ءا دەگەننەن-اق ءوزىڭدى باۋراپ اكەتەتىن جىلى شىرايلى ادامدار بولادى. قازاقتىڭ كەلىنى, نەمىس قىزى اننا جاناحمەتوۆا – سونداي جانداردىڭ ءبىرى. كوزىنەن مەيىرىم شۋاعى توگىلىپ, اۋزىنان «اينالايىن» دەگەن ادەمى ءسوزىن تاستامايتىن ول – شىنىمەن دە استانالىق جاناحمەتوۆتەر وتباسىنىڭ ۇيىتقىسى, بەس بالا ءوسىرىپ, ون ەكى نەمەرە ءسۇيىپ وتىرعان ارداقتى انا, ەلىمىزدىڭ وقۋ-اعارتۋ سالاسىندا ۇزاق جىلدار جۇمىس ىستەپ, «ءبىلىم بەرۋ ءىسىنىڭ ۇزدىگى» اتانعان بولات جاناحمەتوۆتىڭ اسىل جارى.
بولات اشۋباسارۇلى مەن اننا حريستيانقىزىنىڭ شاڭىراق كوتەرىپ, ءومىر ايدىنىندا قول ۇستاسىپ جۇرگەنىنە وتىز سەگىز جىل بولىپتى. ءبىر-ءبىرىنىڭ سىرىن قاباعىنان تۇسىنەتىن جۇبايلار بەس بالاسىنا دا ادامگەرشىلىك پەن يناباتتىلىق قاسيەتتەرىن ءسىڭىرىپ ءوسىردى.
بولات جاناحمەتوۆتىڭ ءوزى قىرىق جەتى جىل بويى مۇعالىم بولىپ جۇمىس ىستەسە, سونىڭ قىرىق ەكى جىلى استانا قالاسى گۋمانيتارلىق كوللەدجى قابىرعاسىندا ءوتىپتى. ۇزاق جىلدار بويى تالاي كاسىبي مامان تاربيەلەپ شىعارعان وتاعاسىنىڭ تالىمگەرلىك تاجىربيەسى وتە مول. ءوزى ءبىلىم بەرۋ ءىسىنىڭ ۇزدىگى ءارى قۇرمەتتى قىزمەتكەرى. مەملەكەت تاراپىنان العان العىس حات, ديپلومدارىنىڭ ءوزى – ءبىر توبە.
ال, جاستايىنان قازاقى تاربيەنىڭ قاينارىنان ءنار الىپ وسكەن اننا حريستيانقىزىن تۋعان-تۋىستارى, ارىپتەستەرى «ايناش, اينەكە» دەپ ەركەلەتەدى. «قىز قىلىعىمەن» دەگەندەي, ول كىشكەنتايىنان ءوزى تۋىپ-وسكەن اقمولا وبلىسىنىڭ قورعالجىن اۋدانىنداعى سارىوزەن اۋىلىنا قادىرلى بولاتىن. بيازى مىنەزدى, ءۇي شارۋاسىنا پىسىق, ءوزى قازاقشاعا سۋداي شىناشاقتاي نەمىس قىزىن سول كەزدە كەلىن قىلامىن دەۋشىلەر كوپ بولدى. قازاقى ورتادا وسكەندىكتەن بە, اننا تەك قازاق جىگىتىنە تۇرمىسقا شىعۋدى وزىنە ماقسات ەتىپ قويدى. ءسويتىپ, قازاقتىڭ بولاتتاي اتپال ازاماتىنىڭ ەتەگىنەن ۇستادى. كەلىن بولىپ تۇسكەن بوساعاسىنا تاستاي باتىپ, سۋداي ءسىڭدى. ۇلكەننىڭ الدىنان كەسە-كولدەنەڭ وتپەيتىن كىشىپەيىل ءارى شارۋاقور كەلىنىنە ەنەسى دە ريزا بولىپ, «ايناشىم» دەپ ەرەكەلەتتى. كەيىن اتا-ەنەسى قايتىس بولعاندا بولات ءوزىنىڭ ءۇش قارىنداسىنا اكە ورنىنا اكە بولسا, اننا شەشە ورنىنا شەشە بولا ءبىلدى.
اننا حريستيانقىزى ءوزىنىڭ بويىنداعى شارۋاقورلىقتى, ىسكەرلىكتى, ادامگەرشىلىكتى قىزدارىنا دا ۇيرەتتى. بۇگىندە ۇلكەن قىزى ايگۇل – استاناداعى №3 مۋزىكا مەكتەبىنىڭ وقىتۋشىسى. ءوزى كاسىبي دومبىراشى, ءتورت بالانىڭ اناسى. ءبىر جىلدىڭ ىشىندە ەلۋ گراموتا مەن العىس حاتقا يە بولعان مىقتى قىز – وسى.
ەكىنشىسى بيبىگۇل – «قارجى ورتالىعى» اق-نىڭ مەنەدجەرى. بۇگىندە ءۇش بالا تاربيەلەپ وتىر.
ال, ورتانشىسى الماگۇل – «قۇلاگەر–دامحيس» جشس ديرەكتورى بولسا, كەنجە قىزى اسەمگۇل – «تەمير مونتاج LTD» جشس-نىڭ بۋحگالتەرى. قىزداردىڭ ءبارى دە ءبىر-ءبىر ءۇيدىڭ ۇيىتقىسى.
جاناحمەتوۆتەر جانۇياسىنىڭشاڭىراق يەسى نۇرسۇلتان –پوليتەحنيكالىق كوللەدجدىڭ ستۋدەنتى. وسى بالاسىن قىزدارىنان سوڭ ون ەكى جىلدان كەيىن تۋعان اننا حريستيانقىزى: «ءبىزدىڭ وتاعاسى اكەسىنەن ءتورت ۇل ەدى. بىراق ۇشەۋى قايتىس بولدى. قايىن ءىنىم دۇنيەدەن وزىپ, بولات اكەدەن جالعىز تۇياق بولىپ قالعاننان كەيىن ءبىر ۇل بەرۋدى اللادان كۇندىز-ءتۇنى تىلەدىم. قۇدايعا مىڭ دا ءبىر شۇكىر, دۇنيەگە وسى اتۇستارىمىز كەلدى», – دەيدى.
اننا حريستيانقىزى اللانى اۋزىنان تاستاعان ەمەس. ون التى جىلدان بەرى ورازا ۇستاپ كەلەدى ەكەن. بالالارى دا ءار جۇما سايىن جەتى شەلپەك ءپىسىرىپ, مەشىتكە بارۋدى داستۇرگە اينالدىرعان. ەلورداداعى №18 «اياجان» بالاباقشاسىندا جيىرما جىل تاربيەشى, سوڭعى ون بەس جىل بويى مەڭگەرۋشى بولىپ كەلە جاتقان اننا جاناحمەتوۆا زەينەتكەرلىككە شىققاننان كەيىن نامازعا جىعىلامىن دەپ وتىر. ايتپاقشى, كەزىندە ورىس بالاباقشاسى بولعان مەكەمەنى تازا مەملەكەتتىك تىلدەگى مەكەمە ەتكەن وسى اننا حريستيانقىزى ەكەنىن دە ايتپاي كەتۋگە بولماس.
ەشكىمنىڭ الا ءجىبىن اتتاماۋدى ادامگەرشىلىكتىڭ باستى قاعيداسى ەتكەن جاناحمەتوۆتەر وتباسى – ناعىز بەرەكە مەن بىرلىك ۇيالاعان مەرەيلى شاڭىراق. ادام قانداي دا ءبىر جەتىستىككە جەتكىسى كەلسە, ونىڭ ءتۇپ-تامىرىندا ادامي تاربيە مەن قاجىرلى ەڭبەك جاتاتىنىنا وسى وتباسى ايقىن مىسال بولا الادى.
قىمبات توقتامۇرات
