استانا قالاسى الەمدەگى «توپ – 21» اقىلدى قالالار تىزىمىنە ەنگەنى بەلگىلى. ەندى باس شاھار «اقىلدى» ادىمىن بۇدان دا كەڭەيتىپ, يننوۆاتسيالىق جوبالارعا ايرىقشا دەن قويماق. بۇل تۋرالى نازارباەۆ ۋنيۆەرسيتەتىندە وتكەن «Tech Garden Summer FEST» تەحنولوگيالىق فەستيۆالى اياسىنداعى «اقىلدى يندۋستريا» جوبالارىنىڭ تۇساۋكەسەرىندە استانا قالاسىنىڭ اكىمى اسەت يسەكەشەۆ ايتتى. سونداي-اق, مۇندا «Startup Kazakhstan» حالىقارالىق باعدارلاماسى كوپشىلىك نازارىنا ۇسىنىلدى.
– استانالىق اكىمدىك جۇمىسىنىڭ باسىم باعىتتارىنىڭ ءبىرى – يننوۆاتسيانى دامىتۋ. مەنىڭ مينيسترلىكتە جيناقتاعان تاجىريبەم وسى باعىتتاعى جۇمىستاردىڭ ويداعىداي جۇزەگە اسۋىنا سەپتەسەتىن بولادى, – دەپ باستادى ءسوزىن اسەت ورەنتايۇلى سالتاناتتى شارادا. – ەلىمىزدىڭ باس قالاسى كۇننەن كۇنگە قارىشتاپ دامىپ كەلەدى. استانا – وتە اشىق قالا, تەك ەكونوميكاسى عانا ەمەس, الەۋمەتتىك-مادەني ءومىرى دە جوعارى دەڭگەيدە قالىپتاسقان. استانالىقتاردىڭ سانا-سەزىمى دە بيىك. سوندىقتان, يننوۆاتسيانى باسىم باعىتقا اينالدىرۋ وتە ماڭىزدى. استانا بۇعان قوسا, كرەاتيۆتى قالا بولۋى ءتيىس. ول ەلىمىزدىڭ جاڭا ەكونوميكاسىنا جول اشادى. مەنىڭ ويىمشا, «Startup Kazakhstan» حالىقارالىق باعدارلاماسى بارلىق عالىمدارعا, ستۋدەنتتەرگە, جاس كاسىپكەرلەرگە وزدەرىنىڭ جاڭا بيزنەسىن باستاۋعا مۇمكىندىك بەرەدى. ستارتاپ-بيزنەس – ءبىز ءۇشىن ماڭىزدى سالادا, قالا ءومىرىن جاقسارتۋدا ايتارلىقتاي سەرپىن بەرەتىنى انىق. بۇل اينالىپ كەلگەندە ءبىلىم, ترانسپورتتىق ماسەلەلەردىڭ شەشىمى, ەكولوگيا, ساپالى قىزمەت, ەلەكتروندى كوممەرتسيا, بىلايشا ايتقاندا, نەگىزگى باسىم باعىتتار.
ءبىز وسى سۇرانىس پەن قىزىعۋشىلىقتاردى ۇنەمى قولدايتىن بولامىز.
قالا اكىمى ءوز سوزىندە جاقىن ارادا نازارباەۆ ۋنيۆەرسيتەتى, ءبىلىم جانە عىلىم مينيسترلىگى مەن ينۆەستيتسيا جانە دامۋ مينيسترلىگى «اقىلدى قالا» قۇرۋ اياسىندا وزدەرىنىڭ بىرلەسكەن باعدارلاماسىن جاريالايتىنىن اتاپ ءوتتى. ەلوردا باسشىسى Smart سity قۇرۋدا جاس عالىمدارعا, ينجەنەرلەر مەن كاسىپكەرلەرگە ايرىقشا ءۇمىت ارتىپ وتىرعانىن دا جەتكىزدى. ونىڭ ايتۋىنشا, بۇدان بىلاي ستارتاپتار بايقاۋى استانادا تۇراقتى تۇردە جىلىنا بىرنەشە رەت وتكىزىلىپ تۇرماق.
فەستيۆال اياسىندا حالىقارالىق جانە قازاقستاندىق ساراپشىلار ستارتاپتاردى تابىستى دامىتۋ بويىنشا ارنايى شەبەرلىك دارىستەرىن وتكىزدى. وسى شارا بارىسىندا «اقىلدى يندۋستريا» يننوۆاتسيالىق جوبالاردىڭ دا تۇساۋى كەسىلگەن بولاتىن. سونىڭ ىشىندە تاسىمالداناتىن شاتىرلى قوندىرعىلار, ۆاگون-تسيستەرندى جىلىتۋ جۇيەلەرى, تاسىمالدانۋشى مۇناي ونىمدەرى, مالشىلارعا ارنالعان قۋاتى 1 كۆت ديففۋزورى بار كوشىرىلەتىن جەل قوندىرعىلارى جانە ەنەرگيا تۇتىنۋدى 40 پايىزعا تومەندەتەتىن قازاندىقپەن بىرگە جاسالعان گەليوقوندىرعىلار سياقتى جوبالار كوپشىلىكتىڭ قىزىعۋشىلىعىن تۋعىزدى.
شارا سوڭىندا «يننوۆاتسيالىق تەحنولوگيالار پاركى» اۆتونومدى كلاستەرلىك قورى مەن «NURIS» جشس اراسىندا مەموراندۋمعا قول قويىلدى.
مەڭدوللا شامۇراتوۆ
