«قازاقستان-2050» ستراتەگياسى ارقىلى ايقىندالعان جاڭا الەۋمەتتىك ساياساتتى جۇزەگە اسىرۋ ءۇشىن بيىلعى «مەكتەپكە جول» اكتسياسى «بولاشاققا بىرگە بارامىز» اتتى ۇرانمەن وتەتىن بولدى.
ماڭىزدى ماۋسىمدى ەلىمىز بويىنشا وقۋشىلاردىڭ مەكتەپكە بارۋىن تولىق قامتاماسىز ەتۋ تۋرالى مەملەكەت باسشىسىنىڭ تاپسىرماسىن ورىنداۋ ماقساتىندا استانا قالالىق ءبىلىم باسقارماسى باستاپ كەتتى. «بايتەرەك» حالىقارالىق مەديا-ورتالىعىندا وتكەن ءباسپاسوز ءماسليحاتىندا باسقارما باسشىسى ءاسيما بيمەندينا مەن بالالاردىڭ قۇقىقتارىن قورعاۋ جونىندەگى باسقارما باسشىسى ريمما يمانعازينوۆا الدىمەن مەكتەپكە بارا الماي جۇرگەن بالالاردى انىقتاپ, ولارعا كوبىرەك كوڭىل بولەتىندىكتەرىن ايتتى.
شارانىڭ ماقساتى – جاڭا وقۋ جىلىنا دايىندىق كەزىندە تابىسى تومەن جانە كوپ بالالى وتباسىنان شىققان مەكتەپ وقۋشىلارىنا, جەتىم بالالار مەن اتا-اناسىنىڭ قامقورلىعىنسىز قالعاندارعا قولداۋ كورسەتۋ.
«قايتا قۇرىلعان استانا قالالىق بالالاردىڭ قۇقىقتارىن قورعاۋ جونىندەگى باسقارما 36 مەكەمەگە اكتسياعا شاقىرۋ حاتتارىن جىبەردى. بۇگىندە سولاردىڭ 20-دان استامى شاراعا بەلسەنە قاتىسۋعا دايىن ەكەندىكتەرىن ءبىلدىرىپ وتىر» دەيدى ريمما يمانعازينوۆا.
وسىعان وراي, بيىل دا جىلداعى ءداستۇر بويىنشا ەلوردانىڭ ورتالىق الاڭىندا, 24-30 تامىز ارالىعىندا مەكتەپ جارمەڭكەسى وتكىزىلمەك. وندا مەكتەپ فورماسى, كەڭسە تاۋارلارى جانە وقۋ قۇرالدارى دۇكەندەگىدەن ارزان باعامەن ساتىلادى. كاسىپكەرلىك جانە ونەركاسىپ باسقارماسى كاسىپكەرلەرمەن تومەندەتىلگەن باعالار تۋرالى كەلىسىمدى اياقتاسا, ول اتا-انالار مەن بالالار ءۇشىن ايعاي-شۋسىز مەكتەپكە ءبىر اپتا قالعاندا دايىندالۋدىڭ جاقسى مۇمكىندىگى بولعالى تۇر.
ال, استانا قالالىق ءبىلىم باسقارماسىنىڭ باسشىسى ءاسيما بيمەندينا: «مىسالى, ءبىز بەس جىل ىشىندە 149 ميلليوننان استام تەڭگەنىڭ ماتەريالدىق كومەگىن ۇسىنا الساق, بيىل سونىڭ 50 ميلليون تەڭگەسىن بالالار يگىلىگىنە جاراتتىق. ورايى كەلىپ تۇرعاندا, ونىڭ 13 ميلليونىن دەمەۋشىلەر بەرگەنىن دە ايتا كەتكەن ءجون. ەڭ باستىسى, ءوزىنىڭ اتىن تىزىمگە جازدىرتىپ, ەشكىمگە جاريا ەتپەي-اق, بالالارعا شىن نيەتىمەن كومەك قولىن سوزاتىن قايىرىمدى ادامداردىڭ كوبەيىپ كەلە جاتقانى قۋانتادى» دەپ وتىر.
سونداي جاندار تاراپىنان دەمەۋ تاپقان №57 مەكتەپتىڭ 1-سىنىبىنا باراتىن ءبۇلدىرشىندەردىڭ دە بىرنەشەۋى ايتۋلى اكتسياعا وراي وتكىزىلگەن باسپاسوز ءماسليحاتىنا كەلىپ, ولارعا «كZ» قورى سومكە مەن سپورت كيىمدەرىن تابىس ەتتى.
قازىر قالانىڭ الاڭدارى مەن باستى كوشەلەرىنە اكتسيانىڭ لوگوتيپى مەن جەدەل جەلى تەلەفوندارىنىڭ نومىرلەرى بەينەلەنگەن باننەرلەر ىلىنگەن. كەز كەلگەن تۇرعىن سول ارقىلى مەكتەپكە بارۋعا مۇمكىندىگى بولماي جۇرگەن بالالار تۋرالى اقپارات بەرىپ, وسىلايشا ولارعا ءوز كومەگىن تيگىزە الادى.
ەركەعالي بەيسەنوۆ
