بوكستان WSB سەرياسى بويىنشا بولعان «استانا ارلاندارى» جانە «ۋكراينا اتاماندارى» كومانداسى اراسىنداعى فينالدىق باسەكەدە جەرلەستەرىمىز جەڭىسكە جەتىپ, بۇكىلالەمدىك دودانىڭ ءۇشىنشى كەزەڭىنىڭ چەمپيونى اتاندى.
بۇعان دەيىن ەكى رەت جەڭىس تۇعىرىنا ءبىرتابان جاقىنداعانىمىزبەن, التىن بۇيىرماي كەلگەن ەدى. ەسەسىنە قورجىنىمىزدا الەمدىك دودانىڭ ءبىر كۇمىسى جانە ءبىر قولاسى بار. بىراق, ونى مىسە تۇتقىمىز كەلمەدى. بۇل جولى قالاي دا «اتامانداردى» تىزە بۇكتىرىپ, الەمگە «ارلانداردىڭ» تەڭدەسسىز كوماندا ەكەنىن پاش ەتۋ كەرەك بولدى. پاش ەتتىك تە!
جارىس ەكى كۇنگە سوزىلدى. اۋەلدە 10 جۇپ جۇدىرىقتاسادى دەپ جوسپارلانعان. بىراق, ەسەپ 5:5 بولىپ, 11-ءشى جۇپتى شىعارۋعا ءماجبۇر بولدىق. سوڭعى جۇپتىڭ جىرى ءسال كەيىنىرەك. اڭگىمەنى باسىنان باستايىق.
جارىس شىمىلدىعىن 54 كەلى سالماقتا ونەر كورسەتەتىن مەيىربولات تويىتوۆ پەن «اتامان» ۆيكتور گوگولەۆ اشىپ بەردى. ءبىرىنشى كەزدەسۋ ءبىزدىڭ پايدامىزعا شەشىلىپ, مەيىربولاتتىڭ جەڭىسىمەن اياقتالدى. 61 كەلى سالماقتاعى ۋكرايندىق ۆاسيلي لوماچەنكو كەلەسى كەزدەسۋدە-اق ۇپاي سانىن تەڭەستىردى. ءۆاسيليدىڭ قارسىلاسى سامات باشكوۆ بولاتىن. ءۇشىنشى كەزدەسۋدە تارازى باسى قايتا ءبىز جاققا اۋدى. بۇل جولى دنەپر بويىنان كەلگەن لەگيونەرىمىز سەرگەي دەرەۆيانچەنكو كوماندا قورجىنىنا ولجا سالدى. جارتىلاي اۋىر سالماق – 85 كەلىدەگى حرۆوە سەپ تە جەكپە-جەكتى جەڭىسپەن اياقتاپ, باسىمدىلىقتى ارتتىرا ءتۇستى.
ءبىرىنشى كۇننىڭ سوڭعى كەزدەسۋىندە اتاقتى الەكساندر ۋسيك ءبىزدىڭ ميحاي نيستوردان باسىم ءتۇسىپ, جالپى ەسەپ – 3:2-مەن جارىس كۇنى اياقتالدى.
ەكىنشى كۇنگى دودا ءبىرجان جاقىپوۆتىڭ جەڭىسىمەن باستالدى. ول نيكولاي بۋتسەنكودان ايلاسىن اسىرا ءبىلدى. ۋكراينداردىڭ ءۇمىت ارتىپ كەلگەن مىقتىلارىنىڭ ءبىرى دميتري ميتروفانوۆ وزىنەن 7 جاس ۇلكەن ارلاندىق بوكسشى كونستانتين سنيگۋردى اياماي-اق سابادى. ءدميتريدىڭ مىقتىلىعى ءاۋ باستان-اق ءبىلىندى. ودان كەيىن رينگكە شىققان الەكساندر گۆوزديكتىڭ دە ايبىنى استى. الەمگە داڭقى جايىلعان گۆوزديك ءبىزدىڭ ەلدىڭ اتىنان شىققان يحسان ءرۋزباحانيدى ەسىنەن تاندىرا سۇلاتتى. يحساننىڭ باپكەرلەرى الاڭعا ورامال تاستاپ, بوكسشىلارىنىڭ جەڭىلگەندىگىن مويىندادى. جانكۇيەرلەردىڭ ەكى جەڭىلىستەن كەيىن سۋ سەپكەندەي باسىلىپ قالعان كوڭىلىن رۋسلان مىرساتاەۆ ءبىر سەرپىپ تاستادى. بىراق, قارسىلاسى روستيسلاۆ ارحيپەنكو دا وڭاي شاعىلاتىن جاڭعاق ەمەس ەكەن. كوبىنە قورعانىستا ءجۇرىپ, ونەر كورسەتتى. دەگەنمەن, ونىڭ دالدىگى مەن سەزىمتالدىعى باسىم سەكىلدەنە بەردى. سول سەبەپتى دە رۋسلاننىڭ اۋىر سوققىلارى دارىماي, بىرەسە جەلكەسىن جاناي, بىرەسە قۇلاق-شەكەسىنىڭ تۇسىنان ءسۇرىپ ءوتىپ جاتتى. بۇل ۋكرايندىقتىڭ دەر كەزىندە شەگىنە بىلەتىنىن اڭعارتسا كەرەك. جۇدىرىعى اۋا قارماپ قالىپ جاتقانىنا اشۋلاندى ما, رۋسلاننىڭ ءبىر رەت قارسىلاسىن باسپەن قاعىپ قالعانىن دا تورەشى اڭعارىپ, ەسكەرتۋ رەتىندە ءبىر ۇپايىن شەگەرىپ تاستادى. سوڭعى راۋندتا رۋسلان شابۋىلدى ۇدەتە ءتۇسىپ, اقىرى جەڭىسكە جەتتى. جالپى ەسەپ 5:5!
جانكۇيەرلەر دەمىن ىشىنە تارتىپ, كەلەسى بوكسشىمىزعا بار ءۇمىتىن ارتىپ وتىردى. 11 كەزدەسۋ 54 كەلى سالماقتاعى بوكسشىلار اراسىندا ءوربىدى. ەسكەرەتىن نارسە, بۇل سالماقتا قازاقستاندىق بوكسشىلار ەلىمىزدە عانا ەمەس, WSB سەرياسىندا مىقتى سانالادى. بيىلعى ماۋسىمدا 4 مارتە رينگكە شىققان باعدات الىمبەكوۆكە كومانداسىنا جەڭىستى الىپ بەرۋ مىندەتى جۇكتەلدى. باعدات بۇل تاپسىرمانى تاماشا اتقارىپ شىقتى. ا دەگەننەن-اق جۇدىرىقتىڭ استىنا الىپ, ەپتىلىگىمەن, جىلدامدىعىمەن, دالدىگىمەن قارسىلاسىنان الدەقايدا شەبەر ەكەندىگىن اڭعارتتى. داۋسىز, باعدات جەڭدى جانە بۇل جەڭىس ونىڭ كومانداسىنا چەمپيون دەگەن اتاقتى الىپ بەردى.
ەربول جانات
