استاناداعى كوممۋنالدىق قىزمەتتەر كۇشەيتىلگەن رەجيمدە جۇمىس ىستەپ جاتىر

جاڭبىر سۋىن تازارتۋعا باعىتتالعان جۇمىستارعا 117-دەن ارتىق ارنايى تەحنيكا تارتىلدى.

استانادا تاعى نوسەرلەتىپ جاۋىن-شاشىن جاۋدى. جاڭبىر سۋى 14 مم, ياعني ءبىر ايلىق نورمادان اسىپ ءتۇستى. تۇننەن اسىپ كۇندىزگە ۇلاسقان تولاسسىز جاۋعان جاڭبىر سالدارىنان كوممۋنالدىق قىزمەتتەر تاۋلىك بويعى رەجيمدە جۇمىس ىستەدى.

جاڭبىر سۋىن سورۋعا باعىتتالعان جۇمىستارعا 117-دەن ارتىق ارنايى تەحنيكا تارتىلدى. سونىڭ ىشىندە ەكى ءورت ءسوندىرۋ ستانتسياسى دا بولدى.

«تولاسسىز جاۋىننىڭ سۋىنان «حان شاتىر» سوو اۋدانىندا ورناتىلعان قوسالقى سورعىلاردىڭ ەسەبىنەن ورىنبور كوشەسىن سۋ باسۋدىڭ الدى الىندى. جىل سوڭىنا دەيىن كەرەي مەن جانىبەك حاندار كوشەسى مەن تۇران داڭعىلى, № 31 – حۋسەين بەن تالال كوشەلەرىندەگى №27 تازارتۋ قۇرىلىسى پايدالانۋعا بەرىلەدى» دەدى قاۋىرت جۇمىستىڭ باسىندا جۇرگەن استانا قالاسى اكىمىنىڭ ورىنباسارى قوسمان ايتمۇحامەتوۆ.

قالانى جاڭبىر سۋىنان تازارتۋعا بايلانىستى مەملەكەت باسشىسى نۇرسۇلتان نازارباەۆ قالانىڭ «ەكسپو-2017» حالىقارالىق كورمەسىنە دايىندىعى جونىندە وتكەن ءبىر جينالىستا ايتىپ, وسى رەتتە قالا باسشىلىعىنا تاپسىرمالار جۇكتەگەن بولاتىن. وسى ورايدا قالانىڭ سول جاعالاۋىندا جاۋىن سۋىن بۇرۋ جۇيەلەرى بيىلعى جىلدىڭ سوڭىنا دەيىن, ال جالپى قالا بويىنشا ءۇش جىلدىڭ ىشىندە ورناتىلاتىنى جوسپارلانعان.

وسىعان بايلانىستى نوسەر كارىزى جۇيەلەرىن دامىتۋ جونىندەگى جوبالاردى ىسكە اسىرۋدىڭ 2019 جىلعا دەيىنگى كەستەسى قايتا قارالدى.

بيىل ەكى تازارتۋ قۇرىلىسىن سالۋدان باسقا, كىشى تالدىكولدەن ەسىل وزەنىنە سۋ جىبەرەتىن كوللەكتوردىڭ جانە ساۋران كوشەسىندەگى رىسقۇلوۆ كوشەسىنەن №31 كوشەگە دەيىنگى نوسەر كارىزىنىڭ قۇرىلىسىن اياقتاۋ, تۇران داڭعىلى مەن سىعاناق كوشەسىنىڭ قيىلىسىنداعى درەناجدى-سورعى ستانتسياسىن قايتا جوندەۋ جوسپارلانىپ وتىر.

ءتيىستى شارالار قالانىڭ قارقىندى دامىپ كەلە جاتقان سول جاعالاۋىن سۋ باسۋ ماسەلەلەرىن تولىق شەشۋگە مۇمكىندىك بەرەدى.

سونىمەن قاتار, ۇستىمىزدەگى جىلى قايتا سالىنىپ جاتقان اۋماقتا سۋ بۇرۋ جاعدايلارىن جاقسارتۋ ءۇشىن بەيسەكوۆا كوشەسىندە, پريگورودنىي كەنتىندە تازارتۋ قۇرىلىستارى سالىنىپ جاتىر, سونداي-اق, تۇران داڭعىلى مەن سىعاناق كوشەسىنىڭ قيىلىسىنداعى تازارتۋ قۇرىلىسى قالپىنا كەلتىرىلىپ, 2018 جىلى پايدالانۋعا بەرىلەدى دەپ كۇتىلۋدە.