شۆەيتساريانىڭ نون قالاسىندا فۋتبولدان UEFA چەمپيوندار ليگاسى 2020/2021 جىلعى كەزەڭىنىڭ ءبىرىنشى ىرىكتەۋ ساتىسىنىڭ جەرەبەسى تارتىلدى.
ەلىمىزدىڭ 6 دۇركىن چەمپيونى «استانا» كومانداسى ءبىرىنشى كەزەڭدە بەلارۋستىڭ «دينامو» (برەست) كومانداسىمەن كەزدەسەتىن بولدى. العاشقى ويىندار 18 جانە 19 تامىز كۇندەرى وتەدى. «استانا» ءبىرىنشى ويىندى سىرت الاڭدا باستايدى.
COVID جاعدايىنا بايلانىستى تۋرنير ەرەجەسىندە بىرقاتار وزگەرىستەر بولدى. اتاپ ايتقاندا, جارىستىڭ ءبىرىنشى ساتىسىنداعى جەڭىمپاز ءبىر ويىن ارقىلى انىقتالادى. جەڭگەن كوماندا بىردەن چەمپيوندار ليگاسىنىڭ ەكىنشى ساتىسىنا شىعادى. ال جەڭىلگەن كوماندا ەۋروپا ليگاسىنىڭ ەكىنشىسى ساتىسىندا قوسىلادى.
«استانا» بيىل التىنشى رەت قاتارىنان چەمپيوندار ليگاسىنىڭ ىرىكتەۋ كەزەڭىندە سىنعا تۇسەدى. وسى ارالىقتا ەلوردالىق كوماندا 2015/2016 جىلعى كەزەڭدە ەۋروپانىڭ كلۋبتىق ەڭ ءىرى ءتۋرنيرىنىڭ توپتىق كەزەڭىندە ونەر كورسەتتى. ءبىر مارتە پلەي-وفف كەزەڭىنە دەيىن جەتكەن. ەۋروپا ليگاسىنىڭ توپتىق ىرىكتەۋ كەزەڭىندە دە ەل نامىسىن ءساتتى قورعاي ءبىلدى. 2016/2017 جىلعى كەزەڭدە جارىستىڭ 1/16 فينالىنا شىققان ەدى.
ال «استانانىڭ» جاڭا ماۋسىمداعى ءبىرىنشى قارسىلاسى «دينامو» (برەست) كومانداسى 1960 جىلى قۇرىلعان. 1992 جىلى ءوز ەلىنىڭ چەمپيوناتىندا قولا جۇلدەگەر اتانسا, وتكەن جىلى تۇڭعىش رەت بەلارۋس چەمپيونى اتانعان.
كەشە ەۋروپا ليگاسىنىڭ بيىلعى ىرىكتەۋ كەزەڭىنىڭ دە جەرەبەسى تارتىلدى. ۋەفا-نىڭ ەكىنشى دەڭگەيلى تۋرنيرىندە الماتىنىڭ «قايراتى» ارمەنيانىڭ «نوا» كومانداسىمەن كەزدەسەتىن بولدى. شىمكەنتتىڭ «ورداباسى» رۋمىنيانىڭ «بوتوشاني» كلۋبىمەن وينايدى. ەكى ماتچ تا قازاقستاندا وتەدى. ال قىزىلوردانىڭ «قايسار» كومانداسى ەۋروكۋبوكتى ەكىنشى ىرىكتەۋ ساتىسىنان باستايدى.
بيىل ەۋروپا ليگاسىنىڭ ىرىكتەۋ كەزەڭىندە دە جەڭىمپاز كوماندانىڭ تاعدىرى ءبىر ويىننىڭ ناتيجەسىمەن شەشىلەدى. تەڭ ناتيجە تىركەلگەن جاعدايدا ءتۋرنيردىڭ كەلەسى ساتىسىنا وتەتىن كوماندا قوسىمشا تايم نەمەسە پەنالتي سەرياسى ارقىلى انىقتالاتىن بولادى.
