كەشە ەلوردا اكىمى ادىلبەك جاقسىبەكوۆ كەزەكتى اپپارات وتىرىسىن وتكىزدى دەپ حابارلايدى اكىمدىكتىڭ ءباسپاسوز قىزمەتى.
قالا اكىمى الدىمەن مەملەكەتتىك قىزمەتتىڭ دامۋىنا سۇبەلى ۇلەس قوسقان قىزمەتكەرلەرگە «ۇزدىك مەملەكەتتىك قىزمەتشى» توسبەلگىلەرىن تابىستادى.
– مەملەكەتتىك قىزمەتشى بولۋ – ۇلكەن ابىروي. سىزدەر ەلگە, حالىققا قىزمەت ەتىپ كەلەسىزدەر. سوندىقتان, قاي ىستە دە كاسىبي بىلىكتىلىك تانىتىپ, مەملەكەت يگىلىگى ءۇشىن ادال ەڭبەك ەتۋ قاجەت. حالىققا قىزمەت ەتۋدى ناسيحاتتاۋ, مەملەكەتتىك قىزمەتتىڭ بەدەلىن ارتتىرۋ دا – سىزدەردىڭ قولدارىڭىزدا. وسى جولداعى ەڭبەكتەرىڭىزگە ساتتىلىك تىلەيمىن, – دەدى اكىم.
مەملەكەت باسشىسى بەكىتكەن «ۇزدىك مەملەكەتتىك قىزمەتشى» توسبەلگىسىمەن ەسىل اۋدانىنىڭ اكىمى ءسابيلا مۇستافينا, قالا اكىمىنىڭ كەڭەسشىسى ميحايل چيركوۆ, ەكونوميكا جانە بيۋدجەتتى جوسپارلاۋ باسقارماسىنىڭ باسشىسى جانات نۇرپەيىسوۆ, اكىمنىڭ كومەكشىسى ۇمبەتباي ماعزۇموۆ, جەر قاتىناستارى باسقارماسى باسشىسىنىڭ ورىنباسارى نازىمبەك كەنجەباەۆ, قالا اكىمى اپپاراتى مەملەكەتتىك-قۇقىقتىق ءبولىمىنىڭ باسشىسى قايرات كوپباەۆ ماراپاتتالدى.
بۇدان كەيىن جيىن كۇن تارتىبىندەگى ماسەلەلەرگە ويىسىپ, ادىلبەك رىسكەلدىۇلى قالا دامۋىنداعى باستى باسىمدىقتارعا توقتالدى. الدىمەن «ەكسپو-2017» كورمەسىن ۇيىمداستىرۋ مەن وتكىزۋ ماسەلەسى قوزعالىپ, اكىم ونداعى قولعا الىنعان شارۋالاردى پىسىقتادى. قالا اكىمىنىڭ ايتۋىنشا, ءۇش ايعا جالعاساتىن كورمە اۋماعىندا ءۇش مىڭنان استام مادەني-دەمالىس شاراسى ۇيىمداستىرىلماق. ولاردىڭ ءارقايسىسى حالىقارالىق تالاپقا ساي بولۋى شارت. جاھاندىق شارا كەزىندە ەلورداعا كەلەتىن تۋريستەر مەن قالا تۇرعىندارىنىڭ دەمالىسىن ءتۇرلەندىرۋ دە – باستى ماسەلە. كوڭىلدى سەرگىتۋ ءۇشىن كەلگەن جۇرتشىلىق استانادان شىن مانىسىندە تىنىعىپ قايتۋى كەرەك. سوندىقتان, ەلوردانىڭ بارلىق اۋماعىندا رۋحاني-مادەني
ءىس-شارالار وتكىزىلۋى ءتيىس.
– قازىرگى كەزدە ەلوردالىق ساياباقتارعا كەلۋشىلەر سانىن كوبەيتۋىمىز كەرەك. ساياباقتار تۇرعىنداردىڭ سايالايتىن عانا ەمەس, جاقسى تىنىعىپ كەتەتىن مەكەنىنە دە اينالعانى ابزال. وسى ماقساتتا قالالىق ساياباقتىڭ ينفراقۇرىلىمىن دامىتۋعا دەن قويۋىمىز قاجەت, – دەپ اتاپ ءوتتى قالا باسشىسى.
ءا.جاقسىبەكوۆتىڭ ايتۋىنشا, حالىقارالىق مامانداندىرىلعان كورمە – ەلىمىزدى الەمگە تانىتاتىن سالماقتى شارا. وعان قازاقستاندىقتار دا بەلسەنە اتسالىسۋ ءۇشىن وزگە وڭىرلەرمەن ىنتىماقتاسا جۇمىس ىستەۋدىڭ ماڭىزى ۇلكەن. بۇل ماسەلەنى شەشۋدىڭ ءبىر جولى رەتىندە اكىم
ەكسپو اۋماعىنا مەكتەپ وقۋشىلارى مەن ستۋدەنتتەرگە ەكسكۋرسيا وتكىزۋ كەرەكتىگىن العا تارتتى. اكىمنىڭ پىكىرىنشە, ەكسپو الاڭى عانا ەمەس, ەلوردانىڭ كەز كەلگەن كورنەكتى ورىندارى وزگە وڭىرلەرگە كەڭىنەن ناسيحاتتالۋى كەرەك. بۇل شارۋالارعا قالالىق قۇرىلىمدار بەلسەنە ۇلەس قوسۋى ءتيىس. ءا.جاقسىبەكوۆ ەلىمىزدى دۇنيە جۇزىنە تانىتاتىن ايتۋلى شارادان استانالىقتاردى دا تىسقارى قالماۋعا شاقىردى.
