ەلەنا ابدىحالىقوۆا
كۇلشى, جانىم!
كۇلشى, جانىم!
تاراسىن ءون-بويىما نۇر-شۋاعىڭ!
تاعدىرىم اشىلسىنشى الدى تۇمان,
اداسىپ مۇڭ-سىڭارىم!
كۇلشى, جانىم!
مۇڭ جەڭگەن باس كوتەرسىن سىرشىل ارىن,
جارىعىڭ سەلت ەتكىزسىن قايعى دەيتىن
جانىمنىڭ جەگى بولعان سىنشىلارىن.
كۇلشى, جانىم!
مەن ەندى شاتتانۋعا ۇمسىنامىن!
نۇرلانا تۇسەدى ءومىر, سەن كۇلگەندە
شىعادى ۇياسىنان قىمسىنا كۇن.
كۇلشى, جانىم!
كۇلمەسەڭ, ءومىر ايتىپ قىرسىق ءانىن,
جانىمدى قوياتۇعىن جەر تابا الماي,
وزىمنەن ءوزىم قايتا تۇنشىعامىن.
كۇل, جانىم,
سۋسادى كۇن, تاقىر – دالا
شاتتانۋ كەرەك كەيدە اقىلعا دا!
جىلاۋىق تاعدىرىمنىڭ جالعىز ەمى –
سەنىڭ ءبىر جارقىن كۇلكى ءساتىڭ عانا!
مارجان ەرشۋ
كوڭىلگە شۋاق كەلدى
كوكتەم كەلدى!
كوكتەممەنەن كوڭىلگە شۋاق كەلدى,
كوگەرەدى, وسەدى قىرات تا ەندى.
و, ناۋرىز! ىرىزدىقتى بەرەكەڭمەن
كوڭىلدەردى كوتەرىپ, قۋانت ەلدى.
العىس كۇنى! اياۋلى سەزىم كۇنى!
اقجۇرەك قۋانىشتىڭ سەزىلدى ءۇنى.
العىس الۋ ەلىڭنەن قانداي باقىت!
جۇرەگىڭمەن, جانىڭمەن سەزىن مۇنى.
و, جاقسىلار! جايساڭدار! ارمىسىڭدار!
بيىك بوپ كورىنبەي مە قارلى شىڭدار؟!
سىزدەردەي دانا كوڭىل ادامدارعا
مەنىڭ دە جۇرەكجاردى العىسىم بار.
تولقىن قابىلشا
جان جۇرەگىم
يەسى بولماساڭ دا بەسىگىمنىڭ,
كيەسى بولماساڭ دا ەسىگىمنىڭ,
ادالدىقتىڭ ەنشىسى سەكىلدەنگەن,
ءار ءارپى ىزگىلىك قوي ەسىمىڭنىڭ!
كوكجيەكتەن قارايتىن كۇن كوزىندەي,
سەن تاعى كۇلىپ تۇرسىڭ, كەشىرىمدىم!
سەن تاعى كۇلىپ تۇرسىڭ, جان-جۇرەگىم!
جان-جۇرەگىم!
سەن نەتكەن تاعدىر ەدىڭ؟!
مەنى مۇڭايماسىن دەپ كۇن كەشەتىن,
سەنىڭ ناركەستىگىڭدە بار تىلەگىم.
مەن وزىڭمەن بيىكپىن, اسپان تەكتەس,
سەن جاڭبىرسىڭ,
سۇيەتىن جاندى كەرىم.
ۇعىندىرعان ەڭ سۇلۋ ار قادىرىن,
ۇعىندىرعان ەڭ تۇنىق جان قادىرىن.
جاراتقانىم سەكىلدى تىم كىناسىز,
سەن ولەڭسىڭ,
سىيلايتىن جانعا تىنىم.
ارمانىمنىڭ الاۋى سەكىلدەنگەن,
سەن بار جەردە ءۇمىت بار,
جاپ-جارىعىم!
ايزادا راحىمجانوۆا
بىزدە, جانىم, ءبارى دە بار…
بىزدە, جانىم, ءبارى دە بار…
سەزىم جوق,
بولسا, نەگە لاۋلامايدى كوزىڭدە وت؟!
بولسا, نەگە ساعىنبايسىڭ ۇزدىگىپ؟
مەن بە؟ مەنىڭ ساعىنبايتىن كەزىم جوق.
ءبىز وتكەرگەن مەزگىلدەر بار,
كوكتەم جوق…
جانىممەنەن قاراشانى وپكەم كوپ.
ەكى بىردەي اقىماقتى ۇعا الماي,
جاڭبىرىمەن جانار جاسىن توككەن كوك.
بىزدە, جانىم, ءبارى دە بار…
جوق باقىت…
ماحاببات جوق, ودان وزگە قوسپا تۇك.
جۇرەك قۇرعىر اتقاقتايدى, رۇقسات ەت,
قويايىنشى توقتاتىپ…
سەن دە ءۇنسىز كۇتىپ ءجۇرسىڭ كوكتەمدى,
اسىقپايدى ول, بىلتىر دا
ءوستىپ كەش كەلدى.
وتكەنىڭنىڭ ەڭ باقىتتى ساتىنەن,
وكىنىشتى, قالمايتىنى ەش بەلگى…
ماxابباتتى جۇرت بولماعان
دەسىپ ءجۇر,
اق سەزىمگە تەڭ كەلمەيدى ەش ءۇلبىر.
اسقاق-اسقاق ارمانىمىز اسپاندا,
بۇيرا-بۇيرا بۇلتپەن بىرگە كوشىپ ءجۇر.
جانىمىزعا بۇگىپ كەلگەن سىر نەتكەن؟
مەن دە ونى ساعىنىپ ەم, بىلمەپ پە ەڭ؟
ەڭ جاۋاپسىز سەزىمدەرگە جانى اشىپ,
قار استىندا تىنىستايدى گۇل-كوكتەم!
ر.S.
ءبىر عاجاپتى كۇتەمىز-اۋ كوكتەمنەن,
اسىقپايدى ول, بىلتىر دا ءوستىپ كەش كەلگەن…
ماقپال مىسا
استانا ءتۇنى
ءتۇن.
استانا.
ويلارىمنىڭ ەگەسى,
وزگە ەمەس, ءتيدى وزىمە جەبەسى.
…مىڭجىلدىقتار!
سەندەرمەنەن ورلەيدى
ءتۇبى كەمەل كەلەشەكتىڭ كەمەسى!
داقپىرتى كوپ داۋىرلەردىڭ
كوشىندە,
بەۋ, سارىارقا!
ءبارى سەنىڭ ەسىڭدە.
شەر توگەيىن…
ولەڭىممەن وبەكتەپ
ەركەلەيىن ەل قوندىرعان ەسىلگە!
مىنا ءتۇننىڭ مويىل قارا كوزدەرى
العاش سەنى كورگەنىمدە وزگە ەدى.
وڭمەنىمنەن وتكەن جەلىڭ جەل ەمەس,
ورەسىزدىڭ وكتەم سۋىق سوزدەرى.
ءتۇن.
استانا.
كەرۋەندى كوش پە ەدى,
بار عالامنىڭ جانسا شىركىن
وشكەنى…
باتىرارىن ەندى ۇعىندىم سان ويعا
جاپىراعىن جەل ۇشىرعان كەشتەرى.
كەدەرگىگە تاپ بولسا دا ءۇش اتتاپ,
اقىنداردىڭ بولادى ەكەن ءتۇسى اپپاق,
ءتۇن.
استانا.
اق دۇنيەدە كوز ءىلدىم,
اپپاق-اپپاق ارمانداردى قۇشاقتاپ…
جۇلدىزاي ىسقاق
مەن جۇرەك ەم
قيال دەگەن ۇستاتپاي ما قۋعانعا,
ارمان دەگەن جەتكىزبەي مە القىنسام.
بۇل ومىردە «مەن ىشپەگەن ۋ بار ما؟»
توقتاپ بارىپ, قايتا سوقتىم بالكىم سان.
مەن جۇرەكپىن,
ءيا, قىرىق جاماۋمىن.
ءلۇپىلىمدى تابىلار ما جان تىڭدار؟!
سۇمعا جاۋمىن, ال سۇيگەنگە-ادالمىن!
گۇلدەن نازىك, تاستان بەرىك قالپىم بار.
مەن جۇرەك ەم, جاراتىلعان ولەڭنەن,
بۇلقىنامىن كەۋدەسىندە ءومىردىڭ.
جىلى الاقان ىزدەستىرىپ كەلەم مەن,
كورسەتەدى جولىن كىم؟!
الما تۇسىپبەكوۆا
ءبىر كۇنى…
مەن باقىتتى بولا سالام ءبىر كۇنى…
گۇلنار سالىقباي
جۇرەگىمە جۇك ارتسا دا جىر قۇنى,
ساعىنامىن سول شىنايى كۇلكىنى.
…ادالدىق كەپ اق جۇزىمنەن سۇيگەندە,
مەن باقىتتى بولا سالام ءبىر كۇنى.
تاعدىر تاعى تاپانشاسىن تۇر كەزەپ,
جالعان ءومىر, جالىن اتقان جىرعا وزەك.
ىزگىلىك كەپ يىلگەندە الدىما,
مەن باقىتتى بولا سالام ءبىر مەزەت.
سەزىمىمە سىي بوپ جەتكەن نۇر-كوكتەم, و, كەرەمەت!
نۇر سورعالاپ تۇر كوكتەن.
اق بۇلاق بوپ اعىپ جاتسا اق پەيىل,
مەن باقىتتى بولا سالام ءبىر ساتتە.
تەرىستىككە كەتپەگەن سوڭ مۇڭ اۋىپ,
مىنا اسپان دا كوڭىلشەكتەۋ, جىلاۋىق.
اق دۇنيە اق ساعىمعا مالىنسا,
مەن باقىتتى بولا سالام ءبىر اۋىق.
قويسا دا ءومىر قادامىمدى تار تۇساپ,
ماعان جايار ىزگىلىك پەن ار قۇشاق.
جاقسى ادامدار جارقىلداپ ءبىر كۇلگەندە,
مەن باقىتتى بولا سالام جالقى ءسات.
اتارى انىق الدىمىزدان تاڭ كۇلە,
بىزدەر جايلى ايتسا دا جۇرت اڭگىمە.
ء…وزىڭ كەلىپ وپكەن ساتتە ماڭدايدان,
مەن باقىتتى بولا سالام ماڭگىگە!..
دينارا مالىكوۆا
ءومىر مىناۋ ءبىر سىناق
كوكتەم كەپتى مەنسىز-اق,
كوكتەم كەلدى سەنسىز-اق.
قىستىڭ قالدى قىراۋى,
كوڭىلىمدە ءبىر سۇراق.
جەرىپ كەتسەڭ ۇندەمە,
كۇرسىنىپ-اپ ءجۇر دەمە.
قۋانۋدى ۇيرەندىم,
سەن بولماعان كۇندە دە.
سۇيمەي كەتسەڭ اقتالما,
(بۇل سەزىمگە سوت بار ما؟)
ءومىر ءسۇرىپ جۇرەسىڭ,
جولدانباعان حاتتاردا.
گۇل تاقپاي-اق شاشىما,
كوكتەم كەلدى اسىعا.
ۇيىقتاپ قالعىم كەلەدى,
ۇيىقتاماي-اق قاسىڭا.
ءومىر مىناۋ ءبىر سىناق,
جانىم قالاي تىنشىماق؟
كۇلىپ قويىپ جۇرەمىن,
كوز جاسىمدى ءسۇرتىپ اپ.
