كەشە استانا قالاسى اكىمدىگىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسياسىنىڭ مۇشەلەرى «زورلىق-زومبىلىقسىز 16 كۇن» ناۋقانى اياسىندا «انا ءۇيى» قوعامدىق قورى ورتالىعىنا بارىپ, مەيىرىمدىلىك شاراسىن وتكىزدى.
ءىس-شارانى ۇيىمداستىرۋشىلاردىڭ ايتۋىنشا, بۇل ءۇي بەكەردەن-بەكەر تاڭدالعان جوق. مۇندا كىشكەنتاي بالالارى بار 7 جاس انا تۇرادى. كوميسسيا مۇشەلەرى ولاردىڭ جاعدايىن سۇراپ, اقىل-كەڭەس بەرىپ, سىيلىق ۇسىندى. سونىمەن قاتار جاس انالارمەن تۇرمىستىق زورلىق-زومبىلىقپەن كۇرەسۋ شارالارى مەن شارتتارى, سونداي-اق انا بولۋ باقىتى تۋرالى اڭگىمەلەستى.
– سىزدەر اناسىزدار, قۇشاعىڭىزداعى بالالار – سىزگە امانات. ول – ءسىزدىڭ قۇشاعىڭىزداعى باقىت. ورتالىقتان شىققاننان كەيىن قانداي قيىندىق كورسەڭىزدەر دە, بالالاردىڭ امان-ەسەن ەرجەتۋى وتە ماڭىزدى. ەگەر بىزدەن قانداي دا ءبىر كومەك قاجەت بولسا, ءبىز قول ۇشىن بەرۋگە دايىنبىز, – دەدى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا توراعاسىنىڭ ورىنباسارى نازگۇل ماقجان.
«انا ءۇيى» ورتالىعىنىڭ ىرگەتاسى 2013 جىلى قالانعان. بۇل ورتالىقتا ومىرلىك جاعدايعا بايلانىستى بالالارىن تاستاپ كەتە جازداعان, ويدا جوقتا اياعى اۋىر بولىپ, تاعدىرى تالكەككە تۇسكەن جاس انالارعا كومەك كورسەتىلەدى. ولار وسى ورتالىقتا جارتى جىل تۇرىپ, پسيحولوگيالىق جاعىنان كومەك الادى, ورتالىقتان شىققاننان كەيىن ءومىر سۇرۋگە قاجەتتى ماماندىقتاردى ۇيرەنەدى. تەگىن, اقشا تولەمەيدى. ورتالىق قوعامداعى قالتالى, قايىرىمدى ازاماتتاردىڭ كومەگىمەن قارجىلاندىرىلادى. قازىر باس شاھاردا «انا ءۇيىنىڭ» 2 فيليالى بار. ون جىلدان بەرى بۇل ورتالىقتان 500-گە جۋىق جاس انا قاجەتتى كومەك العان.
