بيىلعى بيۋدجەت قايتا قارالدى
جىل سوڭى تايانعاندا ەلوردا بيۋدجەتىنە وزگەرىس ەنگىزىلدى. كەشە ءماسليحاتتىڭ كەزەكتەن تىس ونىنشى سەسسياسىندا دەپۋتاتتار باس قالانىڭ قارجىلىق احۋالىن پىسىقتاپ, اۋەلگى جوسپارعا ءبىرشاما وزگەرىستەر مەن تولىقتىرۋلار ەنگىزدى. استانانىڭ اميانىنداعى اقشا ءسوز بولعان جيىنعا دەپۋتاتتارمەن بىرگە قالا اكىمىنىڭ ءبىرىنشى ورىنباسارى سەرگەي حوروشۋن قاتىستى.
دەپۋتاتتاردىڭ كەزەكتەن تىس سەسسياعا جينالۋىنا تۇرتكى بولعان دا وسى بيۋدجەت ماسەلەسى. ناقتى ايتساق, جاقىندا قر «2012-2014 جىلدارعا ارنالعان رەسپۋبليكالىق بيۋدجەت» تۋرالى زاڭىنا وزگەرىستەر مەن تولىقتىرۋلار ەنگىزىلدى. بيۋدجەت جوباسى ناقتىلانىپ, ناتيجەسىندە استانا قالاسىنىڭ بيۋدجەتىنە رەسپۋبليكالىق بيۋدجەتتەن 15 384 060 مىڭ تەڭگە ترانسفەرتتەر ءبولۋ قاراستىرىلعان. سونداي-اق, قايتا ءبولۋ ەسەبىنەن جالپى سوماسى 5 595 564 تەڭگە ترانسفەرت قىسقارتىلدى.
– بۇدان بولەك, بيۋدجەتتىڭ بۇل ناقتىلانۋىندا استانا قالاسى بيۋدجەتىنىڭ كىرىس بولىگىن كوبەيتۋ مەن جۇرگىزىلگەن مونيتورينگ نەگىزىندە جەكەلەگەن بيۋدجەتتىك باعدارلامالاردىڭ قارجىسىن قايتا قاراستىرۋ كوزدەلىپ وتىر. اتالعان قارجىنى ەلوردانىڭ دامۋى مەن كەزەك كۇتتىرمەيتىن الەۋمەتتىك ماسەلەلەردى شەشۋگە باعىتتاۋدى ۇسىنامىز, – دەدى ەكونوميكا جانە بيۋدجەتتىك جوسپارلاۋ باسقارماسىنىڭ باستىعى جانات نۇرپەيىسوۆ.
قاڭتار جانە قازان ايلارىندا قالا بيۋدجەتىنىڭ وزىندىك كىرىسى 108 پايىزعا ورىندالعان. اۋەلگى جوسپاردا 73 205,7 ملن تەڭگە بولادى دەپ بولجانعان-دى. بۇگىنگى كورسەتكىش 79 036,1 ملن تەڭگەنى كورسەتىپ وتىر.
جوسپاردىڭ ارتىعىمەن ورىندالۋىن سالىقتان تۇسكەن ءتۇسىم (4 608,6 ملن تەڭگە) قۇراپ وتىر. وسىنى نەگىزگە العان جانات نۇرپەيىسوۆ كىرىس بولىگىنىڭ جىلدىق جوسپارىن 5 631,7 ملن تەڭگەگە ۇلعايتۋدى ۇسىندى. سونىڭ ىشىندە 2 479,4 ملن تەڭگە سالىقتىق, 3 152,3 ملن تەڭگە سالىقتىق ەمەس تۇسىمدەر قۇراماق. كۇنى بۇرىن بۇل ماسەلەنى كوميسسيادا ەگجەي-تەگجەي تالقىلاعان دەپۋتاتتار باسقارما باستىعىنىڭ ۇسىنىسىن قوس قولىن كوتەرمەسە دە بىردەن قولدادى.
سەسسياداعى تالقىلانعان تاعى ءبىر ماڭىزدى جاڭالىق – الداعى مەرەكەمەن بايلانىستى. 1 جەلتوقسان كۇنى ەلىمىزدە ءبىرىنشى رەت قازاقستان رەسپۋبليكاسىنىڭ تۇڭعىش پرەزيدەنتىنىڭ كۇنى تويلاناتىنى بارشامىزعا بەلگىلى. وسىعان وراي, حالىقتىڭ الەۋمەتتىك تۇرعىدا از قامتىلعان توبىنا ءبىر رەتتىك الەۋمەتتىك جاردەماقى كورسەتىلمەك. مۇقتاج ازاماتتارعا قانداي كومەك جانە قالاي كورسەتىلەتىنى تۋرالى جۇمىسپەن قامتۋ جانە الەۋمەتتىك باعدارلامالار باسقارماسى باستىعىنىڭ ورىنباسارى ءلاززات ابەۋوۆا باياندادى. ۇلى وتان سوعىسىنىڭ ارداگەرلەرىنە 20 مىڭ, ۇوس ارداگەرلەرىنە تەڭەستىرىلگەن, اۋعانستان سوعىسىنىڭ ارداگەرلەرىنە, سوعىس ارداگەرلەرىنىڭ جەسىرلەرىنە 10 مىڭ تەڭگە كولەمىندە كومەك كورسەتىلمەك. سونىمەن بىرگە مۇنداي كومەكپەن جەتىمدەر مەن كوپبالالى وتباسىلار دا قامتىلادى. بۇل ماقساتقا جەرگىلىكتى بيۋدجەتتەن 125 ملن تەڭگە كوزدەلىپ وتىر. دەپۋتاتتار بۇل ۇسىنىستى دا ءبىراۋىزدان قولدادى.