چەحيانىڭ پاردۋبيتسە قالاسىندا قالاسىندا ءتول سپورتىمىز توعىزقۇمالاقتان ەكىنشى الەم چەمپيوناتى ءوتتى. قازاق حالقىنىڭ اقىل-وي مەن زياتكەرلىك ويىنى – توعىزقۇمالاقتى الەمدىك دەڭگەيدە تانىتۋ, ەڭ ۇزدىك سپورتشىلاردى انىقتاۋ, ويىننىڭ حالىقارالىق تانىمالدىعى مەن بۇقارالىعىن ارتتىرۋدى ماقسات ەتكەن چەمپيوناتتى دۇنيەجۇزىلىك جانە چەحيا توعىزقۇمالاق قاۋىمداستىعى, «اۆياكونتاكت» حالىقارالىق زياتكەرلىك ويىنداردى ۇيىمداستىرۋ كوميتەتى وتكىزدى.
بايراقتى باسەكەگە استانا قالاسىنان بارعان ءتورت سپورتشىمىز ەلدىڭ نامىسىن قورعاپ قايتتى. تۋرنير ءۇش جىكتەمە: بليتس (شاپشاڭ توعىزقۇمالاق), راپيد (بەلسەندى توعىزقۇمالاق) كلاسسيكا (ارقايسىسىنا 90 مينۋتتان) بويىنشا وتكىزىلدى. چەمپيوناتقا 10 ەلدەن 47 ادام قاتىستى. ونىڭ 28-ءى ەر ادام بولسا, 16-سى – نازىك جاندىلار.
ولاردىڭ قاتارىندا گەرمانيا, اقش, رەسەي, شۆەيتساريا, تۇركيا, ۋكراينا, لاتۆيا, قىرعىزستان, چەحيا مەن قازاقستان سياقتى ەلدەردىڭ وكىلدەرى بولدى. بىرنەشە كۇنگە سوزىلعان سايىس قازاق ۇلتتىق ويىنىنىڭ الەمدىك مارتەبەگە يە بولعانىن ايقىن دالەلدەپ بەردى.
قازاقستان نامىسىن تۋ ەتكەن سپورتشىلارىمىز بۇل سايىستا جەڭىستى جولدان جاڭىلمادى. ەرلەر اراسىندا شاپشاڭ ويناۋ چەمپيوناتىندا ايدوس سەيىتجانوۆتىڭ جۇلدىزى جاندى. ول قارسىلاسىن ايقىن باسىمدىقپەن ۇتىپ, باس جۇلدەنى يەلەندى. سونداي-اق, راپيد سايىسىندا دا حالىقارالىق دارەجەدەگى سپورت شەبەرلەرى ايدوس سەيىتجانوۆ پەن ماقسات شوتاەۆ ەكىنشى جانە ءۇشىنشى ورىنداردان كورىندى.
بۇعان دەيىن دە ءتۇرلى رەسپۋبليكالىق, حالىقارالىق جارىستاردا ولجا سالعان ساڭلاقتار بۇل جولى دا جەڭىس تۇعىرىنىڭ بيىك ساتىسىنا كوتەرىلىپ, جەرلەستەرىنە قۋانىش سىيلادى. تاعى ءبىر ايتا كەتەرلىگى, گەرمانيانىڭ وسى سپورت بويىنشا «بۇرشاق» دەگەن تۇرىنەن جەرلەسىمىز ماقسات شوتاەۆ باس جۇلدەنى يەلەنىپ, الدىنا جان سالمادى. ال, افريكانىڭ «وۆاري» ويىنىندا ايدوس سەيىتجانوۆ 3-ورىن الدى.
ال, قىزدار اراسىنداعى كەزدەسۋلەردە استانا قالاسىنىڭ سپورت شەبەرى گۇلجان ماعاۋوۆا راپيد بويىنشا 3-ورىندى يەلەندى. وسى رەتتە اتالعان سپورتشىلاردىڭ كەيىنگى كەزدەرى تابىستى ويىندارىمەن جانكۇيەرلەرىن جەلپىندىرىپ جۇرگەن جاستار ەكەنىن ايتا كەتكەن ءجون. جالپى, توعىزقۇمالاقتان الەم چەمپيوناتى باسقا ەلدە تۇڭعىش رەت ۇيىمداستىرىلىپ وتىر. توعىزقۇمالاق – ءتول ويىنىمىز دەگەنمەن دە, گەرمانيا, قىرعىزستان, شۆەيتساريا, لاتۆيا ويىنشىلارى توعىزقۇمالاق سپورتىنىڭ ءوز ەلدەرىندە وركەندەپ كەلە جاتقاندىعىن كورسەتتى.
ەركەجان ساتىمبەك
