استانا اكىمدىگى ازىق-تۇلىك باعالارىنىڭ وسۋىنە جول بەرمەۋ بويىنشا شارالار قولدانادى
بۇگىن قالا باسشىسى اسەت يسەكەشەۆتىڭ توراعالىعىمەن ازىق-تۇلىك باعاسىن تۇراقتاندىرۋ ماسەلەلەرىن تالقىلاۋ بويىنشا كەڭەس ءوتتى. وعان قالالىق وكىلەتتى ورگانداردىڭ, ستاتيستيكا دەپارتامەنتىنىڭ, ۇەم تابيعي مونوپوليالار جانە باسەكەلەستىكتى قورعاۋ كوميتەتىنىڭ, «قازاگروماركەتينگ» اق وكىلدەرى, سونداي-اق, ەلوردانىڭ ءىرى كاسىپورىندارىنىڭ باسشىلارى قاتىستى. كەڭەس بارىسىندا مەملەكەت باسشىسىنىڭ ەلوردادا ازىق-تۇلىك ونىمدەرىنىڭ قاۋىپسىزدىگىن قامتاماسىز ەتۋ جونىندەگى تاپسىرماسىن ورىنداۋعا باعىتتالعان شارالار تالقىلاندى.
ەلوردا اكىمى الەۋمەتتىك-ماڭىزدى تاۋارلاردىڭ, سونىڭ ىشىندە نان, جارما جانە قانتتىڭ باعاسىن ۇستاپ قالۋعا باعىتتالعان بىرقاتار ناقتى تاپسىرمالار بەردى.
كۇن سايىن اۋىل شارۋاشىلىعى ونىمدەرىنىڭ جارمەڭكەسىن وتكىزۋ جانە ساۋدا ورىندارىنىڭ سانىن كەڭەيتۋ, اۆتودۇكەندەر اشۋ تۋرالى شەشىم قابىلداندى.
وسىعان بايلانىستى قازاقستاننىڭ وڭىرلەرىمەن اۋىل شارۋاشىلىق ونىمدەرىن تىكەلەي ەلورداعا جەتكىزۋ تۋرالى كەلىسىمگە قول جەتكىزىلدى. وسى ماقساتتا قالا باسشىسى ازىق-تۇلىك تاسىمالداۋشى كولىكتەرگە «جاسىل ءدالىزدى» قامتاماسىز ەتۋگە تاپسىرما بەردى.
سونىمەن قاتار, جارمەڭكەدە ساتىلاتىن ونىمدەر اسسورتيمەنتى دە كەڭەيتىلمەك, ەندى ماي, شاي, جارمالار جانە ت.ب. ساتىلادى. ەت جانە ءسۇت ونىمدەرىن تەكسەرۋگە ارنالعان ءموبيلدى زەرتحانالار ورناتىلادى.
ايتا كەتەيىك, قالالىق اكىمدىكتىڭ وكىلدەرى جارمەڭكەلەردە ونىمدەر باعاسىنا ۇدايى باقىلاۋ جۇرگىزەدى. ۇەم تابيعي مونوپوليالار جانە باسەكەلەستىكتى قورعاۋ كوميتەتى باعالارعا تۇراقتى تۇردە مونيتورينگ جۇرگىزەتىن بولادى.
وسى ماسەلە بويىنشا قابىلداناتىن شارالاردى ۇيلەستىرۋ ءۇشىن استانا قالاسى اكىمىنىڭ ورىنباسارى اندرەي لۋكيننىڭ جەتەكشىلىگىمەن جەدەل شتاب قۇرىلدى. ەلوردادا ازىق-تۇلىك قاۋىپسىزدىگىن قامتاماسىز ەتۋ ماسەلەسى قالا باسشىسىنىڭ جەكە باقىلاۋىنا الىندى.
astana.gov.kz
