21-22 قازان كۇندەرى نۇر-سۇلتان قالاسىندا «ينتەللەكتۋالدى دارىندى جاستار – ەلوردالىق ءبىلىم بەرۋدىڭ باستى الەۋەتى» حالىقارالىق عىلىمي-پراكتيكالىق كونفەرەنتسياسى ءوتتى.
تاربيەلىك ءمانى زور اتاۋلى شارانىڭ ۇيىمداستىرۋشىسى – نۇر-سۇلتان قالاسى اكىمدىگىنىڭ «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعى. كونفەرەنتسيانىڭ ماقساتى – رەسەيلىك جانە رەسپۋبليكالىق مۇعالىمدەر اراسىنداعى سەرىكتەستىك پەن كونسترۋكتيۆتى ءوزارا قارىم-قاتىناستى دامىتۋعا ۇلەس قوسۋ. جيىن بارىسىندا جوعارى وقۋ ورىندارى, ءبىلىم بەرۋ مەكەمەلەرى مەن وقۋ ورتالىقتارى اراسىنداعى نەعۇرلىم ءتيىمدى بايلانىس تەتىگىن تابۋ, دارىندى بالالارمەن جانە قابىلەتى جوعارى تالانتتى جاستارمەن جۇمىس ىستەۋ, اتا-انالاردى بالالارمەن بىرلەسكەن شىعارماشىلىق قارىم-قاتىناسقا تارتۋ ماسەلەلەرى تالقىلاندى.
شاراعا وتاندىق جانە رەسەيلىك عالىمدار, «دارىن» ايماقتىق ورتالىقتارىنىڭ, ءبىلىم بولىمدەرىنىڭ, مامانداندىرىلعان مەكتەپتەر مەن وقۋ ورتالىقتارىنىڭ وكىلدەرى قاتىستى. رەسەيلىك عالىمدار جيىنعا ونلاين قوسىلدى. كونفەرەنتسيا جۇمىسىنا بارلىعى 200-دەن استام دەلەگات اتسالىسسا, سونىڭ 70-ءى – ءار ايماقتان كەلگەن وكىلدەر.
– «دارىن» ورتالىعى ەلىمىزدىڭ ءار ايماعىنداعى دارىندى, زياتكەر بالالاردى قولداۋ جۇمىستارىن 23 جىل بويى جۇرگىزىپ كەلەدى. ورتالىعىمىزدىڭ كۇشىمەن مىڭداعان مەكتەپ وقۋشىلارى اۋداندىق, رەسپۋبليكالىق, حالىقارالىق دەڭگەيدەگى ءارتۇرلى زياتكەرلىك جارىستار مەن سايىستاردا جەڭىمپاز اتاندى. بۇگىنگى تاڭدا الەمدىك بايقاۋلاردان 500-گە تارتا وقۋشى, ەڭ بەدەلدى 7 حالىقارالىق وليمپيادانىڭ مەدالىن يەلەندى. رەسپۋبليكادا 17 ورتالىعىمىز, 134 مامانداندىرىلعان مەكتەپتەرىمىز بار. سولاردىڭ ءبىرى ەلوردامىزداعى «استانا دارىنى» ورتالىعى 15 جىلدىق مەرەيتويىن تويلاۋدا. الەمدىك پاندەميانىڭ ءورشىپ تۇرعانىنا قاراماستان «دارىن» ورتالىقتارى وقۋ پروتسەسىن ونلاين جانە ارالاس فورماتقا اۋىستىرىپ وتكىزۋدە. كەز كەلگەن ناتيجە – ءاربىر وقۋشى ءۇشىن ۇلكەن جەتىستىك. دارىندى جانە قابىلەتتى وقۋشىلارمەن جۇمىس جۇرگىزۋ, ولاردى ايقىنداۋ مۇعالىم قىزمەتىنىڭ ماڭىزدى اسپەكتىلەرىنىڭ ءبىرى, – دەدى ءبىلىم جانە عىلىم مينيسترلىگى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشەۆ.
كونفەرەنتسيا اياسىندا 3 سەكتسيالىق وتىرىس وتكىزىلدى, ءبىلىم بەرۋ سالاسىنداعى قازاقستاندىق جانە حالىقارالىق ساراپشىلاردىڭ 18-دەن استام بايانداماسى تىڭدالدى.
