راديكالدى كوزقاراستاعى ادامداردىڭ سىرت كەلبەتىنە قاراپ باعا بەرە المايمىز. دەسترۋكتيۆتى ءدىني اعىم وكىلدەرىن سىرتقى بەلگىلەرىنە قاراپ تانۋدىڭ دا, راديكالدى يدەولوگيانىڭ قۇربانىن انىقتاۋدىڭ دا ءوز قيىندىعى بار. ولاردى جىنىسىنا, جاسىنا نەمەسە ناسىلىنە قاراپ بولە المايمىز.
بۇرىن قوعام ولاردى سىرت كەلبەتىنە قاراپ ۇركەي قارايتىن ەدى, قازىر بىرەۋدى كيىمىنە نەمەسە سىرتقى يميدجىنە قاراپ سويلەۋ – قاتە. قازاقتا «ادام الاسى ىشىندە» دەپ بەكەر ايتپاسا كەرەك. ادامنىڭ پيعىلى ءارتۇرلى. ءوزىم دىندەردى زەرتتەۋ ورتالىعىندا قىزمەت ەتىپ جاتقانىما 4 جىلدان اسىپتى. وسى جىلدار اراسىندا راديكالدى كوزقاراستاعى ادامداردىڭ زامانعا ساي اداپتاتسيادان وتكەنى بايقالادى. الەۋمەتتىك جەلىنى, ادامدارمەن قارىم-قاتىناس فورماسىن وزگەرتكەن. مىسالى, بۇرىن دەسترۋكتيۆتى ءدىن وكىلدەرى مەملەكەتتىڭ باسقارۋ جۇيەسىنە قارسى ەكەنىن اشىق ايتاتىن, ناماز وقىمايتىنداردى «حارامعا» بالاپ نەمەسە اگرەسسيۆتى كوزقاراسىن جاسىرمايتىن. سوڭعى كەزدەردە الەۋمەتتىك جەلىلەردە سۇحباتتاردى زەرتتەي كەلە, راديكالدى كوزقاراستاعى ازاماتتار سوزدەرىن سۇزگىدەن وتكىزىپ, كەيبىر سۇراقتاردان قاشقالاقتاپ, ساقتىق بىلدىرەتىنىنە كوزىم جەتتى. تەك ادامدارعا ءدىني اقپاراتتى بەلگىسىز ادامداردان تىڭداماي, رەسمي اقپارات كوزىنەن السا ەكەن دەگەن كەڭەس بەرەمىز.
وسى تۇرعىدا جۇرگىزىلگەن وتكەن 2023 جىلدىڭ ءىس-شارالارىن قورىتىندىلاساق, دىنگە دەگەن ىقىلاس, وسى سالاداعى قىزمەتكە دەگەن قىزىعۋشىلىق ارقاشان جوعارى. سول سەبەپتى بۇل سالانىڭ قىزىعى مەن شىجىعى كوپ. ءدىني احۋال تۇراقتى, دەيتۇرعانمەن ارقانى كەڭگە سالىپ, جۇمىستى دوعارۋعا بولمايدى. قوعام بار جەردە ءدىن بار, ال ءدىن اتىن جامىلعاندار ادامدار اراسىنا ىرىتكى سالۋى ابدەن مۇمكىن. جىل بويى قالالىق ءدىن ىستەرى باسقارماسىمەن بىرگە ءبىز اقپاراتتىق ءتۇسىندىرۋ جۇمىسىن جۇرگىزدىك. مىسالى, 2023 جىلى استانا قالاسى تۇرعىندارىنا 750-دەن اسا لەكتسيا وقىلىپ, 26 مىڭنان استام ادامدى قامتىدىق. قوعامنىڭ ءارتۇرلى سالاسىندا قىزمەت ەتەتىن ادامدارمەن جولىعىپ, كەزدەسۋلەر وتكىزدىك. اسىرەسە جاستارمەن كەزدەسۋگە باسىمدىق بەرەمىز. ودان بولەك, قازىر الەۋمەتتىك جەلىلەر زامانى بولعاندىقتان, ءبىز دە زامان اعىمىنان شەت قالماي, تانىمدىق پودكاستتار مەن ۆيدەوماتەريالدار تۇسىرەمىز. ورتالىقتىڭ قىزمەتى ەلورداداعى ءدىن ماسەلەلەرىن, ءدىني بىرلەستىكتەر قىزمەتىنە, ءدىني ءبىلىم الۋ ماسەلەلەرىن, ءدىني احۋالدى زەردەلەۋگە باعىتتالعان. جۇمىس بارىسىن جەتىلدىرۋ ءۇشىن جىل باستالا سالىسىمەن ۇزدىك دەگەن ماماندار قايتا ىرىكتەلىپ, اقپاراتتىق ءتۇسىندىرۋ توبىن جاڭارتامىز. بۇل دا قوعامنىڭ ءدىني ساۋاتىن ارتتىرۋ ماقساتىندا جاسالىپ جاتقان بىرقاتار جۇمىس.
ەندىگى اڭگىمەنىڭ ۇشتىعى حالىققا ءدىني ماسەلەلەر بويىنشا الاڭداۋعا سەبەپ بار ما, جوق پا دەپ اشىق ايتا الامىز با؟ جالپى العاندا, ءاربىر ادام ءوزىنىڭ ومىرىنە جانە تاڭداۋىنا ءوزى جاۋاپتى. دەيتۇرعانمەن ءبىز ءوز تاراپىمىزدان دۇرىس باعىت كورسەتۋگە بارىمىزدى سالامىز. ءبىزدىڭ نەگىزگى جۇمىسىمىز ەلوردادا, باسقا وڭىرلەرمەن دە تىعىز بايلانىستامىز. وسى جەردە ايتقىم كەلەتىنى, جاۋ ايتىپ كەلمەيدى. ءبىز اركەز ساق بولعانىمىز ءجون. قاشاندا ەلىمىزدىڭ ىرگەسى بيىك بولىپ, قوعام نىعايۋى ءۇشىن ءاربىر ەل ازاماتى ءوزىنىڭ كۇشىن سالۋ كەرەك. ءبىز قازىر تەك ءدىن سالاسىن ايتىپ تۇرمىز. بىراق حالىقتىڭ الەۋمەتتىك, پسيحولوگيالىق جاعدايىنا دا ءمان بەرۋ كەرەك. بارلىق سالا ءبىر-بىرىمەن تىعىز بايلانىستى. ادامدار جان-جاقتى, سىني ويلانا بىلسە, دىننەن ماسەلە تۋىنداماس ەدى. ءدىني ساۋاتسىزدىق – قوعام دەرتى. سوندىقتان جاستارىمىز ءدىن اتىن جامىلعان بەلگىسىز تۇلعالاردى تىڭداۋىن قويسا, اقپاراتتى سۇزگىدەن وتكىزە الاتىن دارەجەگە جەتسە دەپ تىلەيمىز.
زاڭدى بىلمەۋ جاۋاپكەرشىلىكتەن بوساتپايدى. وسى قاعيدانى ادامدار كەيدە ۇمىت قالدىرادى. بىلتىر ءدىن سالاسى بويىنشا بىرقاتار قۇقىق بۇزۋشىلىق ورىن الدى. سولاردىڭ ءبىرى – ينتەرنەتتە زاڭسىز كىتاپ ساتۋ. قر اكىمشىلىك قۇقىق بۇزۋشىلىق تۋرالى كودەكستىڭ 490-بابىنا سايكەس, ءدىني مازمۇنداعى كەز كەلگەن ماتەريالدى باسىپ شىعارۋ نەمەسە تاراتۋ قۇقىق بۇزۋشىلىققا اكەلەتىنىن كوبى بىلە بەرمەيدى. سونداي-اق كەز كەلگەن ميسسيونەرلىك قىزمەتتى زاڭسىز جۇرگىزۋ, زاڭدى ءدىني قىزمەتكە كەدەرگى كەلتىرۋ, رۇقساتسىز ءدىني جورالعىلار جۇرگىزۋ, ءدىني بىرلەستىكتەردىڭ ساياسي قىزمەتكە ارالاسۋى 50-دەن 500 ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا اكەپ سوعادى. بۇل اقپاراتتى ءاربىر ادام ءبىلۋى كەرەك دەپ ويلايمىن.
الماس ەرنازاروۆ, استانا قالاسى
دىندەردى زەرتتەۋ ورتالىعىنىڭ ديرەكتورى
