ەلباسى يندۋستريالىق فورۋمدا «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلاماسىن جاريا ەتكەن بولاتىن. ءوز سوزىندە مەملەكەت باسشىسى حالىقتى جۇمىسپەن قامتۋ ماسەلەسىنە ەرەكشە ءمان بەردى.
«ەڭبەك ەتسەڭ ەرىنبەي, تويادى قارنىڭ تىلەنبەي». راسىندا دا, ەرىنبەي ەڭبەك ەتكەننىڭ كوپ بەلەستى باعىندىرارى بەلگىلى. «ەڭبەك ەتسەڭ – ەمەرسىڭ» دەگەن دە بار. ەجەلدەن ەڭبەك ەتكەن, قول قۋسىرىپ قاراپ وتىرۋدى بىلمەيتىن ەلدىڭ بالاسى مۇنىڭ ءبارىن جاقسى بىلسە كەرەك. وسىعان وراي, ەلباسى ەل يگىلىگى جولىندا ەرىنبەي ەڭبەك ەتۋ كەرەكتىگىن باسا ايتتى. بۇل ماقساتتا ەلىمىزدە قولدان كەلگەننىڭ ءبارى جاسالىپ جاتىر.
مەملەكەت باسشىسىنىڭ بيىلعى جولداۋىن ورىنداۋ ءۇشىن حالىقتى جۇمىسپەن قامتاماسىز ەتۋ ماقساتىندا «جۇمىسپەن قامتۋ-2020» باعدارلاماسى دايىندالدى. ۇستىمىزدەگى جىلى استانا قالاسى «جۇمىسپەن قامتۋ-2020» باعدارلاماسىنىڭ ءبىرىنشى باعىتى «ءوز بەتىنشە جۇمىسپەن اينالىسۋشىلاردى, جۇمىسسىزداردى جانە تابىسى از ادامداردى وقىتۋ جانە ولاردىڭ جۇمىسقا ورنالاسۋىنا جاردەمدەسۋ» ىسكە اسىرىلدى. وسى باعىت اياسىندا كاسىبى, ناقتىراق ايتساق, ماماندىعى جوق ازاماتتاردى كاسىبي وقىتۋ (مەملەكەتتىك تاپسىرىس), 36 اي وقۋ مەرزىمىمەن 150 ادام وقىتۋ قاراستىرىلىپ, جاڭا كاسىپ (ماماندىق) الۋ ماقساتىندا قايتا دايارلاۋ بويىنشا 163 ادامدى 3 ايلىق وقىتۋ مەن كاسىبي شەبەرلىگىن شىڭداۋ جانە جوعارى دارەجەنى الۋ ماقساتىندا 1 اي وقۋ مەرزىمىمەن باعدارلامانىڭ 170 قاتىسۋشىسىنىڭ بىلىكتىلىگىن جوعارىلاتۋ, كاسىبي وقىتۋ جوسپارلانعان بولاتىن.
بيىلعى جىلدىڭ باسىنان اتالمىش باعدارلاما بويىنشا ءبىزدىڭ مەكەمەگە ءوتىنىش بەرگەن ادام سانى – 701, ءبىرىنشى باعىتقا قاتىسۋ ءۇشىن 646 ءوتىنىش قابىلدانعان, سونىڭ ىشىندە 559 قاتىسۋشىمەن الەۋمەتتىك كەلىسىم-شارت جاسالدى.
قازىرگى ۋاقىتتا 371 قاتىسۋشى وقۋلارىن اياقتادى, سونىڭ ىشىندە 16 ادام, تۇراقتى جۇمىس ورىندارىنا – 13, جاستار تاجىريبەسىنە – 3 كىسى جۇمىسپەن قامتىلدى.
بيىلعى جىلى جاستار تاجىريبەسىن ۇيىمداستىرىپ, 157 ادام جۇمىسقا ورنالاستىرىلدى. جىل باسىنان بەرى جاستار تاجىريبەسىن وتۋگە 181 ادام جولداندى. جوسپارلانعان 271 الەۋمەتتىك جۇمىس ورىندارىنا 147 ادام جۇمىسقا ورنالاستى.
ورتالىقتىڭ باستى باعىتتارىنىڭ ءبىرى – «جۇمىسپەن قامتۋ-2020» باعدارلاماسىنىڭ قاتىسۋشىلارىن جۇمىسقا ورنالاستىرۋ. بۇل رەتتە بيىلعى جىلدىڭ 13 شىلدەسىنە دەيىنگى جاعداي بويىنشا وقۋلارىن بىتىرگەن قاتىسۋشىنىڭ 954-ءى, سونىڭ ىشىندە تۇراقتى جۇمىس ورىندارىنا – 936 ادام جۇمىسقا ورنالاستى.
وقۋ ورىندارىنىڭ ونىمدەرىن تۇتىنۋشى بولىپ تابىلاتىن, جۇمىس بەرۋشىلەرمەن تىكەلەي بايلانىس, جۇمىسقا ورنالاستىرۋدا اعىمدى ناتيجە بەرە الادى. باعدارلامانىڭ قاتىسۋشىلارىن بۇدان ءارى جۇمىسقا ورنالاستىرۋ ماقساتىندا استانامىزدىڭ جۇمىس بەرۋشىلەرىمەن 306 نيەت حاتتاماسى جاسالدى.
ەلباسىشا ايتساق, «بولاشاقتا ءححى عاسىردا تەك ەڭبەك قانا بارلىق قازاقستاندىقتاردىڭ ءال-اۋقاتقا جانە جاڭا ءومىر ساپاسىنا قول جەتكىزۋىن قامتاماسىز ەتە الادى». بۇل رەتتە ءبىز الەۋمەتتىك جاڭعىرتۋ ساياساتىنا قولداۋ كورسەتىپ, ونى جۇزەگە اسىرۋعا بارىنشا تىكەلەي جانە مۇددەلى تۇردە اتسالىساتىن بولامىز. ويتكەنى, ەڭبەكپەن عانا جەمىس ونبەك, تەك ەڭبەك قانا بار قيىندىقتى جەڭبەك.
امانجول ءابدىراحمانوۆ,
استانا قالاسى اكىمدىگى جۇمىسپەن قامتۋ ورتالىعىنىڭ ديرەكتورى
