءبىر توبە. وسى عيماراتتار قالا تۇرعىنداردىنىڭ يگىلىگىنە قىزمەت ەتۋى ءتيىس. سوندىقتان, مينيسترلىكتەرمەن بىرلەسە وتىرىپ, سپورتتىق جانە مادەني نىسانداردىڭ قىزمەتىمەن بارشا حالىقتى كەڭىنەن قامتۋعا ءتيىسپىز. اسىرەسە, بۇل نىساندار بالالار مەن جاستارعا قولجەتىمدى بولۋى ءتيىس. جالپى, ەلوردالىقتار ءۇشىن الەۋمەتتىك سالادا قولايلى جاعدايلار قالىپتاستىرۋعا ءتيىسپىز. استانالىقتار ءۇشىن «الەۋمەتتىك الەۋەت – استانا ايبارى» دەگەن ۇران باستى ورىنعا شىعۋى ءتيىس» دەدى ۆيتسە-پرەمەر.
ەلوردا ەمى ەلەكتروندىق جۇيەگە كوشەدى
جيىندا ءسوز سويلەگەن دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا باس شاھاردىڭ دەنساۋلىق ساقتاۋ سالاسىن دامىتۋعا قاتىستى جاقسى جاڭالىقتاردى جاريا ەتتى. ءسوزىن العاشقى مەديتسينالىق-سانيتارلىق كومەك كورسەتۋ ۇيىمدارىنىڭ جاعدايىنان باستاعان مينيستر ەمحانالارداعى كەزەكتىڭ كوپتىگى, دارىگەرلەردىڭ قابىلداۋىنا جازىلۋدىڭ قيىندىعى كوپتەگەن ارىز-شاعىمعا ارقاۋ بولىپ وتىرعانىن ايتا كەلە, تۇيتكىلدى شەشۋدىڭ جولدارىن جىكتەپ كورسەتتى. مينيسترلىك مەملەكەتتىك دەنساۋلىق ساقتاۋ ۇيىمدارىنداعى دارىگەرلەرگە جازىلۋدى ەلەكتروندىق جۇيەگە كوشىرۋدى ۇسىنادى. ياعني, كەلەشەكتە ناۋقاستار دارىگەرگە ەلەكتروندىق كەزەك ارقىلى كىرەتىن بولادى. ال ەمحانا نەمەسە اۋرۋحانا ءتيىستى اقپاراتتى ناۋقاسقا تەلەفون نەمەسە ەلەكتروندى پوشتا ارقىلى بەرەدى. «بۇل سىرقات جانداردىڭ ساعاتتاپ كەزەككە تۇرماۋى ءۇشىن جاسالىپ وتىرعان قادام» دەيدى مينيستر.
بۇعان قوسا, دارىگەردىڭ ديسپانسەرلىك ەسەبىندە تۇرعان ناۋقاستارعا دا قولايلى جاعداي قاراستىرىلماق. ولار بۇگىنگە دەيىن بارلىعىنا ورتاق تىزىممەن دارىگەرگە جازىلىپ كەلسە, ەندى ولار ءۇشىن بولەك قابىلداۋ كەستەسى جاسالماق. «سوزىلمالى سىرقاتى بويىنشا باقىلاۋدا تۇرعاندار ۋاقتىلى دارىگەرگە قارالىپ, ءتيىستى ءدارىسىن دەر كەزىندە الۋى كەرەك. سوندىقتان, ديسپانسەرلىك ەسەپتە تۇرعان ناۋقاستاردىڭ كەلىپ قارالۋ كەستەسىن ءار ەمحانا بولەك قاراستىرىپ, رەتتەگەنى ءجون» دەدى ت.دۇيسەنوۆا.
«جەدەل مەديتسينالىق جاردەم» قىزمەتىنىڭ جۇمىسىنا دا توقتالعان مينيستر بىلتىر استانانىڭ جەدەل جاردەم بريگاداسى 500 مىڭنان استام شاقىرتۋعا قىزمەت كورسەتكەنىن, بىراق 43 مىڭىنا كەشىگىپ جەتكەنىن ايتتى. جەدەل جاردەمنىڭ ناۋقاستارعا دەر كەزىندە جەتە الماۋىنىڭ ءبىر سەبەبى ءتيىستى مەديتسينالىق كولىكتەردىڭ تاپشىلىعىندا جاتىر. بۇل ماسەلەنى شەشۋ ءۇشىن قالالىق جەدەل مەديتسينالىق كومەك كورسەتۋ ستانساسىنا بيىل جەرگىلىكتى بيۋدجەت ەسەبىنەن 22, كەلەسى 2016 جىلى رەسپۋبليكالىق بيۋدجەت قاراجاتىنان 33 سانيتارلىق اۆتوكولىك ساتىپ الىنباقشى. ال 2017 جىلدىڭ 1 قاڭتارىنا دەيىن استانادا تاعى ءبىر جەدەل جاردەم ستانساسىنىڭ قۇرىلىسى اياقتالادى. بۇل ەلوردالىق تۇرعىندارعا كورسەتىلەتىن جەدەل مەديتسينالىق كومەكتىڭ اۋقىمىن كەڭەيتىپ, شاقىرتۋلارعا نەعۇرلىم جىلدام جەتۋگە مۇمكىندىك بەرمەك.
ىنتىماقتاستىق پەن ىقپالداستىق
كەڭەس قورىتىندىسىندا استانا قالاسى اكىمىنىڭ ورىنباسارى ەرمەك امانشاەۆ مينيسترلىكتەر مەن استانا اكىمدىگى اراسىندا قول قويىلعان مەموراندۋمداردىڭ ماقسات-مۇددەسىمەن تانىستىردى. اكىم ورىنباسارىنىڭ ايتۋىنشا, مينيسترلىكتەر مەن اكىمدىكتىڭ ارىپتەستىك قارىم-قاتىناسىن نىعايتا تۇسەتىن بۇل شارا ەلوردا تاريحىندا تۇڭعىش رەت جۇزەگە اسىرىلىپ وتىر. ماقساتى – ۇزاق جىلدار بويى قوردالانىپ قالعان وزەكتى ماسەلەلەردى مينيسترلىكتەرمەن بىرلەسە شەشۋ.
سونىمەن, دەنساۋلىق ساقتاۋ, مادەنيەت, سپورت, الەۋمەتتىك قورعاۋ, جۇمىسپەن قامتۋ جانە ءبىلىم بەرۋ سالالارىنداعى تىعىز قارىم-قاتىناستى قامتاماسىز ەتەتىن 2015-2017 جىلدارعا ارنالعان مەموراندۋمداردىڭ العاشقىسىنا استانا اكىمدىگى مەن دەنساۋلىق ساقتاۋ جانە الەۋمەتتىك قورعاۋ مينيسترلىگى قول قويدى.
ءبىرىنشى قۇجات جۇمىسپەن قامتۋدى, اتاۋلى الەۋمەتتىك كومەك پەن ەلوردا تۇرعىندارىن قولداۋدى قامتاماسىز ەتەدى. كەلىسىمشارتقا ساي تاراپتار جۇمىسسىز جانە تۇرمىسى تومەن تۇرعىنداردى قولداپ, قارجىلاي كومەك كورسەتۋگە, ەستۋ قابىلەتتەرى ناشار مۇگەدەك بالالاردى ەستىپ-سويلەۋگە بەيىمدەۋگە ارنالعان بىرقاتار جوبالاردى جۇزەگە اسىرۋعا ءتيىس.
ەكىنشى مەموراندۋم ەلوردا تۇرعىندارىنىڭ دەنساۋلىعىن جاقسارتۋعا باعىتتالعان. تاراپتار مەديتسينالىق مەكەمەلەردەگى كەزەكتى ازايتىپ, تۇرعىنداردى اۋرۋحاناعا جاتقىزۋدى, امبۋلاتوريالىق دەڭگەيدە ۋاقىتىلى ءدارى-دارمەكتەرمەن قامتۋدى كوزدەيدى. بۇل قادامداردىڭ بارلىعى حالىققا كورسەتىلەتىن مەديتسينالىق قىزمەتتىڭ ساپاسى مەن قولجەتىمدىلىگىن ارتتىرۋعا ىقپال ەتپەك.
سونداي-اق, اكىمدىك مادەنيەت جانە سپورت مينيسترلىگىمەن دە سەرىكتەستىك مەموراندۋمىن بەكىتتى. ونىڭ ماقساتى – تاريحي-مادەني مۇرانى, ۇلتارالىق ىنتىماقتاستىقتى ساقتاپ, قورعاۋ, مادەنيەت پەن مەملەكەتتىك ءتىلدى دامىتۋ, ۇلىستاردىڭ تەڭدىگىن قامتاماسىز ەتۋ. وتكىزىلەتىن شارالار مادەني مەكەمەلەرگە حالىقتىڭ ءجيى بارۋىن, سپورتپەن شۇعىلداناتىن تۇرعىندار سانىن ارتتىرۋدى كوزدەيدى.
ءبىلىم بەرۋ جۇيەسىن دامىتۋعا ارنالعان مەموراندۋم بارلىق دەڭگەيدەگى وقىتۋ ساپاسىن جانە ونىڭ ەلوردا تۇرعىندارى ءۇشىن قولجەتىمدىلىگىن ارتتىرۋعا نەگىزدەلگەن. وسى مەموراندۋم بويىنشا, استانادا «بيوتەحنولوگيا ۇلتتىق ورتالىعى» عىلىمي-يننوۆاتسيالىق كەشەنى, «AstanaBusinessCampus» عىلىمي ساياباعى, قۇرىلىس جانە تۇرعىن ءۇي شارۋاشىلىعى, ەنەرگەتيكا, تۋريزم, مەيمانحانا بيزنەسى, اقپاراتتىق-كوممۋنيكاتسيالىق تەحنولوگيا سالالارى بويىنشا ماماندار دايارلايتىن «AstanaPolytechnic» جوعارى تەحنيكالىق مەكتەبى اشىلادى.
جيىندى قورىتىندىلاعان استانا قالاسىنىڭ اكىمى ادىلبەك جاقسىبەكوۆ بارلىق تاراپتار مەموراندۋمدار تالابىن ورىنداپ, وزدەرىنە جۇكتەلگەن مىندەتتەردى جاۋاپكەرشىلىكپەن اتقاراتىنىنا سەنىم ءبىلدىردى.
قىمبات توقتامۇرات
