قالالىق ءماسليحاتتىڭ تۇراقتى كوميسسيالارىنىڭ بىرلەسكەن وتىرىسىندا قورشاعان ورتانى قورعاۋ جانە ەكولوگيالىق قاۋىپسىزدىك ماسەلەلەرى تالقىلاندى.
قورشاعان ورتانى قورعاۋ – قازىرگى كەزدەگى وتكىر ماسەلەلەردىڭ ءبىرى. جىل وتكەن سايىن ەلوردانىڭ ەكولوگيالىق احۋالى تومەندەپ, اتموسفەراعا شىعارىلاتىن قالدىقتاردىڭ كولەمى ارتىپ وتىرعانىن تىلگە تيەك ەتكەن استانا قالاسى تابيعي رەسۋرستار مەن تابيعات پايدالانۋدى رەتتەۋ باسقارماسى باسشىسىنىڭ مىندەتىن اتقارۋشى ادىلبەك سارسەمباەۆ ونىڭ بىرنەشە سەبەبىن اتاپ ءوتتى. سولاردىڭ ءبىرى –استانا كوشەلەرىندە اۆتوكولىكتەر سانىنىڭ ءوسۋى. سونىمەن بىرگە ءوندiرiس ورىندارىنان شىققان قالدىقتار, تۇرعىن ءۇي جانە باسقا دا عيماراتتاردى جىلىتۋدا قاتتى وتىن – كومىردى پايدالانۋ دا اۋانى لاستايتىنى بەلگىلى.
اتموسفەراعا شىعارىلاتىن وسىنداي زياندى قالدىقتاردى ازايتۋ ءۇشىن الداعى ۋاقىتتا كەيبىر قازاندىقتار گازدى پايدالانۋعا كوشىرىلمەكشى. بۇل رەتتە ەلوردا ماڭىنا اعاش-تالداردى كوپتەپ وتىرعىزۋدىڭ, سونداي-اق قورشاعان ورتانىڭ جاعدايىن تەكسەرىپ وتىراتىن ستانسالىق بەكەتتەر سانىن كوبەيتۋدىڭ دە ماڭىزى زور. وسى جونىندە بايانداي كەلە, ەلوردالىق ەكولوگيا دەپارتامەنتى باسشىسىنىڭ مىندەتىن اتقارۋشى ابزال ەگەمبەرديەۆ تۇرعىنداردىڭ تۇرمىستىق قالدىقتاردى ءتيىستى ورنىنا تاستاماي, قالاي بولسا
سولاي لاقتىرا سالاتىنىن, كەيبىر اۆتوكولىك جۋاتىن ورىنداردا سانيتاريالىق تالاپتاردىڭ ورەسكەل بۇزىلۋىنا جول بەرىلىپ جاتقانىن جەتكىزدى.
جىل باسىنان بەرى باس قالادا 1,8 ميلليون جارىق بەرگىش لامپا جينالىپ, زارارسىزداندىرىلسا, ولار ءۇشىن 297 كونتەينەر قويىلعان.
تالقىلانعان ماسەلەگە وراي دەپۋتاتتار س.بوگاتىرەۆ, م.شەكەنوۆ, ت.ورازاقوۆ جانە تاعى باسقالار پىكىر ءبىلدىرىپ, استانانىڭ اۋاسىن لاستاماۋ ءۇشىن جولاۋشىلاردىڭ قوعامدىق كولىكتەردى كوبىرەك پايدالانۋىن, قالادا گازدىڭ جەتكىلىكسىزدىگىن جانە پاركينگ ماسەلەسىن العا تارتتى. وتىرىستى قورىتىندىلاي كەلە, قالالىق ءماسليحاتتىڭ حاتشىسى سانسىزباي ەسىلوۆ ەلوردا ەكولوگياسىنا جاۋاپتى مەكەمەلەردى بىرلەسىپ جۇمىس ىستەۋگە شاقىردى.
گۇلبارشىن وكەشقىزى
