رەسپۋبليكا كۇنى مەرەكەسى اياسىندا ەلوردادا «ارعىماق» اتپەن ساۋىقتىرۋ سپورت كەشەنى اشىلدى. جاڭا نىساننىڭ اشىلۋىنا وراي استانا قالاسى اكىمدىگىنىڭ قولداۋىمەن بايگە ۇيىمداستىرىلدى.
بايگەنىڭ جالپى جۇلدە قورى 7000000 تەڭگە بولدى. شاباندوزدار بايگەنىڭ «توپ» جانە «الامان» تۇرىنەن سىنعا ءتۇستى.
مەرەكەلىك ءىس-شاراعا قاتىسقان استانا قالاسى اكىمىنىڭ ورىنباسارى ەسەت بايكەن جۇرتشىلىقتى رەسپۋبليكا كۇنىمەن قۇتتىقتادى. استانا قالاسى ءماسليحاتىنىڭ حاتشىسى ەرلان كاناليموۆ جاڭادان اشىلعان «ارعىماق» سپورت كەشەنى ەلوردامىزدا ات سپورتىن دامىتۋعا, سونىمەن قاتار بۇقارالىق سپورتتى جانداندىرۋعا ايتارلىقتاي ۇلەس قوساتىنىن اتاپ ءوتىپ, جارىسقا قاتىسۋشىلارعا ساتتىلىك تىلەدى.
جارىسقا شىققان 70-كە جۋىق شاباندوزدىڭ اراسىنان سۋىرىلىپ شىققاندارى جانكۇيەرلەردىڭ قۇرمەتىنە بولەنىپ قانا قويماي, قوماقتى قارجىلاي سىيلىققا كەنەلدى. اتاپ ايتقاندا, سايىستىڭ «بالالار» ساناتىندا اميرا قاباجانوۆا (سايىس اتى «شاح») مارە سىزىعىن ءبىرىنشى بولىپ كەستى. «عايساق» اتتى ارعىماعىن تىزگىندەگەن دارينا دۇرجىباەۆا ەكىنشى بولىپ كەلدى. ال ءۇشىنشى ورىن لاۋرا الدابەرگەنوۆاعا («كۇرەڭ» اتىمەن) بۇيىردى.
«جاس جىلقىلار» ساناتىندا ازامات زامەنيۆ («Red River») ءبىرىنشى ورىننان كورىنسە, «ماريگولد» اتىمەن ولەگ سوكولەنكو ەكىنشى ورىنعا يە بولدى. ال ۆيكتوريا كوتينا («سايگون») ۇزدىك ۇشتىكتى تۇگەندەدى.
«اشىق سىنىپ» بويىنشا سايىسقا تۇسكەن قاتىسۋشىلاردىڭ ىشىنەن ەرجان ماعجاەۆ («دجافار») توپ جاردى. ەكىنشى ورىندى ولەگ سوكولەنكو («كۇرەڭ») يەلەنسە, «كاپريا» اتىمەن نيكا سيم ءۇشىنشى ورىننان كورىندى.
جارىس جەڭىمپازدارىنا 1 ميلليون تەڭگەنىڭ سەرتيفيكاتى تابىس ەتىلدى. بارلىق جۇلدەگەرلەرگە استانا قالاسى دەنە شىنىقتىرۋ جانە سپورت باسقارماسى اتىنان تاعايىندالعان ديپلومدار, مەدالدار جانە باعالى سىيلىقتار تابىس ەتىلدى.
ءىس-شارا اياسىندا رەسپۋبليكا كۇنىن مەرەكەلەپ جۇرگەن جۇرتشىلىق ءۇشىن كيىز ءۇي تىگىلىپ, كوركەمونەرپازدار ءان شىرقاپ, كۇي كۇمبىرلەتتى. سونداي-اق كورەرمەندەر اراسىندا ۇتىس لوتەرەياسى ويناتىلىپ, كوپتەگەن ەلوردالىق ءتۇرلى سىيلىق ۇتىپ الدى. وسىلايشا, استانا تورىندە ۇلتتىق سپورتىمىزدى ۇلىقتايتىن تاعى ءبىر تاماشا كەشەن ىسكە قوسىلدى.
