ەلوردا رامىزدەرىن كىم جاسايدى؟
ەلوردا كۇنىنە وراي نۇر-سۇلتان قالاسىنىڭ اكىمدىگى قالانىڭ ءانۇرانى, ەلوردا تۋرالى ەڭ ۇزدىك ءان, سونداي-اق قازاقستان استاناسىنىڭ لوگوتيپى مەن ۇرانىنىڭ ەڭ ۇزدىك برەندبۋگىن جاساۋ بويىنشا شىعارماشىلىق بايقاۋ جاريالادى.
پاتريوتيزم سەزىمىن اسقاقتاتىپ, قالانىڭ ۇزدىك رامىزدەرىن جاساۋ, سونداي-اق ۇلتتىق ونەردى ۇلىقتاۋ جانە ونى كەڭىنەن ناسيحاتتاۋ ماقساتىندا وتكىزىلەتىن بۇل بايقاۋعا كاسىبي جانە اۋەسقوي كومپوزيتورلار, اقىندار, مۋزىكالىق جانە شىعارماشىلىق توپتار, ديزاينەرلەر, سۋرەتشىلەر, سونداي-اق رەسپۋبليكانىڭ تۇرعىندارى مەن قالا تۇرعىندارى ءوز شىعارمالارىن جىبەرە الادى. بايقاۋ 2019 جىلعى 27 مامىردان 24 ماۋسىمعا دەيىن جۇرگىزىلەدى. اندەردى كەز كەلگەن جانردا جانە ءارتۇرلى ورىنداۋشىلار ءۇشىن جازۋعا بولادى. بايقاۋعا بەرىلگەن اندەر بۇرىن جاريالانباعان بولۋى شارت سانالادى. بايقاۋدىڭ جەڭىمپازى ديپلوممەن جانە 3000000 تەڭگەمەن ماراپاتتالادى.