اۆتوبۋس بوگەنباي داڭعىلىمەن جۇيتكىپ كەلەدى. سارىارقا داڭعىلىنىڭ قيىلىسىنا جەتە بەرگەنى سول, الدىڭعى ورىندىققا جايعاسقان كىشكەنتاي بالا اكەسىنە قاراپ شاڭق ەتە قالدى:
–اكە, مىناۋ بوگەنباي باتىر ەمەس پە؟!
ء–يا, بالام.
–سوندا اناۋ ارتىندا تۇرعان دۇكەندى ول قايدان بىلەدى؟
–جوع-ا-ا, بىلمەيدى. ول جوڭعار شاپقىنشىلىعى كەزىندە ءومىر سۇرگەن عوي.
–جوق, بىلەدى. مەن ءبىلىپ تۇرمىن. انە, قاراڭىزشى, « 5 مينۋت» دەپ كورسەتىپ تۇر ءوزى.
ەلدىڭ ءبارى كىشكەنتاي بالا نۇسقاعان جاققا قارادى. راسىندا, بوگەنباي باتىرىمىز ء(مۇسىن) بەس ساۋساعىن بارىنشا تاربيتا اشىپ تۇر. ال, ءدال ارت جاعىندا قاق ماڭدايشاسىندا ۇلكەن قىزىل ارىپتەرمەن جازىلعان «5 مينۋت» امبەباپ دۇكەنى مەن مۇندالايدى.
اكەسى بالاسىنا جاۋاپ بەرمەدى.
P.S «ەندى جەتپەگەنى – ەل نامىسىنا تۇتقا بولعان باتىرىمىزدى جارناماعا ارالاستىرۋ ەدى…» دەگەن كۇيى ايالدامادان ءتۇسىپ بارا جاتتىق.
قازاق پەن مازاق
استانا قالاسىندا بىلدەي بانكتىڭ فيليالىن باسقارىپ وتىرعان ازاماتتىڭ ءبىراۋىز پىكىرى قاجەت بولدى.
تەلەفوندى العان بويدا الگى اعامىز قازاقشا جاۋاپ بەرۋگە قينالاتىنىن جەتكىزدى. قازاق گازەتىنەن ەكەنىمدى ايتىپ ەدىم, «وقاسى جوق, مەن قازىر تۇتقانى اۋدارماشىعا بەرەمىن» دەدى. مەن ساۋالىمدى قويدىم. تۇتقانىڭ ار جاعىنداعى قازاق قىز ءاربىر ءسوزىمدى تاقىلداپ باستىعىنا اۋدارىپ بەردى. ول كىسى جاۋابىن ايتتى. كەلىسىپ العانداي, اۋدارماشى قازاق تىلىندە ماعان قايتالادى. ەكىنشى ساۋالدىڭ دا جاۋابى وسىلاي الىندى. ءبىر پىكىردى الۋعا, ءبىر ساعات ۋاقىت كەتتى. ءوزى دە شارشاعان بولۋ كەرەك, تۇتقانىڭ ار جاعىنان «ورىسشا بىلمەيتىن قانداي جۋرناليست» دەپ قويىپ قالدى. مەزى بولعان مەن دە تارجىماشىدەن تەلەفوندى باستىعىنا بەرۋىن سۇرادىم. العان بويدا, «پوزور, ەسلي كازاح س كازاحوم وبششايۋتسيا چەرەز پەرەۆودچيكا» دەدىم. ول ءۋاج ايتپادى. ەڭ باستىسى, ءتۇسىندى. تۇتقانى تاستاي سالدى.
گۇلميرا ايماعانبەت
