استانالىقتار قازاقتىڭ كەمەڭگەر اقىنى اباي قۇنانبايۇلىنىڭ 171 جىلدىعىن اتاپ ءوتتى
دانا ويشىلدىڭ تۋعان كۇنىنە وراي ۇيىمداستىرىلعان شارالار لەگى 23 تامىزدان اباي ەسكەرتكىشىنە گۇل شوعىن قويۋدان باستالدى.
«حالقىمىزدىڭ ماقتانىشى, ۇلت كوسەمدەرىنىڭ ءبىرى – اباي قۇنانباەۆتىڭ مول مۇراسى قانشاما جىلدان بەرى ەل يگىلىگىنە قىزمەت ەتىپ كەلەدى. اباي جىرلارىمەن بىرگە ءبىر ەمەس, بىرنەشە ۇرپاق رۋحاني تولىسىپ, ءوسىپ-جەتىلدى. بۇگىنگى تاۋەلسىز قازاقستان ومىرىندە ونىڭ پالساپالىق وي ورنەگىنىڭ ورنى بولەك. ۇلى بابا رۋحىنا تاعزىم ەتىپ, شىعارماشىلىعىن ناسيحاتتاۋ – كوزى قاراقتى دەگەن ءار ازاماتتىڭ مىندەتى» دەيدى استانا قالاسى اكىمىنىڭ ورىنباسارى ەرمەك امانشاەۆ.
سالتاناتتى جيىنعا استانا قالاسى ءماسليحاتى مەن «نۇر وتان» پارتياسى وكىلدەرى, قالا اكىمدىگىنە قاراستى باسقارمالار مەن ەڭبەك ارداگەرلەرى, سونداي-اق بۇلدىرشىندەر قاتىستى.
«قاستەرلى كۇندى جىل سايىن مەرەكەلەۋ ءوز الدىنا, بۇل ءداستۇر ۇزىلمەيتىن رۋحقا اينالۋى كەرەك. اباي – ادامزات ۇلىلىعىنىڭ التىن دىڭگەگى. ءار ادام ءوز جۇرەگىمەن, ىسىمەن, بويىنداعى قۇدىرەتىمەن اباي رۋحىنا قىزمەت ەتسە, قازاق حالقىنان باقىتتى ەشكىم بولماس ەدى. قانشا ۋاقىت ءوتتى… ابايدان اسقان اقىن جوق, ابايدان اسقان جانىڭا جاقىن جوق! قادىرلى عاجاپ تۇلعانى قاستەرلەمەۋگە حاقىڭ جوق! قازاقتىڭ جۇرەگىندە اباي قاسيەتى جۇرسە, ەشقاشان اداسپايتىنىمىز انىق», – دەگەن ويىن ءبىلدىردى حالىقارالىق «الاش» ادەبي سىيلىعىنىڭ يەگەرى, ارقالى اقىن سەرىك تۇرعىنبەكۇلى.
بۇدان كەيىن «جاستار» تەاترى ساحناسىندا «جۇرەگىمنىڭ تۇبىنە تەرەڭ بويلا» اتتى ادەبي-سازدى كەش شىمىلدىعىن ءتۇردى. استانا قالاسى اكىمدىگى مەملەكەتتىك اكادەميالىق فيلارمونياسى قازاق وركەسترىنىڭ سۇيەمەلدەۋىمەن ۇلى اقىننىڭ «جەلسىز تۇندە جارىق اي», «كوزىمنىڭ قاراسى», «سەگىز اياق» سىندى اندەرى اۋەلەپ, «تورى جورعا» كۇيى كۇمبىرلەدى. باس اقىننىڭ بىرقاتار ولەڭدەرىمەن ورىلگەن كەش ابايدىڭ وبرازىمەن ساحناعا شىققان اكتەر جانقالدىبەك تولەنباەۆتىڭ وقۋىنداعى «جۇرەگىمنىڭ تۇبىنە تەرەڭ بويلا» ولەڭىمەن اياقتالدى.
ءمادينا جاقىپ
