ەلوردادا الەۋمەتتىك جاعىنان كومەككە مۇقتاج وتباسى بالالارىن قاشىقتان وقىتۋعا كومپيۋتەرمەن, روۋتەرلەرمەن قامتاماسىز ەتۋ ءۇشىن 6 ميلليارد تەڭگە ءبولىندى. جالپى, قالا بويىنشا 34,5 مىڭ وقۋشىعا قاجەتتى تەحنيكالىق قۇرال-جابدىقتار بەرىلەدى.
كەشە ەلوردادا پەداگوگ قىزمەتكەرلەرى قالالىق تامىز كەڭەسىنىڭ پلەنارلىق وتىرىسى ءوتتى. «ءبىلىم بەرۋدى ساندىق ترانسفورماتسيالاۋ» تاقىرىبىندا ونلاين فورماتتا ۇيىمداستىرىلعان شاراعا نۇر-سۇلتان قالاسىنىڭ اكىمى التاي كولگىنوۆ قاتىسىپ, ۇستازداردى ءبىلىم جانە عىلىم مينيسترلىگىنىڭ ى.التىنسارين, «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىلەرىمەن, العىس حاتتارمەن ماراپاتتادى.
مۇعالىمدەردىڭ تۇرعىن ءۇي جاعدايى جاقسارادى
– مەملەكەت باسشىلىعى مۇعالىمدەردىڭ جاعدايىن جاقسارتۋعا ەرەكشە كوڭىل بولەدى. سول ماقساتتا «پەداگوگ مارتەبەسى تۋرالى» زاڭ قابىلداندى. وسى جىلدىڭ 1 قاڭتارىنان باستاپ مۇعالىمدەردىڭ جالاقىسى 25 پايىزعا ارتتى. 2024 جىلعا دەيىن تاعى 25 پايىزعا وسەدى. بىلتىر ءبىز ءوز تاراپىمىزدان تۇرعىن ءۇي ساتىپ الۋ ءۇشىن الەۋمەتتىك جاردەماقى تۇرىندە 1 ملن تەڭگە سوماسىنا وتەۋسىز نەگىزدە 275 تۇرعىن ءۇي سەرتيفيكاتىن بولدىك. وسى جىلى دا مۇعالىمدەردىڭ تۇرعىن ءۇي جاعدايىن جاقسارتۋعا كومەكتەسەمىز, – دەدى التاي كولگىنوۆ.
قالا باسشىسى ءوز سوزىندە بيىل «قازاقستاندىق يپوتەكالىق ۇيىممەن» بىرلەسىپ 1 مىڭ الەۋمەتتىك پاتەر بەرۋ تۋرالى كەلىسىمگە قول قويىلعانىن اتاپ ءوتتى. بۇل باسپاناعا مۇعالىمدەردەن باسقا مەديتسينا قىزمەتكەرلەرى, پوليتسەيلەر, الەۋمەتتىك قىزمەتكەرلەر, مادەنيەت جانە سپورت قىزمەتكەرلەرى دە ۇمىتكەر بولا الادى.
بىلتىر جۇمىسىن ەندى باستاعان مۇعالىمدەردى قولداۋ ماقساتىندا 350 ورىندىق جاس پەداگوگتار ءۇيى سالىندى. قالا اكىمدىگى مۇعالىمدەردىڭ كاسىبي دامۋىنا ۇنەمى كوڭىل بولەدى. اتاپ ايتقاندا, «Ozat» جوباسىن ىسكە اسىرۋ اياسىندا مەكتەپتەر مەن كوللەدجدەردىڭ 400 مۇعالىمى ءرىЅا تاپسىرمالارىنا ءبىلىم الۋشىلاردى دايارلاۋ بويىنشا بىلىكتىلىكتى ارتتىرۋ كۋرستارىندا وقۋدان ءوتتى. كەمبريدج ۋنيۆەرسيتەتىمەن بىرلەسىپ SHARE جوباسى ىسكە قوسىلدى. سونىڭ ىشىندە مۇعالىمدەر بىرلەسىپ زەرتتەۋلەر جۇرگىزەدى, اقپارات الماسادى, بىلىكتىلىگىن كوتەرۋ بويىنشا باسقا دا جۇمىستار قاراستىرىلعان.
بيىل 12 مەكتەپ بوي كوتەرەدى
مۇعالىمدەردى ەرەكشە قۋانتاتىن جاڭالىق, بيىل باس قالانىڭ ۇستازدارى العاش رەت «نۇر-سۇلتان قالاسىنىڭ قۇرمەتتى پەداگوگى» مەدالىمەن ماراپاتتالادى. مەدال يەلەرىنە 830 مىڭ تەڭگەدەن (300 اەك) تولەنەدى.
ەلوردا اكىمى ءوز سوزىندە بيىل باس قالادا 12 مەكتەپ بوي كوتەرىپ, 26 ءبىلىم بەرۋ نىسانى جوندەلەتىنىن, ينكليۋزيۆتى ءبىلىم بەرۋ كابينەتتەرى اشىلاتىنىن اتاپ ءوتتى. بۇل بىلتىرعىمەن سالىستىرعاندا ەكى ەسە كوپ. كەلەسى جىلى دا ەلوردادا 12 مەكتەپ سالىنادى.
– ەگەر بىلتىر ينكليۋزيۆتى بىلىممەن قامتۋ 80 پايىز بولسا, بيىل ءبىز بۇل كورسەتكىشتى 100 پايىزعا جەتكىزۋدى جوسپارلاپ وتىرمىز. تۇڭعىش پرەزيدەنت – ەلباسى قورىنىڭ باستاماسىمەن ەكى جاڭا مەكتەپتىڭ نەگىزىندە 1 قىركۇيەككە دەيىن 30 ورىندىق 2 ينكليۋزيۆتى قولداۋ بولمەلەرى اشىلادى. شىلدەدەن باستاپ «اسىل ميراس» كابينەتى جۇمىس ىستەي باستادى. وندا حالىقارالىق سەرتيفيكاتقا يە جانە زامانۋي ادىستەمەلەردى مەڭگەرگەن ماماندار جۇمىس ىستەيدى. قىركۇيەك ايىندا زياتكەرلىك قابىلەتى تومەن 100 بالاعا ارنالعان №3 ارنايى مەكتەپ اشۋدى جوسپارلاپ وتىرمىز. كۇزدە كورۋ قابىلەتى ناشار بالالارعا ارنالعان بالاباقشا اشامىز, – دەدى ا.كولگىنوۆ.
جاڭا وقۋ جىلىندا ەلوردا مەكتەپتەرىندە قوسىمشا ءبىلىم بەرۋدىڭ 8 فيليالى جانە تاعى 2 قوعامدىق ورتالىق اشىلادى. جاڭا مەكتەپتەردىڭ ءبىرىنشى قاباتىندا بالالارعا ارنالعان شاعىن ورتالىقتار, وڭالتۋ ورتالىقتارى, بالاباقشالار, مەديتسينالىق كابينەتتەر سياقتى الەۋمەتتىك نىساندار اشىلادى.
ون جەتى مىڭ بالاعا كومەك بەرىلەدى
نۇر-سۇلتان قالاسىندا جاڭا وقۋ جىلى قارساڭىندا الەۋمەتتىك جاعىنان از قامتىلعان وتباسى بالالارىنا مەكتەپكە قاجەت قۇرال-جابدىق الۋ ءۇشىن 40 مىڭ تەڭگەدەن بولىنەدى. جالپى, قالا بويىنشا 17 مىڭ بالاعا كومەك كورسەتىلىپ, 7 مىڭ بالا «مەكتەپكە جول» شاراسىمەن قامتىلادى.
– وتكەن جىلى مەكتەپ قۇرالدارىن ساتىپ الۋعا بولىنگەن قارجى ءار بالاعا 30 مىڭ تەڭگە بولدى. بيىل ول 40 مىڭ تەڭگەگە دەيىن ارتتى. ەگەر وتباسىندا 3-4 بالادان بولسا, وندا ءار بالاعا 40 مىڭ تەڭگەدەن بولىنەدى. بۇل ماقساتقا بيۋدجەتتەن 680 ملن تەڭگە ءبولىندى. بۇل وتكەن جىلمەن سالىستىرعاندا ەكى ەسە كوپ, – دەدى قالا باسشىسى.
سانيتارلىق تالاپتى قاتاڭ ساقتاۋ قاجەت
التاي كولگىنوۆ مەكتەپتەر مەن كوللەدجدەردىڭ ديرەكتورلارىنا جاڭا وقۋ جىلىنا سانيتارلىق-ەپيدەميولوگيالىق تالاپتارعا ساي دايىندالۋدى تاپسىردى. اتاپ ايتقاندا, وقۋ ورىندارى باسشىلارى سانيتايزەرلەر ورناتىپ, قاشىقتىقتى ساقتاۋ تۋرالى بەلگىلەردى ورناتۋ شارت. «كەزەكشى سىنىپتاردىڭ» وقۋشىلارى پارتالارعا شاحمات تارتىبىمەن وتىرۋى كەرەك.
– جاڭا وقۋ جىلىنا ساپالى دايىندىقتى قامتاماسىز ەتۋ ماڭىزدى. قاشىقتان جۇمىس رەجيمىنە كوشۋ ستۋدەنتتەردىڭ العان ءبىلىمىنىڭ ساپاسىنا اسەر ەتپەۋى كەرەك. 1-4-سىنىپ وقۋشىلارى «كەزەكشى سىنىپتاردا» وقي الادى. سانيتارلىق تالاپتاردىڭ قاتاڭ ساقتالۋىن قامتاماسىز ەتۋ قاجەت, – دەدى ا.كولگىنوۆ.
