استانا كۇنى مەرەكەسىنە وراي «وتانىم – باقىت مەكەنىم» باعدارلاماسى اياسىندا قر حالىق ءارتيسى, مەملەكەتتىك سىيلىقتىڭ يەگەرى, تانىمال بالەتمەيستەر بولات ايۋحانوۆتىڭ «ۇلكەن بالەت كەشى» ءوتتى.
كلاسسيكالىق بي كەشىندە بولات ايۋحانوۆ باسقاراتىن مەملەكەتتىك اكادەميالىق بي تەاترى بىرنەشە بالەت قويىلىمدارىن ساحنالادى. كوپشىلىك نازارىنا «اققۋ كولى», «كارمەن», «ماستەر ي مارگاريتا», «ەۆگەني ونەگين» بالەتتەرى ۇسىنىلدى.
بولات ايۋحانوۆ – الەمگە تانىمال حورەوگراف, حالىق ارتيسى, مەملەكەتتىك سىيلىقتىڭ يەگەرى, مادەنيەت جانە ونەر سالاسىنىڭ حالىقارالىق سوكرات سىيلىعىنىڭ لاۋرەاتى. ول جەتەكشىلىك ەتىپ كەلە جاتقان انسامبل حورەوگرافيالىق ونەردى يگەرۋى جونىنەن الەمدىك بالەت ۇجىمدارىنىڭ ەڭ ۇزدىك وندىعىنا ەنگەن. بۇگىندە بالەت شەبەرى بۇل مەنىڭ ونەرگە دەگەن سۇيىسپەنشىلىگىمنىڭ ناتيجەسى دەپ ەسەپتەيدى. جاقىندا بالەت ترۋپپاسى قازاقستاننىڭ بىرنەشە قالالارىندا بولىپ, ونەر
كورسەتىپ قايتقان ەدى.
بالەت توبى ۇسىنعان جاڭالىقتار استانالىق كورەرمەندەردىڭ دە كوڭىلىنەن شىقتى. ول كۇنى 45 جىلىن ساحناعا ارناعان بولات ايۋحانوۆتىڭ كەشىنە كەلۋشىلەر دە كوپ بولدى. جينالعان جۇرتشىلىق ساحنادان كوز المادى. ارينە, دۇنيەنىڭ سان قيلى ارناسىن ونەردىڭ ەڭ نازىك تە باتىل تۇرىمەن ساباقتاعان ونەرپازعا ءتانتى بولعاندارىن جاسىرمادى.
ءسانى مەن كوركى كەلىسكەن كوستيۋمدەرمەن ەرەكشەلەنىپ, بيىمەن جاندانعان ساحنا وزىندىك سىرعا تولى بولدى. بالەتتى ناقىشىنا كەلتىرە ورىنداعان بيشىلەر دە كورەرمەن كوڭىلىنەن شىقتى. ءبىر سوزبەن ايتقاندا, بالەت الەمنىڭ تۇڭعيىعىنا سۇڭگىدى. وسىنداي ادەمى ۇيلەسىمنىڭ سۇلۋ كورىنىس تاپقانى سونداي ساحنادا كوبەلەكتەر عانا سامعاپ ۇشىپ جۇرگەندەي اسەرگە قالدىردى. «ءوزىمىزدىڭ 45 جىلدىق مەرەيتويىمىزدا ەلىمىزدى عانا ەمەس, الەمنىڭ تۇكپىر-تۇكپىرىندە ونەر كورسەتىپ كەلە جاتىرمىز. ءار قويىلىمدى ۇلكەن تەبىرەنىسپەن ورىندايمىز»,– دەيدى جۇلدىزدى ترۋپپانىڭ بيشىلەرى, ەرەكشە مەرەيلەنىپ.
ەركەجان ساتىمبەك
