كەڭەس وكىمەتى ىدىراعاننان كەيىن, ءبىراز جۇمىستار توقىراپ, اتقارىلعان كوپ ءىستىڭ قۇردىمعا كەتكەنى بەلگىلى. سوعىس جانە ەڭبەك ارداگەرلەرى مەن زەينەتكەرلەردىڭ جايى ۇمىتىلعان كەز بولاتىن. جەر-جەردە قارت ادامدار ءوز ويلارىن ايتىپ, ارداگەرلەردىڭ باستاۋىش ۇيىمدارىن قۇرۋدى قولعا الدى. ءسويتىپ, وسى باستاۋىش ۇيىمداردى بەكىتەتىن اۋدانارالىق ارداگەرلەر كەڭەسى قاجەت بولدى. وسى كەڭەس جانىنا بەلسەندى زەينەتكەرلەر جينالا باستادى. سونىڭ ءبىرى – اتاقتى ساۋىنشى, قازاق سسر جوعارعى كەڭەسىنىڭ دەپۋتاتى بولعان, سوتسياليستىك ەڭبەك ەرى ساعيلا ەسەنجولوۆا.
ساعيلا ابدىراحمانقىزى ون ءۇش جاسىنان ەڭبەككە ارالاسىپ, اناسىنىڭ جانىندا ءجۇرىپ ساۋىنشى بولىپ ىستەيدى. العاشىندا قاراماعىنا 15 سيىر الىپ, ول جۇمىستى وتە جاۋاپكەرشىلىكپەن اتقارادى.
1977 جىلى سىرتتاي زووۆەتەرينارلىق تەحنيكۋمىن ءبىتىرىپ, ءسۇت فەرماسىندا بريگادير بولادى. ەڭبەگى ەش كەتپەي, وتانىمىزدىڭ ەڭ جوعارى ناگرادالارىن يەلەنەدى. ەكى رەت «لەنين», «ەڭبەك قىزىل تۋ» وردەندەرىمەن ماراپاتتالىپ, سوتسياليستىك ەڭبەك ەرى اتانادى. «ەڭبەكتەگى ەرلىگى ءۇشىن», «ەڭبەك ارداگەرى» مەدالىن كەۋدەسىنە تاققان ونىڭ قازاق سسر اۋىل شارۋاشىلىعىنىڭ ەڭبەك سىڭگەن قىزمەتكەرى دەگەن اتاعى دا بار.
قۇرمەتتى دەمالىسقا شىققان سوڭ ول ۇيدە بوس قاراپ وتىرا المادى. ءوزى تۋىپ-وسكەن اقمولا وبلىسى تسەلينوگراد اۋدانىنىڭ بۇرىنعى كيروۆ, قازىرگى كوكتال كەنتىندەگى قوعامدىق جۇمىستارعا ارالاسىپ, تۇرمىسى تومەندەرگە, ءوزى قۇرعان باستاۋىش ارداگەرلەردىڭ ۇيىمىنا قولدان كەلگەن كومەگىن ايامادى.
ساعيلا ەسەنجولوۆا بۇگىندە رەسپۋبليكالىق ارداگەرلەر كەڭەسى پرەزيديۋمىنىڭ, استانا قالالىق ارداگەرلەر كەڭەسىنىڭ, سارىارقا اۋداندىق ارداگەرلەر كەڭەسى پلەنۋمىنىڭ مۇشەسى. ول ۋاقىتىنىڭ ازدىعىنا قاراماستان, مىنە, تۋرا 10 جىل بولدى كوكتال-1 كەنتىندە ارداگەرلەردىڭ باستاۋىش ۇيىمىن باسقارىپ كەلەدى. ونىڭ جۇمىسىنا ارداگەرلەر ۇيىمىنىڭ بەلسەندى مۇشەلەرى رىستى وسپانوۆا مەن ليۋدميلا نازارەنكولار دا كومەكتەسۋدە.
ساعيلا ابدىراحمانقىزى قوعامدىق جۇمىستارمەن بىرگە نەمەرەلەرى مەن شوبەرەلەرىنىڭ تاربيەسىمەن اينالىسىپ, ءۇي شارۋاسىنداعى تىرلىكتەن دە قول ۇزگەن ەمەس.
بەتتى دايىنداعان: عاليا بالتاباي,
زەينەتكەر-جۋرناليست
