ەلدىڭ ەرەن ەرلەرى
ەلدىڭ مەرەيىن, مەملەكەتتىڭ مارتەبەسىن, حالىقتىڭ ابىرويىن, ۇلتتىڭ نامىسىن كوتەرۋگە كەلگەندە سپورت سايىپقىراندارى الدىمەن ەسكە ءتۇسىپ جاتادى. بىلە بىلسەك, بۇل — زاڭدىلىق. وسى ورايدا, اسىرەسە, وليمپيادا ويىندارىندا جۇلدەگەر اتانعان سپورتشىلارىمىزدى باتىرعا بالاپ جاتامىز. شىنىمەن دە تورتكۇل دۇنيەنىڭ كىل مىقتىلارى باسەكەگە تۇسەتىن الامان سايىستا توپ جارۋ ناعىز ەرلىك ەمەس پە؟!
ايتا بەرگىمىز كەلەدى, بيىل لوندوندا وتكەن ححح جازعى وليمپيادا ويىندارىندا قازاقستان سپورتشىلارى بۇرىن ەل تاريحىندا بولماعان جەتىستىككە قول جەتكىزدى. جەتى – التىن (!), ءبىر – كۇمىس, بەس – قولا مەدال! ەلدىك باسەكەدە بۇكىل دۇنيە ءجۇزى بويىنشا 12-ءشى ورىننان كورىندىك. بۇل – تاۋەلسىز ەل بولعالى قول جەتكىزگەن تولاعاي تابىسىمىز. مىنە, وسىلايشا ەلدىك ابىرويىمىزدىڭ اسقاقتاۋى سول سايىپقىران سپورتشىلارىمىزدىڭ ارقاسى. سوندىقتان دا وليمپ شىڭىن باعىندىرعان ءار سپورتشىمىز ەل ماقتانىشى, حالقىمىزدىڭ باتىرلارى بولىپ قالا بەرمەك.
لوندوندا ءدۇبىرلى دودا باستالعان ساتتە-اق قازاق جانكۇيەرلەرى قالپاعىن اسپانعا اتىپ قۋانىشقا بولەنەدى دەپ كىم ويلاعان؟! ويلاساق تا, ويلاماساق تا, قازاق ەلىنىڭ ناعىز ءبىر پاتريوت سپورتشىسى الەكساندر ۆينوكۋروۆ ۆەلوجارىستا شاشاسىنا شاڭ جۇقتىرماي, وليمپيادا چەمپيونى اتاعىن جەڭىپ الدى. وسىدان 12 جىل بۇرىن سيدنەي ويىندارىندا كۇمىس جۇلدەگەر بولعان اتاقتى سپورتشىمىزدى سول كەزەڭدە شەتەلدەرگە شاقىرعاندار دا بولعان ەدى. الايدا, ول «تۋعان ەلىن ەشقايدا ايىرباستامايمىن» دەپ قازاقستان تۋى استىندا سايىستارعا قاتىسا بەردى. ءسويتىپ, ءوزىنىڭ سپورتتىق عۇمىرىنا لوندون وليمپياداسىنىڭ التىنىمەن نۇكتە قويدى.
بۇكىل الەم جانكۇيەرىن اسقان كۇشىمەن, اسا سالقىنقاندى ءمىنەزىمەن تاڭعالدىرعان اۋىر اتلەتشى قىزىمىز ءزۇلفيا چينشانلو وليمپيادا چەمپيونى عانا بولىپ قويماي, الەم جانە وليمپيادا رەكوردتارىن جاڭارتىپ جىبەردى. ءزۇلفيا لوندون تورىندە قازاقتىڭ تۋىن جەلبىرەتكەندە بارشا قازاقستاندىقتار قۋانىشقا بولەنگەنى ءسوزسىز. سول جەڭىستەن كەيىن چەمپيون قىزىمىز «مەن ءالى تالاي جارىستا قازاقستان تۋىن بيىكتەن جەلبىرەتەمىن» دەگەن ەدى. سول كەزدە-اق ونىڭ دا ناعىز پاتريوت ەكەنىنە ءشۇباسىز سەنگەنبىز, سەنە بەرمەكپىز دە.
شارشى الاڭنىڭ شىن شەبەرى سەرىك ساپيەۆ وليمپيادا چەمپيونى اتاعىمەن بىرگە ەڭ ۇزدىك بوكسشىعا بەرىلەتىن باركەر كۋبوگىن قوسا ۇتىپ الۋى ناعىز ەرلىك دەسەك جاراسادى. ەكى دۇركىن الەم چەمپيونى بولعان سەرىكتىڭ بۇل جەڭىسى قازاق سپورتىنىڭ تاريحي جەتىستىگى بولدى دەسەك تە بولادى. ال تاعى ءبىر پاتريوت سپورتشىمىز يليا يلين دە قازاقستان سپورتىنا ولشەۋسىز ۇلەس قوستى. يليا ەكى دۇركىن وليمپيادا چەمپيونى اتانعان ازىرگە جالعىز قازاقستاندىق سپورتشى بولىپ وتىر.
وليم التىنىن جەڭىپ العان جەڭىل اتلەت ولگا رىپاكوۆا, اۋىر اتلەتتەر مايا مانەزا مەن سۆەتلانا پودوبەدوۆا دا قازاقستان مەرەيىن كوتەرۋگە وراسان ۇلەس قوسقاندارىن ايرىقشا اتاپ وتەمىز. ويتكەنى, بۇل سپورتشىلاردىڭ ءبارى قازاق ەلىنىڭ اتىن دا, ابىرويىن دا ءتورتكۇل دۇنيەگە تانىتتى. بۇل – ۇلكەن جەڭىس, بۇل – ەرەن ەرلىك.
وكىنىشكە قاراي, كەي جاعدايدا وسىنداي اتاقتى سپورتشىلارمىز تۋرالى كوڭىلگە كىربىڭ تۇسىرەتىن جايتتار دا بولىپ جاتادى. ماسەلەن, ءوزىنىڭ تۋىپ-وسكەن جەرىنە بارىپ كەلگەن ءزۇلفيا چينشانلونى «قىتايىنا قايتا كەتەدى» دەپ جازعىرعاندار تابىلسا, ۆينوكۋروۆتىڭ وسىدان ەكى جىل بۇرىنعى ءبىر جەڭىسىن ساتىپ الدى دەگەن شەتەلدىك مامانداردىڭ پىكىرىن جاڭالىق اشقانداي جاريالاعاندار دا از بولمادى. ال, شىن مانىندە وسى ەكى سپورتشى دا كەلەشەكتە تەك قازاقستان نامىسىن قورعايتىنىن تالاي مارتە ايتقانى ەسىمىزدە. سولاي بولىپ تا قالماق. سوندىقتان ەل مەرەيىن وسىرگەن چەمپيوندارىمىز تۋرالى جالعان ەمەس, جاعىمدى پىكىرىمىزدى ساقتاپ جۇرەيىكشى دەگىم كەلەدى.
لوندون وليمپياداسىندا قازاقستان تۋىن بيىكتەن جەلبىرەتكەن سايىپقىران سپورتشىلارىمىزدىڭ جەڭىستى ءداستۇرى 2016 جىلى برازيليادا وتەتىن وليمپيادا ويىندارىندا جالعاسىن تابادى دەگەن سەنىمدەمىز. جەڭىمپازدار ءداستۇرى جەڭىستەرگە باستاي بەرسىن!
عالىم قوجابەكوۆ