قر پرەمەر-ءمينيسترى اسقار مامين نۇر-سۇلتان قالاسىن دامىتۋدىڭ كەشەندى جوسپارىن ىسكە اسىرۋ بارىسىن باقىلاۋ جونىندەگى مەملەكەتتىك كوميسسيا وتىرىسىن وتكىزدى.
ەلباسىنىڭ تاپسىرماسى بويىنشا ەلوردانى دامىتۋدىڭ وزەكتى ماسەلەلەرىن شەشۋ, ونىڭ ىشىندە ءبىلىم بەرۋ, دەنساۋلىق ساقتاۋ نىساندارىن سالۋ جانە كولىك ينفراقۇرىلىمىن دامىتۋ بويىنشا نۇر-سۇلتان قالاسىن دامىتۋدىڭ بەس جىلدىق كەشەندى جوسپارى دايىندالىپ, بەكىتىلگەن بولاتىن. جيىن بارىسىندا سول جوسپاردى ىسكە اسىرۋ, گازبەن جابدىقتاۋ, قالا ماڭىن دامىتۋ جانە ۇلەستىك قۇرىلىس ماسەلەلەرى تالقىلاندى.
«ەلوردادا تۇرعىن ۇيگە سۇرانىس جوعارى كەزدە تۇرعىن ءۇي قۇرىلىسىنىڭ قارقىنى تومەندەمەۋى ءتيىس» دەگەن اسقار مامين التى ايدىڭ قورىتىندىسى بويىنشا قۇرىلىس قارقىنى 20 پايىزعا ازايعانىن مالىمدەدى. جالپى, جارتى جىلدىڭ قورىتىندىسىنا سايكەس, نەگىزگى كورسەتكىشتەر بويىنشا ارتتا قالۋشىلىق بايقالۋدا: اتاپ ايتساق, نەگىزگى كاپيتالعا ينۆەستيتسيالار – 20 پايىزعا, تۇرعىن ءۇيدى پايدالانۋعا بەرۋ 33 پايىزعا كەمىگەن.
بۇدان سوڭ پرەمەر-مينيستر نۇر-سۇلتان قالاسىنىڭ توڭىرەگىن دامىتۋ ماسەلەسىنە توقتالدى. ەلوردا اكىمدىگى بيىل 9 جوبانى ىسكە اسىرۋدى جوسپارلاعان, سونىڭ ىشىندە الەۋمەتتىك, مادەني ماڭىزداعى نىسانداردى, گازداندىرۋ نىساندارىن, ينجەنەرلىك جەلىلەر سالۋ ماسەلەلەرى بار. بۇل تۇستا ۇكىمەت باسشىسى اتالعان جۇمىستاردى اتقارۋ ءۇشىن ءۇش جىلدىق كەزەڭگە 22,5 ملرد تەڭگە قاراستىرىلعانىن, وسى قاراجاتتى قالا توڭىرەگىندە ءومىر سۇرەتىن ازاماتتاردىڭ تۇرمىس ساپاسىن ارتتىرۋعا جۇمساۋ قاجەتتىگىن باسا ايتتى.
بۇدان سوڭ ول ەلوردا اكىمدىگىنە مۇددەلى مەملەكەتتىك ورگاندارمەن بىرلەسىپ, كەشەندى جوسپاردىڭ ءىس-شارالارىن ۋاقىتىلى ءارى ساپالى ىسكە اسىرۋدى, ەلوردا توڭىرەگىندە نىساندار سالۋدىڭ جسق ازىرلەۋ بويىنشا قاجەتتى شارالاردى قابىلداۋدى, ۇلەستىك قۇرىلىستاعى پروبلەمالىق نىسانداردىڭ قۇرىلىسىن اياقتاۋدى جەدەلدەتۋدى تاپسىردى.
