بۇگىن استانا مەن اقمولا وبلىسىنداعى بالالار ءۇيىنىڭ 300-دەن اسا تاربيەلەنۋشىلەرى «نازارباەۆ ورتالىعىندا» وتكەن مەرەكەلىك كونتسەرتتى تاماشالادى.
قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى ۇيىمداستىرعان شارا 1 ماۋسىم – حالىقارالىق بالالاردى قورعاۋ كۇنىنە ورايلاستىرىلعان. بالدىرعاندارعا ارنالعان باعدارلاما مازمۇنى قىزىققا تولى. اشىق اسپان استىنداعى الاڭدا «شەبەرلەر قالاسى» ورىن تەپكەن. سۋرەت, كيىز, تۆيستينگ, قىش-قۇمىرا, اشەكەي, سابىنشى, face art, تىگىنشىلەر شەبەرحاناسىنىڭ قوناعى بولعان بۇلدىرشىندەر ۇستازداردىڭ نۇسقاۋىمەن قولونەر بۇيىمدارىن جاساۋعا مۇمكىندىك الدى. ال عيمارات ىشىندە بالالاردى كوڭىلدى سايقىمازاقتار مەن مۋلتفيلم كەيىپكەرلەرى قارسى الىپ, تەاترلاندىرىلعان ەتيۋدتەردى كورسەتتى. سونىمەن بىرگە, استانالىق مۋزىكانتتار مەن بي ۇجىمدارى, انيماتورلار مەن تەاتر اكتەرلەرى كىشكەنتايلارعا ونەرىن ارناپ, كوڭىلدى كەشتىڭ كوركىن قىزدىردى.
«استاناعا 80 تاربيەلەنۋشىمىزدى الىپ كەلدىك. تاڭەرتەڭنەن باستاپ بالالار قالانىڭ كورىكتى جەرلەرىندە قىدىردى. «دۋمان» وكەاناريۋمىن ارالادى, «حان شاتىر» ساۋدا ويىن-ساۋىق ورتالىعىنىڭ اتتراكتسيوندارىندا وينادى, جاعاجايىندا شومىلدى. ەندى مىنە, كوڭىلدى كەشتى كورىپ ءماز-مەيرام بولىپ وتىر» دەيدى ەسىل قالالىق №2 بالالار ءۇيىنىڭ تاربيەشىسى سۆەتلانا مازولەۆسكايا.
كونتسەرت سوڭىندا ءار ءبۇلدىرشىن قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورىنىڭ اتىنان MP3-پلەەر, قولساعات سەكىلدى باعالى سىيلىقتارعا كەنەلىپ, «تاتتىلەر فەستيۆالى» اياسىندا داستارقانعا قويىلعان ءدامدى مازىردەن اۋىز ءتيدى.
ءمادينا جاقىپ
