وتكەن اپتادا ەلوردامىزدا VII دەلفي ويىندارى مارەگە جەتتى. وعان دۇنيەجۇزىنىڭ 16 مەملەكەتىنەن كەلگەن 800-گە جۋىق ونەرلى جاستار قاتىستى. بارلىعى 19 اتالىم بويىنشا باق سىناسقان باسەكەلەستەر وزدەرىنىڭ العىرلىعى مەن تاپقىرلىعىن ورتاعا سالدى.
بۇل ويىننىڭ قاتىسۋشىسى اتانباس بۇرىن ولاردىڭ باسىم بولىگى ءتۇرلى دەڭگەيدەگى بايقاۋلاردىڭ جەڭىمپازدارى بولىپ ۇلگەرگەن. «بيىل ءبىز ساپاعا ۇلكەن ءمان بەرىپ جاتىرمىز. بۇل قاتىسۋشىلاردىڭ تىم كوپتىگىن كورسەتپەسە كەرەك. دوداعا ەڭ تاڭداۋلىلار, ەڭ كاسىبيلەر جينالدى» – دەيدى دەلفي ويىندارى شتابىنىڭ ۇيلەستىرۋشىسى ەركەبۇلان مۇقانوۆ.
دەلفي-2012 بايقاۋىنىڭ وزىندىك ەرەكشەلىكتەرى بار. مۇنداعى جاس ەرەكشەلىكتەر ءار اتالىمدا ارقالاي. نەگىزىنەن الىپ قاراستىرساق, 10 مەن 25 جاس ارالىعىن قامتيتىن اتالمىش ويىن قاتىسۋشىلارى بۋىنى بەكىمەگەن جاس دارىندار, ورەلى ورەندەر. يتاليا, تۇركيا, اۆستريا, بەلورۋس, قىرعىزستان, ۋكراينا, رۋمىنيا, مولدوۆادان كەلگەن تالانتتى جاستار الەمدىك ماڭىزى زور دۋمان شەڭبەرىندە سايىسقا ءتۇستى.
بيىلعى ويىننىڭ ءبىر ەرەكشەلىگى, قازاق دەلفي كوميتەتى «پوەزيا» اتالىمىن قوستى. «ساحناداعى تسيرك» نوميناتسياسى تالاپتى جاستاردىڭ قارا ءۇزىپ كەلە جاتقانىن بايقاتتى. «حالىق ءبيى» دەگەن اتالىمعا 15-تەن اسا ۇجىم قاتىسىپ, ونەرىن پاش ەتتى. باس جۇلدەنى قازاقتىڭ «شاشۋ» توبى قانجىعاسىنا بايلادى.
«بۇل ويىندار ەڭ مىقتى جاستار لەگىن ءبىر ارنادا توعىستىردى. ءار قاتىسۋشى شىعارماشىلىق دەپ اتالاتىن سۇلۋلىقتىڭ ءبىر بولشەگىنە اينالدى. بىرنەشە كۇن بويى ولار مەيىرىم نۇرى تىلىندە تىلدەستى. وسى ويىنداردىڭ ارقاسىندا ءاربىرى ءوستى, كورەرمەنگە شۋاق توكتى» – دەدى ءبىلىم جانە عىلىم مينيسترلىگىنىڭ جاۋاپتى حاتشىسى ءاليا عالىموۆا مەرەكەنىڭ جابىلۋ سالتاناتىندا.
شىنار ءابىلدا
