ەلباسىنىڭ استانانى الماتىدان ارقا توسىنە كوشىرۋ تۋرالى شەشىمى تاۋەلسىزدىگىمىزدىڭ العاشقى جىلدارىنداعى ۇلى ماقساتتاردان تۋىنداعان كورەگەندىك قادام بولدى. كوپشىلىكتىڭ قولداۋىمەن ۇندەسكەن وسى مۇرات, مۇددە وتاندىق تاريحتىڭ جاڭا پاراقتارىن اشتى, ۇلتتىق يدەيانىڭ ۇيىتقىسىنا اينالدى. ءسويتىپ, سارىارقانىڭ كىندىگىندە, ەركە ەسىلدىڭ جاعاسىندا الەم مويىنداعان اسەم شاھار بوي كوتەردى. بۇگىندە وسى ەكونوميكالىق جانە ساياسي جەتىستىكتەر مەن رۋحاني, مادەني جاڭعىرۋلاردىڭ نەگىزىنە اينالىپ وتىرعان باس قالامىزعا جيىرما جىل تولعالى وتىر. استانا قالاسىنىڭ جيىرما جىلدىعىن مەرەكەلەۋ تۋرالى مەملەكەت باسشىسىنىڭ وكىمى دە شىقتى. وسىعان وراي, ءبىز مەرەيلى مەرەكە قارساڭىندا كەزىندە الماتى جانە سارىارقا اۋداندارىنىڭ اكىمى قىزمەتىن اتقارىپ, ەلوردانىڭ قالىپتاسۋىنا قال-قادىرىنشە ەڭبەك سىڭىرگەن, بۇگىندە قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ساپار احمەتوۆتى اڭگىمەگە تارتقان ەدىك.
– ساپار قايراتۇلى, جيىرما جىلدىق مەرەيتويعا قالا قانداي جەتىستىكتەرمەن جەتىپ وتىر دەپ ويلايسىز؟
– استانا – ەلباسىنىڭ ەرەن ەڭبەگىنىڭ ارقاسىندا, عاسىرلار توعىسىندا دۇنيەگە كەلگەن عاجاپتاردىڭ ءبىرى. مەنىڭ ويىمشا, ونىڭ ەڭ باستى جەتىستىگى – ءىس جۇزىندە استانالىق مارتەبەگە يە بولۋى. كەز كەلگەن شەتەلدىككە ۇيالماي كورسەتەتىن, الەمنىڭ ءىرى قالالارىمەن يىق تەڭەستىرە الاتىن دارەجەگە جەتۋى. ەكىنشى جەتىستىك – ول مەگاپوليس تۇرعىندارىنىڭ ءومىر ءسۇرۋ دەڭگەيىنىڭ ءوسۋى. وسىعان سايكەس ادامي كاپيتالدىڭ دامۋى, استانالىق تۇرعىن مارتەبەسىنە ساي كوزقاراستىڭ, مەنتاليتەتتىڭ قالىپتاسۋى.
تاعى ءبىر ايتا كەتەرلىگى, قالانىڭ سيمۆولى ىسپەتتى «بايتەرەك» كەشەنىنىڭ, «حان شاتىر» ساۋدا-ويىن-ساۋىق ورتالىعى مەن وكەاناريۋم ورنالاسقان «دۋماننىڭ», «استانا وپەرا» مەملەكەتتىك وپەرا جانە بالەت تەاترى مەن ورتالىق ازيادا تەڭدەسى جوق «ازىرەت سۇلتان» مەشىتىنىڭ, «قازاقستان» ورتالىق كونتسەرت زالى, 30 مىڭ كورەرمەنگە ارنالعان «استانا-ارەنا» جابىق ستاديونى مەن 10 مىڭ ورىندىق «سارىارقا» ۆەلوترەگىنىڭ, كوزدىڭ جاۋىن الاتىن اسەم قوناقۇيلەر مەن مادەني ورىنداردىڭ, ساۋلەت ونەرىنىڭ ۇزدىك ۇلگىسىندەگى باسقا دا عيماراتتاردىڭ بوي تۇزەۋى ەلوردانىڭ ەكونوميكالىق تۇرعىدان دا ءىرى مەگاپوليس بولىپ قالىپتاسقانىن ايقىن دالەلدەپ تۇر.
ەڭ نەگىزگىسى – استانادا ورتا جانە شاعىن بيزنەس جاقسى دامۋدا. كەزىندە ەلباسى: «وسى سالانىڭ ەل ەكونوميكاسىنداعى ۇلەسى ەلۋ پايىزدان كەم بولماسىن» دەسە, ءبىزدىڭ قالادا ول الپىس پايىزدان اسىپ كەتتى. بۇل جەردە, اسىرەسە, تۋريزم, حالىققا قىزمەت كورسەتۋ كەڭىنەن وركەندەۋدە. مۇنىڭ ءمانى وراسان. ويتكەنى ەلوردامىز الەمدىك جانە ءداستۇرلى دىندەر كوشباسشىلارىنىڭ سەزدەرى, ەقىۇ-نىڭ ءسامميتى, قىسقى ازيا ويىندارى مەن «ەكسپو-2017» حالىقارالىق مامانداندىرىلعان كورمەسى سياقتى ماڭىزدى ءىس-شارالار وتەتىن ەۋرازيا كەڭىستىگىنىڭ ورتالىعىنا اينالدى.
جىلدان-جىلعا قالا تۇرعىندارىنىڭ الەۋمەتتىك-تۇرمىستىق جاعدايلارى كوتەرىلىپ كەلەدى. جىل سايىن ءبىر ميلليوننان اسا شارشى مەتر تۇرعىن ءۇي پايدالانۋعا بەرىلەدى. اسىرەسە, ينجەنەرلىك ينفراقۇرىلىمنىڭ زامان تالابىنا ساي جابدىقتالۋى – ۇلكەن جەتىستىك. بۇل – وسى ەلوردانىڭ قالىپتاسۋىنا جان اياماي تەر توككەن ازاماتتاردىڭ قانقيارلىق ەڭبەگىنىڭ ارقاسى. استانا اكىمدىگىندە قانداي بىلىكتى ازاماتتار جۇمىس ىستەدى! ءالى دە ەڭبەك ەتىپ جاتىر. جيىرما جىلدىققا ءبىز وسىنداي وڭ ۇردىستەرمەن كەلىپ وتىرمىز.
– ەلورداعا جاستار كوپتەپ كەلۋدە. شاھارىمىز ولاردى نەسىمەن باۋرايدى؟
– مەنىڭ ويىمشا, از عانا جىلدا كورگەن جاندى سۇيسىندىرەتىندەي باس قالامىزدىڭ كوركەيۋى كەز كەلگەن ادامنىڭ بويىندا ايرىقشا ماقتانىشتى, استانالىق رۋحتى قالىپتاستىردى. اۋەجايدان نەمەسە ۆوكزالدان تۇسكەن بويدا جۇرەگى «ەلىم» دەپ سوققان ءار جاننىڭ كەۋدەسىنە ايرىقشا جىلىلىق سەزىمى ۇيالايتىنى سوندىقتان. تاريح ءۇشىن قاس قاعىم ساتتە زامان كوشىنىڭ الدىڭعى لەگىنەن كورىنەردەي ايشىقتى شاھار تۇرعىزۋ وڭاي شارۋا ەمەس. بۇل ابىرويلى ءىس استانالىقتاردىڭ قولىنان كەلدى. ءار قيىردان كەلەتىن ساراپشىلاردى دا, ساياساتكەرلەردى دە تارتاتىن ءبىر ەرەكشەلىك وسى بولسا كەرەك. بۇل تۋرالى ەلباسى دا «ء…ار ادام, تەگىندە, ءوز قالاسىن سۇيەتىن شىعار. ال ءبىز, استانالىقتار, ءوزىمىزدىڭ جاس قالامىزدى ءۇش ەسە ارتىق سۇيەمىز, ويتكەنى ءبىز ونىڭ قۇرىلىسىن تاقىر جەردەن باستادىق. مۇنداعى ءاربىر جاڭا ءمۇيىس, ءاربىر جاڭا عيمارات ءبىزدىڭ جۇرەگىمىزدەن شىققان, ويتكەنى ولار تۋعان ساتىنەن باستاپ ءبىزدىڭ كوز الدىمىزدا» دەپ تولعانعانى بار.
جاستاردىڭ ءوز ومىرلەرىن استانامەن بايلانىستىرۋى – زاڭدىلىق. شاھار جاستار ءۇشىن, ەڭ الدىمەن, شەكسىز مۇمكىندىكتەر مەن اسقاق ارمانداردىڭ, بيىك ماقساتتىڭ التىن كىلتى دەر ەدىم. وقۋ ءۇشىن, كاسىپكەرلىكپەن اينالىسۋ ءۇشىن ەلوردا – جىگىتتەر مەن قىزدارعا ەڭ قولايلى قالا. بولاشاعىن وسى قالامەن بايلانىستىرعان ادامنىڭ الدىنان ەكى بىردەي ەسىك اشىلادى: ءبىرى – عىلىم-بىلىمگە دەگەن قۇلشىنىس, كەلەسىسى – جاڭا ورتا, جاڭا مۇمكىندىكتەر مەن جاڭا يدەيالارعا تولى جارقىن بولاشاققا دەگەن باستاۋ. وسى باسەكەلەستىك ورتا جاستاردىڭ الدىنان جارقىن بولاشاق اشادى.
جاستاردىڭ ءوز ومىرلەرىن استانامەن بايلانىستىرۋى – زاڭدىلىق. شاھار جاستار ءۇشىن, ەڭ الدىمەن, شەكسىز مۇمكىندىكتەر مەن اسقاق ارمانداردىڭ, بيىك ماقساتتىڭ التىن كىلتى دەر ەدىم
وسى جولدا تابىسقا جەتىپ جاتقاندارى دا بارشىلىق. قالادا 1 ميلليون حالىق تۇرادى دەسەك, سونىڭ 200-250 مىڭى جاستار ەكەن. قازىر ءبىلىمدى دە, عىلىم مەن تەحنيكانى دا يگەرىپ, يننوۆاتسيالىق جوبالاردى دا جۇزەگە اسىرىپ جاتقان – وسى جاستار. ولار سول بىلىمگە جانە ناقتى ىستەرگە قۇلشىنىستارىمەن باس قالامىزدىڭ مەرەيىن اسىرىپ ءجۇر.
– «استانا – ەۋروپانىڭ مادەنيەتىن, شىعىستىڭ رۋحانياتىن بويىنا سىڭىرگەن قالا» دەگەن پىكىر ايتىلادى. بۇعان نە ايتاسىز؟
– بۇلاي ايتىلۋى – زاڭدىلىق. مەن جوعارىدا ايتتىم, از عانا ۋاقىتتا ەلباسىنىڭ باسشىلىعىمەن ەلىمىزدىڭ قارقىندى جىلدامدىقپەن دامۋى, وسى باعىتتا دۇرىس تا بەرىك ۇستانعان سارا ساياسات, ءبىلىمدى, مادەنيەتتى, ەكونوميكانى ىلگەرىلەتۋ دوس ءسۇيسىنىپ, دۇشپان كۇيىنەتىندەي كورشىلەس ەلدەردىڭ قىزىعۋشىلىعىن تۋعىزدى. ءبىز مىڭداعان جىلدار بويى شىعىسپەن دە, باتىسپەن دە, وڭتۇستىكپەن دە, سولتۇستىكپەن دە تەرەزەمىز تەڭ قارىم-قاتىناس جاساپ كەلەمىز. سول ءۇردىس مەملەكەتىمىزدىڭ بۇگىنگى ساياساتىندا دا جالعاسىن تابۋدا. سونىڭ ارقاسىندا استانا قازاقستان رەسپۋبليكاسىنىڭ ءىرى ساياسي, مادەني جانە ىسكەرلىك ورتالىعى, قازىرگى زاماناۋي شاھارى بولىپ قالىپتاستى. ول بويىنا وسى جىلدارى ەۋروپانىڭ مادەنيەتىنەن – پراگماتيزمدى, ال شىعىستان رۋحاني دالدىكتى مۇرا ەتىپ الادى. بۇگىندە استانانىڭ بەينەسىنەن ەۋروپالىق باعىتتاعى تاماشا عيماراتتاردى, مۇلتىكسىز سەرۆيستى كورسەك, شىعىستىڭ دا جەتىستىكتەرى بىزگە جات ەمەس. تۇركيالىق كومپانيالار تۇرعىزعان ءزاۋلىم ۇيلەر مەن بيزنەس ورتالىقتارى, ويىن-ساۋىق عيماراتتارى, قىتايدىڭ «پەكين پالاسى» مەن سول ۇلگىدە سالىنىپ جاتقان ەلشىلىگى, مۇسىلمان ەلدەرىنىڭ زاڭعار كوكپەن تالاسقان الىپ قۇرىلىستارى – وسىنىڭ بارلىعى ەۋروپانىڭ دا, ازيانىڭ دا قول جەتكەن جەتىستىكتەرىن ۇشتاستىرىپ, ورگانيكالىق تۇردە ەلوردانىڭ ءححى عاسىردىڭ شاھارى ەكەنىن كورسەتىپ تۇر. مۇنداي قالا رەسەيدە دە, قىتايدا دا, ەشبىر جەردە جوق. سوندىقتان مەن استانانى ءوز يدەولوگياسى قالىپتاسقان قالا دەسەم, قاتەلەسپەيمىن.
– بيىل جاز بويى قالا تورىندە دۇركىرەپ «ەكسپو-2017» حالىقارالىق كورمەسى ءوتتى. كورمە استانالىقتار ءۇشىن نەسىمەن قۇندى بولدى؟
– «ەكسپو-نىڭ» وتكىزىلۋى استانالىقتار ءۇشىن, بىرىنشىدەن, ۇلكەن ءبىر پىكىر الماسۋ, مول تاجىريبە جيناۋ, جەتىستىكتەردى تاراتۋ الاڭى بولدى. ەكىنشىدەن, ەلوردالىقتاردىڭ كەۋدەسىندە ءوزىنىڭ بولاشاعىنا دەگەن كەرەمەت سەنىم ۇيالاتتى. ءارى ءبىزدى, ءبىزدىڭ باس قالامىزدى تەك قانا ساياسي ورتالىق ەمەس, ەكونوميكالىق, يننوۆاتسيالىق ورتالىق رەتىندە, جاڭا باعىتتى, جاڭا ءۇردىستى ۇستاپ وتىرعان ەل رەتىندە الەمگە پاش ەتتى. استانامىز قازاقستاننىڭ ءبىر كورسەتكىشى دەيتىن بولساق, شەتەلدىكتەر مۇندا كەلۋ ارقىلى مەملەكەتتىڭ كەلبەتىن, وتانىمىزدىڭ عالامات مۇمكىندىكتەرىن كوردى. ءجۇز ەلۋ بەس ەلدەن تۋريستەر كەلگەن ەكەن. ال «ەكسپو-نى» ءۇش ايدا بارلىعى ءتورت ميلليونعا جۋىق ادام تاماشالاپتى.
بۇدان بولەك, ول سىرتقى ساياساتتاعى تابىسىمىز بەن ەلدى بىرىكتىرىپ, تۇتاستىرا تۇسەتىن ۋاقىتتىق نىشان ەدى. كورمە استانانىڭ ينفراقۇرىلىمىنا ۇلكەن سەرپىلىس اكەلدى. جاڭا قوناقۇيلەر سالىندى, جاڭا جۇمىس ورىندارى اشىلدى, ساۋدا-ساتتىق, شاعىن جانە ورتا بيزنەس وركەندەدى. ەڭ باستىسى, كورمە جاستاردىڭ بويىنداعى جاڭاشىلدىق رۋحتى جانىدى. ولاردىڭ عىلىمعا قۇلشىنىسىنا دەم بەردى. ونىڭ «بولاشاق ەنەرگياسى» دەپ اتالۋىنىڭ ءوزى «جاسىل» تەحنولوگيالاردى دامىتۋ, بالاما قۋات كوزدەرىن تابۋ ماسەلەسىنە وزەك بولدى, تالاي باستامانىڭ ىسكە اسىرۋ كىلتىنە اينالدى. اسىرەسە, مەكتەپ وقۋشىلارىنىڭ باعىت-باعدار الۋىنا تەمىرقازىق ىسپەتتى جول سىلتەدى. مەنىڭ ويىمشا, «ەكسپو» حالىقارالىق كورمەسىنىڭ قۇندىلىعىن ءبىز قازىر كورە المايمىز. ونىڭ جەمىسىن كەلەشەكتەن كورەمىز. ويتكەنى ءبىز وسكەلەڭ ۇرپاقتىڭ بويىنا قۇنارلى ءدان سەپتىك. سونىڭ ناتيجەسىن ەلى مەن تۋعان حالقى بولاشاقتا كورەتىن بولادى.
– ءسىز ەلوردانىڭ قالىپتاسۋىنا ازدى-كوپتى ەڭبەك ءسىڭىردىڭىز. قازىر پارلامەنت ءماجىلىسىنىڭ دەپۋتاتىسىز. قانداي دا ءبىر جاعدايدا استاناعا بۇيرەگىڭىز بۇراتىن شىعار؟
– استانا الاتاۋ باۋرايىنان وسى جەرگە العاش قونىس اۋدارا باستاعان كەزدە – 1997 جىلى «كۇردەلى قۇرىلىس باسقارماسى» دەگەن مەكەمەگە ينجەنەرلىك جۇمىسقا كەلدىم. نەگىزگى ماماندىعىم – قۇرىلىسشى. بۇل كاسىبىمدى مەن جاقسى كورەمىن. سوندىقتان جۇمىسىما بار ىنتامەن كىرىسىپ, استانانىڭ تۇڭعىش عيماراتتارىنىڭ العاشقى ىرگەتاسىن قالاسۋعا اتسالىسا باستادىم. مەن ءۇشىن وسى قالانىڭ ءار تاسى, ءار كوشەسى, ءار عيماراتى ىستىق. بۇل – جاستىق جىگەرمەن جالىنداپ ەڭبەك ەتكەندىكتەن عانا ەمەس, ءوزىڭنىڭ بولاشاقتىڭ ىرگەتاسىن بىرگە قالاسىپ, سونىڭ ىستىعىنا كۇيىپ, سۋىعىنا توڭىپ, بىرگە جۇرگەنىڭدى سەزىنگەن, كەۋدەڭدى كەرنەگەن ماقتانىش سەزىمىنەن ايتىلعان ءسوز. بۇل قالا ماعان ەتەنە جاقىن دەيتىن سەبەبىم – الماتى جانە سارىارقا اۋداندارىنا اكىم بولدىم. حالىقپەن قويان-قولتىق ارالاسۋ, ولاردىڭ مۇڭ-مۇقتاجىن, تۇرمىس-تىرشىلىگىن قاتار ءجۇرىپ كورۋ, سونى قولىڭنان كەلگەنشە جاقسارتۋعا تىرىسۋ ادامعا جاۋاپكەرشىلىكپەن قوسا ۇلكەن جىگەر دە بەرەتىنىن ءتۇسىندىم.
ودان كەيىن «نۇر وتان» پارتياسى استانا قالالىق فيليالىنىڭ ءبىرىنشى ورىنباسارى قىزمەتىندە دە مەن ەلوردا حالقىنىڭ ۇلكەن بەلسەندىلىگىن بايقادىم. قانداي ءىستى دە بىرىگىپ اتقارۋعا دەگەن قۇلشىنىس ۇلكەن مۇراتتار جولىنداعى وڭ قادام ەكەنىن ولار جاقسى تۇسىنەدى.
مەن دە ءوزىمدى وسى استانالىق بولعانىما, ونىڭ ءوسىپ-وركەندەۋىنە تەڭىزگە تامعان تامشىداي بولسا دا ۇلەس قوسىپ كەلە جاتقانىمدى ابىروي سانايمىن ءارى زور جەتىستىگىم دەپ ويلايمىن.
استانا – كەمەل كەلەشەكتىڭ قالاسى. ونىڭ بولاشاعى بۇدان دا جارقىن, بۇدان دا ساۋلەتتى بولاتىنىنا مەنىڭ سەنىمىم كامىل. ويتكەنى ونىڭ اۆتورى – قازاقستان پرەزيدەنتى
نۇرسۇلتان نازارباەۆ
مەنىڭ بۇگىنگى تاڭدا جوعارعى ورگاندا حالىق قالاۋلىسى اتانىپ ءجۇرۋىمنىڭ وزىندە دە استانا مەن استانالىقتاردىڭ ءار كەز قولتىعىمنان دەمەپ, قاناتىمدى قومداپ, قولداعان رۋحاني كۇشى جاتىر. ەلوردا تەك ەلدىڭ ساياسي ورتالىعى عانا ەمەس, ادامدى رۋحاني جەتىلدىرۋشى ورتالىق دەپ باتىل ايتا الامىن.
سوندىقتان مەن استانانىڭ تىنىس-تىرشىلىگىن كۇندە باقىلاپ وتىرامىن. وسى پارلامەنت ماجىلىسىندەگى «استانا اقشامى» مەن «ۆەچەرنيايا استانا» گازەتتەرىن جازدىرىپ الىپ وقيتىن بىردەن-ءبىر دەپۋتاتپىن دەسەم, ارتىق ايتتى دەپ ويلاماڭىز. سول ارقىلى بۇرىنعى ءوزىم جۇمىس ىستەگەن قالاداعى اۋدانداردىڭ حال-احۋالدارىمەن, قىزمەتتەس بولعان ادامداردىڭ, جۋرناليستەردىڭ وي-پىكىرلەرىمەن, ماقالالارىمەن تانىسىپ, وزىمە قاتىستى كوپتەگەن ماسەلەلەرگە نازار اۋدارىپ وتىرامىن.
ماسەلەن, مەن وسى جازدا قالادا 3-ءىنشى جىلۋ ەلەكتر ورتالىعىن سالۋ جوباسىمەن اينالىستىم. بۇل ءوزى شاھار اۋماعىنىڭ كەڭەيۋىنە بايلانىستى كوپتەن ءسوز بولىپ كەلە جاتقان جاي ەدى. ءتىپتى ەلباسىنىڭ ءوزى دە وعان ايرىقشا نازار اۋدارعان بولاتىن. الايدا كەيبىر سەبەپتەرمەن ەل ۇكىمەتى ونى «ۇزىن ارقان, كەڭ تۇساۋعا» سالىپ, تىم سوزىپ جىبەردى. مۇنداي ءىستىڭ ءبىر ادام سوڭىنا ءتۇسىپ, ناقتى قولعا الماسا, العا جىلجىمايتىنى تۇسىنىكتى. مىنە, مەن وسى جوبانى جانداندىرىپ, ۇكىمەتكە «ەلباسى تاپسىرماسى نەگە ورىندالماي جاتىر؟» دەپ دەپۋتاتتىق ساۋال جولدادىم.
قازىر اتالعان «استانا قالاسىن گازداندىرۋ جوباسى» ۇكىمەتتە قولعا الىندى. بۇعان قوسا, ەلورداداعى تۇرعىن ۇيلەردى كۇتىپ ۇستاۋ, قىزمەت كورسەتۋ تالاپتارىنا قاتىستى ماسەلە كوتەرىپ, دەپۋتاتتىق ساۋال جولدادىم. مەنىڭ بۇل باستامام ۇكىمەت تاراپىنان قولداۋ تاۋىپ, ونىڭ جۇزەگە اسىرىلۋ جولدارى ايقىندالا باستادى. مىنە, باس قالادا جۇمىس ىستەۋىمنىڭ ونىڭ الەۋمەتتىك-تۇرمىستىق تىنىس-تىرشىلىگىمەن جاقىنىراق تانىستىعىمنىڭ, وسىعان بايلانىستى جيناعان تاجىريبەمنىڭ ارقاسىندا وسىنداي جۇمىستار اتقارىلىپ جاتىر.
دەپۋتات رەتىندە «نۇر وتان» پارتياسىنىڭ استانا قالالىق فيليالىنا بارىپ, ءتۇرلى ماسەلەلەر بويىنشا تۇرعىنداردى قابىلدايمىن. ولاردىڭ مۇڭ-مۇقتاجدارىن تىڭداپ, ونى مۇمكىندىگىنە قاراي شەشۋگە تىرىسامىن.
– جىگىت جاسىنا جەتىپ وتىرعان استانانىڭ بولاشاعىن قالاي ەلەستەتەر ەدىڭىز؟
– استانا – كەمەل كەلەشەكتىڭ قالاسى. ونىڭ بولاشاعى بۇدان دا جارقىن, بۇدان دا ساۋلەتتى بولاتىنىنا مەنىڭ سەنىمىم كامىل. ويتكەنى ونىڭ اۆتورى – قازاقستان پرەزيدەنتى نۇرسۇلتان نازارباەۆ. ەلباسى مەن ەلوردا – ەگىز ۇعىم. ونى ءبىر-بىرىنەن ءبولىپ قاراۋ استە مۇمكىن ەمەس. قالامىزدىڭ وسىنداي الەم سۇيسىنەتىندەي جەتىستىككە جەتىپ, جىلدان-جىلعا مارتەبەسىنىڭ اسقاقتاي ءتۇسۋى مەملەكەت باسشىسىنىڭ تىكەلەي كۇش-قايراتى مەن ساياسي ەرىك-جىگەرىنىڭ ارقاسىندا مۇمكىن بولىپ وتىر. ونى بۇكىل قازاقستاندىقتار تۇسىنەدى.
سونداي-اق, ەلوردانى رەسپۋبليكانىڭ باسقا وڭىرلەرىنەن دە ءبولىپ قاراۋعا بولمايدى. ول – ەلىمىزدىڭ جۇرەگى. جۇرەك – بۇكىل اعزانىڭ تىرشىلىك تىرەگى بولسا, استانا دا بايتاق قازاقستانىمىزدىڭ الەۋمەتتىك-ەكونوميكالىق دامۋىنىڭ قۋاتتى لوكوموتيۆى ءرولىن اتقارۋدا. ءسويتىپ, ول زاماناۋي ونەركاسىپ, عىلىم جانە مادەنيەت ورتالىعىنا, تۇرعىنداردىڭ ءومىر سۇرۋىنە قولايلى مەكەنگە جانە ەل ەكونوميكاسىنا قوماقتى ۇلەس قوسار ۇلگىگە اينالدى.
باس قالامىز بولاشاقتا بۇدان دا گۇلدەنىپ, بۇدان دا ساۋلەتتەنىپ, قازىرگى وركەنيەت پەن حالقىمىزدىڭ عاسىرلار بويى قالىپتاسقان ۇلتتىق قاسيەتتەرىن ۇشتاستىرا وتىرىپ, الەمدە ەش قالاعا ۇقسامايتىن ايرىقشا كەلبەتتى, جالىندى رۋحى بار قازاق ەلىنىڭ استاناسى بولىپ وركەندەي بەرەرىنە سەنەمىن.
ول ءۇشىن بۇگىننەن باستاپ ءبىز, استانالىقتار, سونىڭ نەگىزىن قالاۋىمىز كەرەك. بالالارىمىزدىڭ بويىنا وتانسۇيگىشتىك قاسيەتتەر ءسىڭىرىپ, تۋعان قالاسىنىڭ ەرتەڭى ءۇشىن جانى اۋىراتىن, وسى جولدا تەر توگىپ, ايانباي ەڭبەكتەنەتىن ازاماتتار تاربيەلەۋىمىز قاجەت.
قالانىڭ ءار تۇرعىنى ونىڭ تازالىعىنا ۇقىپتى قاراپ, جاسىل جەلەككە ورانىپ, گۇلزار باققا بولەنۋىنە شىن نيەتىمەن ءوز ۇلەسىن قوسا بىلسە, بۇل شاھاردىڭ ەرتەڭى بۇگىنگىدەن دە نۇرلى بولارى ءسوزسىز.
– سۇحباتىڭىزعا راقمەت!
سۇحباتتاسقان
تاڭاتار تولەۋعاليەۆ
