قازاق كۇي ونەرىندەگى الىپ تۇلعانىڭ ءبىرى – تاتتىمبەتتىڭ تاماشا مۇراسىن ەل اراسىندا تىنىم تاپپاي ناسيحاتتاعان دومبىراشى تۇرىسبەك تۇسىپبەكوۆ. ول 1989 جىلى شىلدە ايىندا تسەلينوگراد قالاسىندا بولىپ, تىڭ يگەرۋشىلەر سارايىندا كوركەمونەرپازدارمەن, پەداگوگيكا ينستيتۋتى ستۋدەنتتەرىمەن كەزدەسۋ وتكىزدى, ونەر كورسەتتى.
تۇرىسبەك قازاقتىڭ اتاقتى جازۋشىلارىمەن, كومپوزيتورلارىمەن, عالىمدارىمەن ءجيى حات جازىسىپ تۇرعان. سولاردىڭ ءبىرى قازاقتىڭ كلاسسيك جازۋشىسى, اسقان ءسوز زەرگەرى عابيت مۇسىرەپوۆ جاس دومبىراشىعا ۇلكەن ءۇمىت ارتقان. ول 1981 جىلى 5 قىركۇيەكتە كۇيشىگە بىلاي دەپ حات جازىپتى:
«قادىرلى تۇرىسبەك كۇيشى… تەگى سوناۋ بەرتىس اتاڭنان وربىگەن ءناسىل دۇنيەگە بوسقا كەلمەگەن بولارسىڭدار… مىقتاپ ۇيرەنىپ كور. تۋعان جەر, ورمان-سۋىڭ ءبىر ەكەن, ودان دا بىردەمە اۋىسقان بولار. قالايدا سەن ءوزىڭ ەلىڭ تانىعان كۇيشىسىڭ, ەگىندىبۇلاق اۋدانىندا ونەر وركەندەۋىنە جاعداي بار سياقتى. ونەرگە ۇستاز كەرەك. ەڭبەگىڭە ونىمدىلىك, مازمۇندىلىق, كوركەمدىك تىلەيمىن».
عازيزا يساحان
