ەلورداداعى جەڭىس داڭعىلى بويىنداعى 18-ءشى ءۇيدىڭ شاتىرى 7 تامىز كۇنى تۇندە جارتىلاي قۇلاعان بولاتىن. ابىروي بولعاندا, ەشكىم زارداپ شەككەن جوق. استانا قالالىق تۇرعىن ءۇي ينسپەكتسياسىنىڭ باستىعى ءاليحان قۋاتبەكوۆ بۇل جاعدايعا بايلانىستى ارنايى تۇسىنىك بەردى.
– جەڭىس داڭعىلى بويىنداعى بۇل ءۇيدى بۇدان بۇرىنعى جىلدارى «استانا قۇرىلىس سەرۆيس» جشس تەكسەرىپ شىققان بولاتىن. سول كەزدە جوندەۋ-قالپىنا كەلتىرۋ جۇمىستارىن جۇرگىزۋ ۇسىنىلعان. «تۇرعىن ءۇي قاتىناستارى تۋرالى» زاڭعا سايكەس, ءۇي يەلەرى جالپى مۇلىكتىڭ ساقتالۋىنا جاۋاپ بەرەدى. وسى جىلى بۇل ۇيگە قىزمەت كورسەتەتىن «ۋك كوممۋنالنيك-2» جشس تۇرعىن ءۇي ينسپەكتسياسىنا جازباشا جۇگىنگەن ەدى. سول كەزدە ءبىز قوسىمشا تەكسەرۋ جۇرگىزۋ جونىندە ەسكەرتۋ بەردىك. سونىڭ ناتيجەسىندە قايتادان تەكسەرىپ-زەرتتەۋ جۇمىستارى جۇرگىزىلدى. بۇدان سوڭ تۇرعىنداردى كوشىرۋ جانە تاعى باسقا شارالارمەن بىرگە, جوندەۋ-قالپىنا كەلتىرۋ جۇمىستارىن جۇرگىزۋ جونىندە ۇسىنبا ازىرلەندى. بيىل تۇرعىن ءۇي كوممۋنالدىق شارۋاشىلىعىن جاڭعىرتۋ باعدارلاماسى نەگىزىندە ءۇي جوندەلۋى ءتيىس ەدى. بىراق باعدارلاما بويىنشا رەسپۋبليكالىق بيۋدجەتتەن قارجى بولىنبەۋىنە بايلانىستى جۇمىستار توقتاتىلدى. قازىرگى ۋاقىتتا استانا قالاسى اكىمىنىڭ تاپسىرماسىمەن جوندەۋ جۇمىستارىنا قارجى ءبولۋ مۇمكىندىكتەرى قاراستىرىلۋدا. وسىدان ءسال بۇرىن سول ءۇيدىڭ بەلسەندى توبىنىڭ قاتىسۋىمەن ارنايى جيىن ءوتتى. تاياۋ كۇندەرى ءتيىستى شارا قولعا الىنادى, – دەدى ءاليحان قۋاتبەكوۆ.
ونىڭ ايتۋىنشا, جوندەلۋى ءتيىس ءۇيدىڭ سالىنعانىنا 30 جىلدان استام ۋاقىت بولعان ەكەن. اپپاتتى ءۇي رەتىندە بۇرىن تىركەلمەگەن, تەك جوندەۋ-قالپىنا كەلتىرۋ جۇمىستارىن جۇرگىزۋ جونىندە ۇسىنىس جاسالعان. قابىرعالارى جارىلا باستاعان بۇل ۇيدە قازىر تۇرعىندار تۇرىپ جاتقان كورىنەدى. قازىرگى ۋاقىتتا شاتىردىڭ جارتىلاي قۇلاۋى سەبەپتەرىن انىقتاۋ قولعا الىنعان. جالپى بۇلىنگەن اۋماق ون شارشى مەتردەن استام جەردى قامتيدى. ءتيىستى قاۋلى ارنايى رەسىمدەلىپ, زاڭ تۇرعىسىنان بارلىق شارالار اتقارىلعاننان كەيىن جاقىن كۇندەرى جوندەۋ جۇمىستارى باستالماق.
مەڭدوللا نۇرىمۇلى
