فۋتبولدان قازاقستان چەمپيوناتى مارەسىنە جەتتى. ەلوردانىڭ «استانا» كلۋبى جەتىنشى رەت ەل چەمپيونى اتاندى.
جەكسەنبى كۇنى وتكەن سوڭعى تۋردا كوشباسشى كوماندالاردىڭ ءبارى جەڭىسكە جەتتى. اتاپ ايتقاندا, «استانا» قاراعاندىدا جەرگىلىكتى «شاحتەر» كومانداسىن 3:2 ەسەبىمەن ۇتسا, ەلىمىزدىڭ بەس دۇركىن چەمپيونى «اقتوبە» ءوز الاڭىندا سوڭعى تۋرعا دەيىن قولا جۇلدەگە ۇمىتكەر بولىپ كەلگەن «قايرات» كومانداسىن 4:1 ەسەبىمەن تىزە بۇكتىردى. ەسەسىنە قولادان قول ۇزبەگەن قوستانايلىق «توبىل» سىرت الاڭدا «اقجايىقتى» ۇتىپ (3:1), تۋرنير كەستەسىن ءۇشىنشى بولىپ اياقتادى.
چەمپيوناتتىڭ ۇزدىك مەرگەنى بولىپ «استانالىق» پەدرو ەنجەنيو (پورتۋگاليا) تانىلدى. ول قارسىلاستار قاقپاسىنا 18 گول سوقتى. تاعى ءبىر «استانالىق» مارين توماسوۆ (حورۆاتيا) مەرگەندەر باسەكەسىندە 15 گولدىڭ اۆتورى اتانىپ, ەكىنشى كورسەتكىشكە قول جەتكىزدى.
ال سوڭعى ورىندا قالعان «تۇران» (تۇركىستان) مەن «اقجايىق» پرەمەر-ليگامەن قوشتاستى. ال ءبىرىنشى ليگادا ۇزدىك شىققان «وقجەتپەس» (كوكشەتاۋ) پەن «اقجايىق» (قىزىلوردا) اراعا ءبىر جىل سالىپ پرەمەر-ليگاعا ورالاتىن بولدى.
سونىمەن, 2022 جىلدىڭ فۋتبول چەمپيوناتى تاريح قويناۋىنا ءوتتى. «استانا» كومانداسى جەتىنشى رەت قازاقستان چەمپيونى اتانىپ, ۇلتتىق فۋتبولدىڭ رەكوردىن جاڭارتتى.
جاقىن ارادا قازاقستان فۋتبول فەدەراتسياسى اتالىمدار بويىنشا جىلدىڭ ۇزدىك فۋتبولشىلارىن جاريالايدى.
چەمپيوناتتىڭ قورىتىندىسى بويىنشا 2023 جىلعى ۋەفا تۋرنيرلەرىندە: «استانا» – چەمپيوندار ليگاسىندا, «اقتوبە» – ەۋروپا ليگاسىندا, «توبىل» مەن «قايرات» كونفەرەنتسيا ليگاسىندا وينايتىن بولدى.
فۋبولدان قازاقستان چەمپيوندارى: «استانا» – 7 رەت; «اقتوبە» – 5 رەت; «ەرتىس» (پاۆلودار) – 5 رەت; «قايرات» (الماتى) – 3 رەت; «ەلىم-اي» (سەمەي) – 3 رەت; «جەڭىس» (استانا) – 3 رەت; «شاحتەر» (قاراعاندى) – 2 رەت; «توبىل» (قوستاناي) – 2 رەت; «تاراز» – 1 رەت.
