ناۋرىز – بىرلىكتىڭ, تاتۋلىقتىڭ, ەڭبەكتىڭ, ىزگىلىكتىڭ, باقىتتىڭ مەرەكەسى, تابيعاتتىڭ جاڭارۋى, جاڭا جىلدىڭ, جاڭا ءومىردىڭ باسى. ناۋرىز – كۇن مەن ءتۇننىڭ تەڭەلىپ, مالدىڭ اۋىزى كوككە, ادامنىڭ اۋزى اققا تيگەن ۇلىق مەرەكە. قاسيەتتى مەيرام قارساڭىندا عۇبايدوللا بەكەشوۆ اقساقال مەن كۇمىسجان بولاتبەكوۆا اجەيدىڭ شاڭىراعىنا بارىپ, ۇلىستىڭ ۇلى كۇنىمەن قۇتتىقتاپ شىقتىق.
ون شاقتى ۇل-قىزى مەن ودان وربىگەن نەمەرە-شوبەرەلەرىنىڭ ورتاسىندا جۇزدەرى بال-بۇل جايناپ وتىرعان قاريالار ناۋرىز مەرەكەسىنىڭ وتكەن تاريحىنا كوز جىبەرىپ, بۇگىنگى كۇنمەن سالىستىرىپ ءوتتى.
– بالالىق شاعىم سوعىس جىلدارىنا تاپ كەلىپ, ەركەلىكپەن ەرتە قوشتاستىم. ول ۋاقىتتا, ارينە, ناۋرىز مەيرامىن دۇركىرەتىپ تويلايتىن مۇمكىندىك بولمادى. بار ويىمىز بەيبىت كۇننىڭ ەرتە ورناپ, تىنىشتىقتا ءومىر ءسۇرۋدى ءتىلەدىك, – دەپ ارداقتى اقساقال ويعا شومىپ كەتتى.
داستارقان باسىنا ەت كەلىپ, ناۋرىز كوجە ىشىلە باستاعان شاقتا وتاعاسى اڭگىمەسىن ءارى قاراي جالعاپ, ۇلتتىق مەيرامىمىز ەگەمەندىك العان شاقتان قايتا تۇلەپ, ەل اراسىندا ەستە قالارداي ەرەكشە تويلانىپ كەلە جاتقانىن مارقايىپ ايتتى.
– كەڭەس قۇرامىندا بولعانىمىزدا, ناۋرىز مۇنداي كەڭىنەن تويلانبايتىن. تەك 22 ناۋرىز كۇن مەن ءتۇننىڭ تەڭەلەتىن ۋاعى دەگەندى بىلەمىز. ال ناۋرىز كوجە مەيرامدا عانا ەمەس, كۇندەلىكتى ىشەتىن اسىمىز بولعان سوڭ بۇل مەرەكەنىڭ ورنى اسا بىلىنبەيتىن. جاڭا جىل بۇرىن 31 جەلتوقسان ءتۇنى عانا ەرەكشە اتالىپ وتسە, قازىر 22 ناۋرىز جاقسى دەڭگەيدە تويلانىپ كەلەدى. ورتالىق الاڭعا شىعىپ,
تىگىلىپ تۇرعان كيىز ۇيلەردىڭ, ونىڭ جان-جاعىندا قۇماي تازى, قىران بۇركىت ۇستاعان ەر-ازاماتتاردىڭ اڭگىمەسىن, التىباقان ورناتىلىپ, قىز-جىگىتتەردىڭ ويىن-كۇلكىسىن ەستىگەندە شۇكىرشىلىك ەتەمىز, – دەيدى كوڭىلى كوتەرىلگەن عۇبايدوللا اتا.
اتايدىڭ ويىن كۇمىسجان اجەي ءارى قاراي ءىلىپ اكەتتى. ءوز الدىمىزعا جەكە ەل بولىپ, جايما-شۋاق شاق ورناعاننان كەيىن ءتۇرلى سايىستار ۇيىمداستىرىلىپ, اۋىل-اۋىلداردا ناۋرىزدى ەرەكشە ەتىپ وتكىزەتىن دەيدى.
– قورعالجىن جەرىندە تۋىپ, سول جەردە ءوستىم. ەسىمدە, ەگەمەندىكتىڭ العاشقى جىلدارى بولاتىن. شارۋاشىلىقتار ءوزارا كوجە پىسىرۋدەن جارىسىپ جاتساق, جاستار جاعى ات شاپتىرىپ, بايگە ۇيىمداستىراتىن. سوندا اسىلحان دەگەن بالام بارىنەن وزا شاۋىپ, ءبىرىنشى ورىن الدى. سول جىلدان باستاپ قانا ۇلتتىق مەيرامنىڭ ماعىناسىن تۇسىنە باستادىق, – دەپ اقجاۋلىقتى اجەي اعىنان اقتارىلدى.
اڭگىمەمىز مۇنىمەن توقتاپ قالماي, كىشكەنتاي نەمەرە-شوبەرەلەرىنىڭ قىزىعىمەن جالعاسىپ, ارتىنشا ءان ايتىلىپ, دومبىرا شەرتىلدى. اس ءىشىپ, ەكىنتى اۋا قايتاتىن مەزگىلىمىز بولعان شاقتا داناگوي قاريا الاقانىن جايىپ: «اق مول بولسىن! ەش جاماندىق بولماسىن! جاراتقان ءاربىر ىسىمىزگە بەرەكە بەرسىن! ەگەمەندىگىمىز ماڭگى بولىپ, حالقىمىز جايما-شۋاق كۇندە عۇمىر كەشىپ جۇرە بەرسىن!» دەپ اق باتاسىن بەردى.
ءيا, قاريالار – ەلدىڭ اسىل قازىناسى. تىلەكتەرىڭىز قابىل بولعاي!
