كەشە ەلىمىزدە ماڭىزى ۇلكەن مادەني وقيعا بولدى. ەلورداداعى «استانا-ارەنا» ستاديونىندا «مۋز تۆ-2015. گراۆيتاتسيا» سىيلىعىن تاپسىرۋ سالتاناتى ءوتتى. وعان وتاندىق جانە رەسەيدەن كەلگەن كوپتەگەن ەسترادا جۇلدىزدارى قاتىستى.
ون جىلدان اسا رەسەيدە ءوتىپ, ونداعى شوۋ-بيزنەستىڭ دامۋىنا ايتارلىقتاي ۇلەس قوسقان ايتۋلى ونەر الامانى بيىلعى جىلى ەلىمىزدە العاش ءوتىپ وتىر. سوندىقتان دا ءدۇبىرلى دودانى تاماشالاۋعا كەلگەن كورەرمەن قاراسى قيساپسىز كوپ. ءبارىنىڭ دە جۇزدەرىنەن «قاي ءانشى توپ جارىپ, كىمنىڭ باعى جانعالى تۇر؟» دەگەن ويدى وقۋعا بولادى. وسىنداي اۋقىمدى جوبانى ىسكە اسىرعان رەسەيدەگى ايگىلى «مۋز تۆ» ارناسىنىڭ باس ديرەكتورى, قانداسىمىز ارمان داۋلەتياروۆتىڭ ەرەن ەڭبەگىن ەرەكشە اتاپ وتكەن ءجون.
ونەردە ەشقاشان شەكارا بولمايدى. قوڭسىلاس قوس مەملەكەتتىڭ ونەر بايگەسىنە قوسىپ, ۇمىتتەرىن ۇكىلەپ وتىرعان انشىلەرى دە ولقى ەمەس. بارلىعى جاندى داۋىستا ءان شىرقاپ, كورەرمەن كوڭىلىن كوركەم كۇيگە بولەدى. وسى جولى ون بەس اتالىم اراسىندا «ۇزدىك قازاقستاندىق جىل ءارتىسى» نوميناتسياسى بار. بۇعان يە بولۋ ءۇشىن ەل ىقىلاسىنا بولەنىپ جۇرگەن وتاندىق انشىلەردىڭ قابىلەت-قارىمى تالقىعا ءتۇستى. سوندىقتان ايتۋلى شارادا كىمنىڭ باعى جانىپ, كىمنىڭ ءباسى بيىك بولعانىن گازەتتىڭ كەلەسى سانىندا ساراپتاپ بەرمەكپىز. سونىمەن, التى ساعاتتىق ەفيردە 100 ملن استام كورەرمەن تاماشالايتىن اۋقىمدى دودا مەن «مۋز تۆ-نىڭ» مۇزبالاقتارىن انىقتايتىن باسەكەنىڭ شىمىلدىعى ءتۇرىلدى.
ازامات ەسەنجول
