«استانا وپەرا» تەاترىنىڭ بيىلعى ماۋسىمىن ەكى بولىمنەن تۇراتىن گالا-كونتسەرت قورىتىندىلايدى. شىلدەنىڭ 16-سى كۇنى ۇلكەن زال ساحناسىندا وتەتىن سالتاناتتى كەش اياسىندا ليۋدۆيگ مينكۋس پەن ەدۋار دەلدەۆەزدىڭ «پاحيتا» بالەتىنەن ايگىلى گران-پانىڭ تۇساۋى كەسىلەدى.
اتالمىش تەاترداعى بالەتتىك ترۋپپانىڭ كوركەمدىك جەتەكشىسى, رەسەي حالىق ءارتىسى التىناي اسىلمۇراتوۆانىڭ بۇل جولعى ديۆەرتيسمەنتىندەگى نەگىزگى رولدەردى قازاقستاننىڭ ەڭبەك سىڭىرگەن ارتىستەرى ءمادينا باسپاەۆا, گاۋھار ۋسينا, جاندوس اۋباكىروۆ, حالىقارالىق بايقاۋلاردىڭ لاۋرەاتى ايگەرىم بەكەتاەۆا, انەل رۇستەموۆا, ەركىن راحمەتوللاەۆ, اسەل قۇسايىنوۆا, اسەل شايكەنوۆا, ەلەنا سەمەنوۆا سومدايدى. قويىلىمنىڭ ديريجەرى – ارمان ورازعاليەۆ.
قويۋشى-بالەتمەيستەردىڭ ايتۋىنشا, «پاحيتا» سپەكتاكلىندەگى مەرەكەلىك گران-پا – ماريۋس پەتيپانىڭ «تريلبي», «كانداۆل پاتشا», قاناتتى ات», «سيلفيدا», ميحايل فوكيننىڭ «ارميدا پاۆيلونى» سەكىلدى ەستى بالەتتەرىنەن تۇراتىن ەڭ تارتىمدى ۆارياتسيالار شەرۋى. وندا ءاربىر سوليسكە كوپشىلىك الدىندا ءوزىنىڭ بارلىق ارتىستىك شەبەرلىگىن پاش ەتۋىنە مۇمكىندىك ۇسىنىلادى. سونىمەن قاتار, سپەكتاكلدەگى يسپان ستيليستيكاسىن ساقتاپ, باسقا بالەتتەردىڭ «پاحيتاداعى» كورىنىستەرمەن ۇيلەسۋىن قاداعالاۋ دا اسا ماڭىزدى.
– تەاتردىڭ ءۇشىنشى ماۋسىمىندا ءبىز ۇلكەن جۇمىس اتقاردىق. ماسەلەن, ليۋدۆيگ مينكۋستىڭ اتاقتى «بايادەركا» سپەكتاكلى قويىلدى, مازمۇندى گالا-بالەت باعدارلاماسى قۇرىلدى. جاقىندا عانا حح عاسىر حورەوگرافياسىنىڭ ۇزدىك تۋىندىسى – رولان پەتيدىڭ «پاريج قۇداي اناسىنىڭ سوبورىن» ۇسىندىق. تەحنيكالىق جاعىنان كۇردەلى بۇل بالەت بىرەگەي ستيلدىك مانەرىمەن ەرەكشەلەنەدى, مۇندا كوردەبالەتكە باسا نازار اۋدارىلعان. ۇلكەن ىزدەنىستىڭ ارقاسىندا الداعى ۋاقىتتا دا ءىرى ناتيجەلەرگە قول جەتكىزەمىز, – دەيدى التىناي اسىلمۇراتوۆا.
گالا-كونتسەرتكە وپەرا سوليستەرى دە, اتاپ ايتساق, قازاقستاننىڭ ەڭبەك سىڭىرگەن قايراتكەرلەرى دينا حامزينا, سالتانات احمەتوۆا, ايگۇل نيازوۆا, مەدەت شوتاباەۆ, سۇندەت بايعوجين, جان ءتاپين, جانات شىبىقپاەۆ, بيبىگۇل جانۇزاق, ارمەنيا حالىق ءارتىسى بارسەگ تۋمانيان, باشقۇرتستاننىڭ ەڭبەك سىڭىرگەن ءارتىسى ءالفيا كارىموۆا, حالىقارالىق بايقاۋلاردىڭ لاۋرەاتتارى جۇپار عابدۋللينا, تالعات عالەەۆ, سالتانات مۇراتبەكوۆا, ايزادا قاپونوۆا, گالينا چەپلاكوۆا قاتىسادى. سونداي-اق, تىڭدارمان «استانا وپەرا» سيمفونيالىق وركەسترى مەن حورىنىڭ ونەرىن تاماشالايدى. كونتسەرتتىڭ ديريجەرى – قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ, ال رەجيسسەرى – ناتاليا كاگادي.
قورىتىندى كەش بارىسىندا تەاتردىڭ جەتەكشى سوليستەرى دجواككينو ءروسسينيدىڭ «سەميراميدا» وپەراسىنان سەميراميدا كاۆاتيناسى مەن اسسۋرا ارياسىن, گاەتانو دونيتسەتتيدىڭ «دون پاسكۋالە» وپەراسىنان نورينا مەن مالەتەستا دۋەتىن, ۆينتسەنسو بەللينيدىڭ «نورما» وپەراسىنان نورمانىڭ ارياسىن, جيۋل ماسسنەنىڭ «مانون» وپەراسىنان مانون گاۆوتى ءتارىزدى وپەرانىڭ الەمدىك جاۋھارلارى سانالاتىن تەڭدەسسىز شىعارمالاردى ورىندايدى. بۇدان بولەك, جۇرتشىلىق ءسۇيىپ تىڭدايتىن «ەركەم-اي» حالىق ءانى, سىدىق مۇحامەدجانوۆتىڭ «ايسۇلۋ» وپەراسىنان سەركەنىڭ كاۆاتيناسى, تولەگەن مۇحامەدجانوۆتىڭ «تۋعان جەر» سياقتى وتاندىق مۋزىكا تۋىندىلارى شىرقالادى.
بوتاگوز ماراتقىزى
