11 ماۋسىم كۇنى پاريجدە حالىقارالىق كورمەلەر بيۋروسى باس اسسامبلەياسىنىڭ سەسسياسىندا قازاقستان رەسمي تۇردە تانىلىپ, «ەكسپو – 2017» حالىقارالىق مامانداندىرىلعان كورمەسىنىڭ بايراعىن سالتاناتتى تۇردە قابىلداپ العان ەدى. كەشە وسى شاراعا بايلانىستى «Rixos President Astana» قوناقۇيىندە سىرتقى ىستەر ءمينيسترىنىڭ ءبىرىنشى ورىنباسارى ءراپىل جوشىباەۆ پەن «استانا ەكسپو – 2017» ۇلتتىق كومپانياسىنىڭ باسقارما توراعاسى تالعات ەرمەگياەۆتىڭ قاتىسۋىمەن ءباسپاسوز ءماسليحاتى ءوتتى.
جيىندا ءسوز العان «ەكسپو – 2017» كوميسسارى ءراپىل جوشىباەۆ بۇگىندە شەتەلدىك ارىپتەستەرمەن كەلىسسوزدەر باستالعانىن جانە ينۆەستيتسيالىق بايلانىس ورناتىلىپ جاتقانىن جەتكىزدى.
«فرانتسيا استاناسى پاريج قالاسىندا كورمە بايراعى ەلىمىزگە سالتاناتتى تۇردە تاپسىرىلدى. حالىقارالىق كورمەلەر بيۋروسىنىڭ باس حاتشىسى ۆيسەنتە گونسالەس لوسسەرتالەس كورمە تۋىنىڭ قازاقستانعا تابىستالۋىن ەرەكشە جاعداي دەپ باعالادى. ونىڭ ايتۋىنشا, ەلىمىز «ەكسپو – 2017» كورمەسىنىڭ تىركەۋ قۇجاتتاماسىن ءساتتى قورعادى. باس حاتشىنىڭ قازىردىڭ وزىندە تاڭداۋدىڭ دۇرىس جاسالعانى دالەلدەندى دەگەنى ءبىزدى قۋانتادى. ەندەشە, الدىمىزدا اۋقىمدى جۇمىستار توسىپ تۇر. ەندىگى ماقسات – ەل ابىرويىن اسقاقتاتاتىن شاراعا دايىندىق جۇمىستارىن ءتيىمدى ۇيىمداستىرۋ» دەيدى ول.
ايتا كەتكەن ءجون, 12 ماۋسىم كۇنى ۇلتتىق كومپانيا باسشىسى تالعات ەرمەگياەۆ بۋرابايدا وتكەن شەتەلدىك ينۆەستورلار كەڭەسىندە ەلباسى نۇرسۇلتان نازارباەۆقا كورمە تۋىن سالتاناتتى جاعدايدا تابىس ەتتى. پرەزيدەنت كورمە بايراعىن ابىرويمەن قابىلداپ العانى ءۇشىن كومپانيا باسشىلىعىنا العىس ءبىلدىرىپ, دايىندىق جۇمىستارىنا وڭ باعا بەرگەن بولاتىن.
«كورمە وتكىزۋدىڭ حالىقارالىق تالاپتارى بويىنشا, تۋدى المايىنشا, ەكسپو كورمەسىنىڭ كەشەندەرىن سالۋعا ءبىزدىڭ قۇقىمىز جوق. بىراق, ەلىمىزدىڭ كليماتتىق جاعدايى ەسكەرىلىپ, بىزگە ءساۋىر ايىنان باستاپ كورمە قۇرىلىسىن باستاۋعا رۇقسات بەرىلدى. بۇگىندە كورمەگە دايىندىق جۇمىستارى كەشىكتىرىلمەي, كەستە بويىنشا جۇرگىزىلۋدە. قۇرىلىس قارقىنى كۇننەن كۇنگە ارتىپ كەلەدى» دەيدى ت. ەرمەگياەۆ.
سونىمەن, ءۇش ايعا سوزىلاتىن «ەكسپو – 2017» كورمەسىنىڭ باستالۋىنا 1082 كۇن قالدى. ايتۋلى شاراعا جۇزدەن استام مەملەكەت پەن ونعا جۋىق حالىقارالىق بەدەلدى ۇيىمدار جانە يننوۆاتسيالىق تەحنولوگيا سالاسىنداعى كوشباسشى كومپانيالار قاتىساتىن بولادى.
گۇلميرا ايماعانبەت
