«اتامەكەن» قازاقستان كارتاسى» ەتنو-مەموريالدىق كەشەنىنىڭ ۇجىمى ناۋرىز مەرەكەسىن استانالىقتارمەن بىرگە تويلادى. سالتاناتتى شاراعا ەلورداداعى ونەر, مادەنيەت قىزمەتكەرلەرى اتسالىستى. دۋماندى باسقوسۋدى مۇراجاي ديرەكتورى ءۇمىتحان مۇڭالباەۆا اشىپ, ءسوز سويلەدى.
قوناقتاردى ءتول مەرەكەلەرىمەن قۇتتىقتاعان ءۇمىتحان داۋرەنبەكقىزى ۇلىستىڭ ۇلى كۇنىنىڭ قازاق حالقى ومىرىندەگى ماڭىزى, سالماعى توڭىرەگىندە اڭگىمەلەدى. «ۇلتىمىز ناۋرىزدى جىل باسى دەپ بىلگەن. ياعني, كوكتەممەن جىل دا جاڭارىپ, تابيعات-انا جاسارىپ, ادامدار ءبىر سەرپىلەدى. وسى كۇنى ورىندالاتىن جاقسى عۇرىپتارىمىز بەن ىرىمدارىمىز, تىلەكتەرىمىز بارشامىزعا بەرەكە, بىرلىك, يگىلىك, ىرىس اكەلسىن. ءاز-ناۋرىز ءار شاڭىراققا قۇت بولىپ ەنسىن» دەدى مەكەمە باسشىسى.
كەشتە استانا قالاسى مادەنيەت باسقارماسىنىڭ باسشىسى بولات ماجاعۇلوۆ ءسوز سويلەدى. «ۇلىستىڭ ۇلى كۇنىندەگى قۋانىش, بەرەكە قازاق حالقىنىڭ ماڭدايىنان ماڭگىگە ورتايماعانىن تىلەيمىن. ويتكەنى, بەرەكە بولعان جەردە بىرلىك بار, بىرلىك بولعان جەردە ىلگەرىلەۋ مەن دامۋ بولادى. بۇگىندە استانانىڭ مادەنيەتى ەلىمىزدىڭ تالاي وڭىرىنە ۇلگى بولىپ كەلە جاتقانىن ايتقىم كەلەدى. وسى مۇراجاي شاڭىراعىنىڭ ءوزى تالاي شارۋانىڭ بەل ورتاسىنان تابىلىپ, يگى ىستەردى اتقارۋدا. وسىنداي شاپاعاتتى شارۋالارىمىز جالعاسىن تابا بەرسە, كوڭىل-كۇيىمىز بەن رۋحاني بايلىعىمىز تومەندەمەك ەمەس» دەدى باسقارما باسشىسى. مەيماندار لەبىزىن م. گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ەركىن قاسەنوۆ جالعاپ, اقجارما تىلەگىن اقتاردى.
مەرەكەلىك كەش استانالىق ونەر ۇجىمدارىنىڭ, كوللەدج, مەكتەپ وقۋشىلارىنىڭ انىمەن, جىرىمەن, بيىمەن, كۇيىمەن ارلەنە ءتۇستى. اسىرەسە, قۋىرشاق تەاترىنىڭ قويىلىمى كوپشىلىكتىڭ قوشەمەتىنە يە بولدى. وندا تۇركى تىلدەس ۇلت وكىلدەرىنىڭ ۇلىستىڭ ۇلى كۇنىن قارسى الۋ سالتتارى كورسەتىلگەن. سودان كەيىن «ناز» مەملەكەتتىك بي ءانسامبلىنىڭ ونەرى كورەرمەن كوڭىلىنەن شىقتى.
سالتاناتتى شارا بارىسىندا «ناۋرىزىم – نۇرلى ىرىسىم» اتتى ناۋرىز كوجە بايقاۋى, ەڭ ءتاتتى ساماۋرىن شايى سايىسى, «كيىم ءپىرى – كيمەشەك» اتتى اجەلەر سىنى, «بۇرىمدى قىز» بايقاۋى, جاس اقىندار ايتىسى, ەڭ ءدامدى باۋىرساق سايىسى, «اتالار ءسوزى – اقىلدىڭ كوزى» اتتى ماقال-ماتەل جارىسى, اسىق اتۋ, ارقان تارتۋ ويىنى, كۇرەس, دويبى باسەكەلەرى ۇيىمداستىرىلدى.
ءار بايقاۋدىڭ جەڭىمپازدارى ارناۋلى ديپلومدارمەن, باعالى سىيلىقتارمەن ماراپاتتالدى.
«مەن استانانىڭ ناۋرىز تويىن كورۋ ءۇشىن وڭتۇستىك وڭىردەن كەلىپ ەدىم. بۇل مەرەكە ماعان قاتتى ۇنادى. اسىرەسە, ءتۇرلى باعىتتاعى جارىستار قىزىق ەكەن. اسىق اتۋدان باعىمدى سىناپ ەدىم, ءبىرىنشى ورىن الدىم. بىراق قول كۇرەسىنەن ەسە جىبەرىپ قويدىم. وسى جەڭىسىمنىڭ ءوزى ۇلكەن قۋانىش» دەيدى باقىتجان سەلەۋسىن ەسىمدى جەتكىنشەك.
اسحات رايقۇل
