10 جەلتوقسان – ەل استاناسى الاتاۋ باۋرايىنان ارقا توسىنە كوشكەن كۇن. وسىناۋ ايتۋلى وقيعاعا بايلانىستى كەشە بەيبىتشىلىك جانە كەلىسىم سارايىندا سالتاناتتى كونتسەرت ءوتتى. القالى الەۋمەتپەن بىرگە, كونتسەرتكە مەملەكەت باسشىسى نۇرسۇلتان نازارباەۆ كەلىپ, وتاندىق ونەر مايتالماندارىنىڭ استاناعا ارناعان ءان شاشۋىن تاماشالادى.
استانالىق اعايىن الدىندا قالا اكىمى ءسوز سويلەپ, بارشا جۇرتتى ايتۋلى مەرەكەمەن قۇتتىقتادى.
– اسا قادىرلى ەلباسى! ءسىزدىڭ قاي شەشىمىڭىز بولماسىن تۇبىندە الىستى بولجايتىن, اسىپ-ساسۋدى كوتەرمەيتىن ەرەكشە كورەگەندىك جاتىر, – دەيدى اعىنان جارىلىپ.
– بۇگىن, مىنە, بۇكىل ۇرپاقتىڭ باعى بولعان استانا سونىڭ بىرەگەيى. ەسىڭىزدە بولار, وسىدان 14 جىلداي بۇرىن قارت الاتاۋدىڭ ءبىر بوكتەرىندە وزىڭىزبەن اڭگىمەلەسكەندە مەن ارۋ الماتىعا قاراپ تۇرىپ, «وسىنداي كەرەمەتتى قالدىرىپ…» دەگەنشە بولماي, ءسىز «يمانعالي, ونىڭدى قوي. مەن دە الماتىنى جاقسى كورەمىن. بىراق, مىنا ەلدىڭ نەگىزگى يەسى كىم ەكەندىگىن دۇنيە ءجۇزى ءبىلۋى كەرەك. وردانى قيىردان باسقارۋ, كوزدىڭ قيىعىمەن قاراۋمەن تەڭ. بۇگىنگى جۇرت بۇنى تۇسىنبەس, بىراق كەلەر ۇرپاق باعاسىن بەرەرى حاق دەگەنسىز». مىنەكي, سول ۋاقىت كەلدى. ەل ءتۇسىندى. ءوز كەزەگىندە بۇل تۋعان ەلىمنىڭ مىڭ جىلدىق تىلەگىن, عاسىرلىق ارمانىن اقيقاتقا اينالدىرسام دەگەن ەلباسىنىڭ تاريحي جەڭىسى. ەندەشە, سول ارقىلى تورتكۇل دۇنيەدە ماڭگىلىك ەلمىن دەپ قاقپاسىن ايقارا اشقان استانا دا ماڭگىلىك.
اكىم سوزىنەن سوڭ, زالعا جينالعان جۇرت ورە تۇرەگەلىپ, قوشەمەت كورسەتتى. بۇل – ولاردىڭ ەلوردا مەن ەلباسىعا دەگەن ىقىلاسى ەدى. بۇدان سوڭ, ساحناعا ەلىمىزدىڭ ونەرپازدارى شىعىپ, ءان مەن جىرعا كەزەك بەردى.
ساحنا تورىنە استانا قالاسىنىڭ ەسترادالىق-سيمفونيالىق وركەسترىنىڭ سۇيەمەلدەۋىمەن ديماش قۇدايبەرگەنوۆ, ەركىن ماۋلەن, الىشەر كارىموۆ, مارجان اراپباەۆا, ازامات جىلتىركوزوۆ, روزا رىمباەۆا, جۇلدىز تيۋتەباەۆالار شىقتى. ولار «تى سامايا كراسيۆايا, استانا» , «استانا» , «استانا ۆالسى», «استانا مەنىڭ ماحابباتىم», «استانا كەشى», «ارايلى استانا», «اق وردام – استانام» اندەرىن اۋەلەتتى. كەشتىڭ جاڭالىعى – «نۇر استانا» اتتى ەكى ءاننىڭ ورىندالۋى بولدى. سونىمەن قاتار, «ەلىگاي» بالالار حورى ەلباسى سوزىنە جازىلعان «گورود موي» ءانىن شىرقادى. كومپوزيتور تولەگەن مۇحامەدجانوۆ جازعان بۇل ءاندى وتكەن جىلى العاش رەت بەلگىلى وپەرا ءانشىسى سۇندەت بايعوجين ورىنداعان بولاتىن.
