بۇكىلالەمدىك بوكس قاۋىمداستىعى اياسىندا بيىل بەسىنشى رەت وتكەن WSB حالىقارالىق ءتۋرنيرىنىڭ فينالىندا قازاقستاندىق «استانا ارلاندارى» كلۋبىنىڭ بوكسشىلارى جەڭىمپاز اتاندى. اقتىق سىندا «كۋبا قابىلاندارى» بوكسشىلارىن 6:4 ەسەبىمەن تىزە بۇكتىردى. بۇل –«ارلانداردىڭ» ايتۋلى تۋرنيردەگى ەكىنشى جەڭىسى. وسىعان دەيىن قازاق جىگىتتەرى 2013 جىلى توپ جارعان ەدى. ال «قابىلاندار» 2014 جىلى جەڭىمپاز اتانعان.
ەكى كۇن بويى ەلوردانىڭ «داۋلەت» سپورت كەشەنىندە كەرىلگەن شارشى الاڭدا ەكى ەلدىڭ ەڭ مىقتى بوكسشىلارى قولعاپ ءتۇيىستىردى. قالىڭ جانكۇيەردىڭ قولداۋىمەن العاشقى جەكپە-جەككە شىققان تەمىرتاس ءجۇسىپوۆ ۇپاي سانىمەن جەڭىسكە جەتىپ, ءوز كومانداسىن العا باستادى. ال 56 كەلىدە وليمپيادا ويىندارى مەن الەم چەمپيونى روبەيسي راميرەس ءبىزدىڭ قايرات ەراليەۆپەن كەزدەستى. بۇل جەكپە-جەكتە بوستاندىق ارالىنىڭ بوكسشىسى جەڭىمپاز اتاندى. «استانا ارلاندارىنىڭ» كاپيتانى سامات باشەنوۆ وتە اۋىر ايقاس وتكىزدى. قارسىلاسى ياسنيەر تولەدا تالاي جارىستا توپ جارعان تارلانبوزدىڭ ءوزى ەدى. الايدا, ءتورت راۋند بويى الما-كەزەك وتكەن ۇرىستىڭ سوڭىنداعى سامات ءدال سوققىلارى ءۇشىن تورەشىلەر جەڭىستى قازاق بوكسشىنا بەردى. وسى كەشتەگى كەرەمەت جەكپە-جەكتى مەيىرىم نۇرسۇلتانوۆ وتكىزدى. الەم چەمپيونى مەرەي اقشالوۆتىڭ تۋعان ءىنىسى اعاسىنان اسىپ كەتپەسە, كەم تۇسپەيتىنىن اڭعارتقانداي بولدى. 75 كەلىدە ايقاسقان مەيىرىم كۋبالىق ارلەن كاردونانى ايقىن باسىمدىلىقپەن تىزە بۇكتىردى. ال 91 كەلىدە سىندا ۆاسيلي لەۆيت اتاقتى فەليكس ساۆوننىڭ جيەنىمەن كەزدەستى. وسىعان دەيىن ەكەۋى دە 2016 جىلى ريو-دە جانەيرودا وتەتىن وليمپيادا ويىندارىنا جولداما الىپ قويعان بولاتىن. قوس مىقتىنىڭ بۇل اقتىق ايقاسىندا ساۆون جەڭىسكە جەتتى. تورەشىلەردىڭ بۇل شەشىمىنە قازاق جانكۇيەرلەرى كەلىسپەيتىندىكتەرىن ءبىلدىرىپ جاتتى. شىنىمەن دە لەۆيت شيراق قيمىلداعان ەدى. وسىلايشا «استانا ارلاندارى» ءبىرىنشى كۇنى 3:2 ەسبىمەن العا شىقتى.
ەكىنشى كۇنى ولجاس ساتتىباەۆ جەڭىستى جولدى جالعاستىردى. ول ءوز قارسىلاسىنان تەحنيكالىق تۇرعىدان ءتۇستى. 60 كەلى سالماقتا زاكير سافيۋللين قانشا تىرىسقانىمەن وليمپيادا ويىندارىنىڭ چەمپيونى ءارى قولا جۇلدەگەرى لازارو الۆارەستەن ايلاسىن اسىرا المادى. وسى فينالداعى ەڭ تارتىستى جەكپە-جەك 69 كەلى سالماقتا بولدى دەسەك, ەشكىم قارسىلىق تانىتپاس دەپ ويلايمىز. اسلانبەك شىمبەرگەنوۆ كۋبا قۇراماسى ساپىنداعى ەڭ اتاقتى بوكسشى يگلەسياس سوتولونگامەن قولعاپ ءتۇيىستىردى. ايقاس باستالعان شاقتا كۋبالىق بوكسشى بىردەن العا ۇمتىلىپ, جەكپە-جەك تاعدىرىن ءبىرىنشى نەمەسە ەكىنشى راۋندتا شەشىپ تاستاعىسى كەلگەندەي اسەر بەردى. الايدا, قازاق بوكسشىسى قارسىلاسىنىڭ الاپات تەگەۋرىنىنە تويتارىس بەرە ءبىلدى. ال سوڭعى ەكى راۋندتا سوتولونگانىڭ ءوزى ساسقالاقتاپ شارشى الاڭدى شىر اينالۋعا ءماجبۇر بولدى. شىمبەرگەنوۆتىڭ جانكەشتى قايسارلىعىنا ءتانتى بولعان تورەشىلەر جەڭىستى ءبىراۋىزدان قازاق بوكسشىسىنا بەردى. 81 كەلىدە تاعى ءبىر اتاقتى كۋبالىق ەكى دۇركىن الەم چەمپيونى حۋليو سەسار لا كرۋز ءبىزدىڭ نۇرداۋلەت جارمانوۆتى جەڭدى. ەڭ اۋىر سالماقتا يۆان دىچكو قارسىلاسىنان وق بويى وزىق كورىندى. وسىلايشا قوسىمشا سالماقتا ايقاسقا شىعۋعا دايىندالعان مەيىربولات تويتوۆتىڭ جەكپە-جەگىن كورە المادىق. ەكىنشى كۇنى دە 3:2 ەسەبىمەن جەڭىسكە جەتكەن «استانا ارلاندارى» بوكسشىلارى ەكىنشى مارتە WSB ءتۋرنيرىنىڭ چەمپيونى اتاندى.
