تۇمانباي مولداعاليەۆ – قازاق جىرىنداعى قايتالانباس قۇبىلىس. ول التىن قاناتتى كوبەلەكتەر مەن ءۇنى كوككە كوشەتىن بۇلبۇلدارعا ءتانتى ەدى, كوكتەم كەلسە قۇلپىرىپ سالا بەرەتىن قىرداعى قىزعالداقتار مەن تىنىسىن ءىنجۋ سۇيگەن تولقىندارعا قۇمار-تىن. شيەدەي بوپ كورىنگەن ەرىندەر مەن جىلى شۋاق توگىلگەن جانارلاردىڭ قۇدىرەتىنە باسىن ءيدى, سولاردى ءومىر بويى جىرعا قوستى. سوناۋ ≪قىزىقسىڭ عوي, ستۋدەنتتىك كەزدەر-اي, سىنشىلسىڭ عوي, ءمولدىر قارا كوزدەر-اي!≫ دەپ جىرلاعان ستۋدەنتتىك شاعىنان باستاپ, قازاق ليريكاسىنىڭ كوريفەيىنە اينالعانعا دەيىن تۇمانباي اقىن ءوزىنىڭ ادامدارعا دەگەن ادال ماحابباتىنان اينىعان جوق. اقىن ادامدارعا دەگەن شەكسىز ماحابباتىن جىر تىلىمەن ورنەكتەۋ ءۇشىن ومىرگە كەلگەندەي ەدى. ول قار استىنان دا جاپىراقتىڭ كۇبىرلەگەنىن اقىن جۇرەگىمەن سەزدى, كوكتەمدى كۇتىپ الۋ سالتاناتىنا ەرەكشە دايىندالدى. ونىڭ سەزىمى ءومىردىڭ وزىندەي شىنايى بولسا, مۇڭى دا اياۋلى ەدى. قاراپايىم ەدى. اق تاڭداعى اپپاق گۇلدەر مەن تاڭعى شىقتىڭ تامىپ تۇسكەن اڭسارى الدىمەن تۇمانباي اقىننىڭ جۇرەگىنەن ءوتىپ, قالامىنا ىلىكتى. اسپاندى ارقيلى ەتىپ ادىپتەگەن التىن تۇستەس جۇلدىزدار شوعىرىنىڭ نۇرى الدىمەن اقىننىڭ جانارىندا تۇردى, ءتۇن جارىمىنان اسىپ كۇللى تىرشىلىك قالىڭ ۇيقىعا كەتكەندە ولەڭ عانا كوز ىلمەيتىن. ول بولاشاقپەن ماڭگى جاسايتىن اقىننىڭ ولەڭى ەدى. ≪ال ادامدار كۇلىپ باستاپ ءومىرىن, كەتەرىندە جىلاي دا الماي قالادى≫ دەپ جىرلاعان تۇمانباي اقىن دا ءوتتى دۇنيەدەن. قازاق جىرىنىڭ تۇمانبايسىز قالعانىنا دا جىل تولدى. ءبىر كەزدەرى جاستىقتىڭ جىرشىسى بولعان اياۋلى جازۋشى مۇقان يمانجانوۆ دۇنيەدەن وتكەندە تۇمانباي اقىن ≪ۇستازىم مەن سەنى, كەۋدەمە جەرلەدىم≫ دەپ جىرلادى. تۇمانبايداي تۇنىق اقىنىن قازاق حالقى دا كەۋدەسىنە جەرلەدى, ول ءاردايىم حالىق جادىندا, قازاقپەن بىرگە.
حاميت ەسامان
