قۇرلىقتىق حوككەي ليگاسىندا ونەر كورسەتەتىن ەلوردالىق «بارىس» جاڭا ماۋسىمعا دايىندىعىن باستادى. كحل چەمپيوناتى 2020 جىلعى 3 قىركۇيەك – 2021 جىلعى 27 اقپان ارالىعىندا وتەتىن بولدى.
COVID-19 جاعدايىنا بايلانىستى كوكتەمدە گاگارين كۋبوگى تۋرنيرىنەن باس تارتقان قازاقستاندىق «بارىس» حوككەي كومانداسىنىڭ 2020-2021 چەمپيوناتىنا قاتىساتىنى ءمالىم ەتىلدى. جاقىندا تاعايىندالعان كوماندانىڭ جاڭا باس باپكەرى يۋري ميحايليس وقۋ-جاتتىعۋ جيىندارىن باستادى. ازىرگە كوماندا ساپىنا قازاقستاندىق حوككەيشىلەر عانا جينالدى. لەگيونەر ويىنشىلار شاقىرۋ بويىنشا كەلەتىن بولادى.
ءبىر ايتارلىعى, «بارىس» كومانداسىنىڭ ءوز الاڭىنداعى ويىنداردى قايدا وتكىزەتىنى ءالى بەلگىسىز بولىپ وتىر. ويتكەنى قازاقستانداعى كوروناۆيرۋس جاعدايى كحل باسشىلىعىن الاڭداتىپ وتىرعان كورىنەدى. وسى جاعدايعا بايلانىستى بىرقاتار رەسەيلىك قالالاردان «بارىسقا» ارەنا بەرۋ جونىندە ۇسىنىستار دا ءتۇسىپ وتىر. بۇل جاعداي قازاقستاندىق جانكۇيەرلەردى دە الاڭداتىپ وتىرعانى ءسوزسىز.
«بارىس» چەمپيوناتتىڭ العاشقى ويىنىن 3 قىركۇيەكتە ريگادا جەرگىلىكتى «دينامو» كومانداسىمەن وتكىزسە, كەلەسى ويىندى ءوز الاڭىندا قىتايدىڭ «كۋنلۋن» كومانداسىمەن وتكىزۋگە ءتيىس. ال ورىن الىپ وتىرعان جاعدايعا بايلانىستى بۇل ماتچتىڭ قايدا وتەتىنىن كەيىن حابارلايتىن بولامىز.
