بيىل – استانا قالاسى ءماسليحاتىنىڭ قۇرىلعانىنا 30 جىل. ەلوردانىڭ عانا ەمەس, ەلىمىزدىڭ بارلىق ءماسليحاتىنا ۇلگى بولىپ وتىرعان استانا قالالىق ءماسليحات دەپۋتاتتارى ءوز مىندەتىن قالانى دامىتۋدىڭ جوسپارلارىن, ەكونوميكالىق جانە الەۋمەتتىك باعدارلامالارىن بەكىتۋ ارقىلى ورىنداپ ءجۇر. ەلگە قىزمەتتى ابىرويمەن اتقارعان حالىق قالاۋلىلارى از ەمەس. سونىڭ ءبىرى – ءماسليحاتتىڭ 1999-2004, 2016-2021 جىلداردا استانا قالاسى ءماسليحاتىنىڭ II, VI شاقىرىلىمىنىڭ دەپۋتاتى بولعان بىلىكتى پەداگوگ, №17 مەكتەپ-گيمنازيا ديرەكتورى, پەداگوگيكا عىلىمدارىنىڭ ماگيسترى, قالالىق قوعامدىق كەڭەس مۇشەسى رامزيا ومىرباەۆا.
ەلگە قىزمەت – ابىرويلى مىندەت
رامزيا فااتقىزى – ەل استاناسى وڭتۇستىكتەن سارىارقا تورىنە قونىستانعان كەزدە ەلوردانىڭ ءبىلىم سالاسىن كوتەرۋگە اتسالىسقان العاشقىلاردىڭ ءبىرى. مەكتەپ ديرەكتورى, ءبىلىم بەرۋ سالاسىنىڭ ۇزدىگى, قۇرمەتتى قىزمەتكەرى رامزيا ومىرباەۆانىڭ ومىرلىك ۇستانىمى بەرىك, ماقساتى ايقىن. ول ەلوردالىق مەكتەپتە زاماناۋي ءبىلىم بەرۋدى قولداپ, وندا بالانىڭ ءوزى ءبىلىم الۋعا ۇمتىلىپ, ءوزىن-ءوزى دامىتۋعا, ءارتۇرلى سالادا ءوز كۇشىن سىناپ كورۋگە قىزىعۋشىلىق تانىتۋى ءۇشىن جاعداي جاساۋ جولىندا قىرۋار جۇمىس اتقارعان جان. 30 جىلدان استام مەكتەپ ديرەكتورى قىزمەتىن اتقارعان ول وقۋ ورداسى قۇرىلۋىنىڭ قيىن دا كۇردەلى كەزەڭىندە, ۇجىمنىڭ قالىپتاسۋى شاعىندا, جەڭىستى دە قۋانىشتى ساتىندە باسى-قاسىندا بولدى. وسىنشاما جۇكتى ابىرويمەن اتقارعان ول – الىستى بولجاي بىلەتىن كورەگەن, وبەكتيۆتى پىكىرىن اشىق ايتاتىن, ءادىل, ىسكەر باسشى, زاماناۋي پەداگوگيكانى مەڭگەرگەن ءموبيلدى پەداگوگ رەتىندە تانىمال تۇلعا.
رامزيا فااتقىزىنىڭ ىسكەرلىك قابىلەتى ونىڭ كاسىبي قىزمەتىندە قالىپتاستى. ول 1999-2004, 2016-2021 جىلداردا استانا قالاسى ءماسليحاتىنىڭ II, VI شاقىرىلىمىنىڭ دەپۋتاتى بولدى. ءىى شاقىرىلىمداعى ءماسليحات ءبىر ەرەكشە كەزەڭ – ەلوردانىڭ كوشىپ كەلىپ جاتقان جاۋاپتى كەزەڭى ەدى دەپ ەسكە الادى رامزيا ومىرباەۆا.
– دەپۋتاتتىق قىزمەت – بۇل كوپ ويلانۋدى كەرەك ەتەتىن ۇلكەن جۇمىس, مەرەيلى مىندەت. ناتيجەسى جالپى قالاعا عانا ەمەس, ادامداردىڭ ومىرىنە دە اسەر ەتەتىن جاۋاپتى جۇمىس. حالىق قالاۋلىلارى قيىن ومىرلىك جاعدايعا تاپ بولعان ازاماتتاردى, ارداگەرلەردى, مۇگەدەكتەردى, تولىق ەمەس جانە كوپبالالى وتباسىلاردى, جەتىم بالالاردى قورعايتىن اتاۋلى الەۋمەتتىك قولداۋدى قامتاماسىز ەتۋگە مىندەتتەيدى, – دەيدى ول بىزبەن كەزدەسكەن كەزىندە.
دەپۋتات رەتىندە رامزيا فااتقىزى ازاماتتاردى قابىلداپ, ۇيىمداردارداعى پروبلەمالىق ماسەلەلەردى شەشۋگە كومەكتەستى, سايلاۋشىلارمەن, ەڭبەك ۇجىمدارىمەن, اۋماقتىق ءوزىن-ءوزى باسقارۋ وكىلدەرىمەن ءجيى كەزدەستى, بىرلەسكەن اكتسيالارعا, جەرگىلىكتى جەرلەردەگى قيىن ومىرلىك جاعدايلاردى قاراۋعا قاتىستى.
رامزيا فااتقىزى سايلاۋشىلاردىڭ ءوتىنىش-تىلەكتەرىن ورىنداي وتىرىپ, ادامداردى قالا ءومىرىن جاقسارتۋعا قاتىسۋعا, ءوزىن-ءوزى باسقارۋدى دامىتۋعا, بيىك ازاماتتىق پوزيتسيا ۇستانۋعا شاقىردى. ەلوردانىڭ وزەكتى ماسەلەلەرىن شەشۋگە ءوز ۇسىنىستارىن جەتكىزىپ ءجۇردى. ءوزىنىڭ قىزمەت ءتۇرى, ءبىلىمى جانە ورتاسى بويىنشا الەۋمەتتىك سالاعا ينتەگراتسيالانعان ول ادامدارمەن جۇمىس ىستەۋگە ارقاشان مۇددەلى بولاتىن. ادامدارعا قيىن ساتتە كومەكتەسۋ, قولتىعىنان دەمەۋ – بۇل رامزيا فااتقىزىنىڭ جاراتىلىسىنان بويىنا بىتكەن قاسيەت.
ايەل – وتباسى مەن وتان ۇيىتقىسى
– ءوز وتباسىن جانە ەلىن قورعاۋعا قابىلەتتى ساياساتكەر – ادامداردىڭ پىكىرلەرىن تىڭداۋ ارقىلى ورتاق ىستەرگە ۇمتىلاتىن تۇلعا. ەلدەگى بەيبىتشىلىك پەن ۇلتتىڭ دەنساۋلىعىن ويلاعان دەپۋتات مادەنيەتتى كوتەرۋ مەن قاۋىپسىزدىكپەن قامتاماسىز ەتۋ جولىندا بالالار مەن كومەككە ءزارۋ قارتتاردى ۇمىتپايدى, بۇل ماقساتتا جاڭا, تىڭ قادام جاسايدى جانە قازىردىڭ وزىندە جاسالعاندى قورعايدى, سونىمەن بىرگە ساياساتكەر ايەل ءومىردى جالعايدى, ءوسىپ-ءونۋدى وركەندەتە تۇسەدى. ويتكەنى بۇل باسقانىڭ ەمەس, ءبىر قولىمەن بەسىكتى, ءبىر قولىمەن الەمدى تەربەگەن ايەل-ساياساتكەردىڭ عانا قولىنان كەلۋى مۇمكىن, – دەپ اقتارىلدى رامزيا فااتقىزى.
وتان الدىنداعى قالتقىسىز قىزمەتى ءۇشىن, ءبىلىم مەن عىلىمعا سىڭىرگەن ەڭبەگى ءۇشىن ر.ومىرباەۆا العىس حاتتارمەن, مەدالدارمەن, «قۇرمەت» وردەنىمەن ماراپاتتالعان. فرانتسۋز رەسپۋبليكاسى ۇلتتىق ءبىلىم ءمينيسترىنىڭ ۇسىنىسى بويىنشا جانە 2022 جىلعى 12 شىلدەدەگى قاۋلىسىمەن ر.ومىرباەۆا قازاقستاندا فرانتسۋز ءتىلىن وقىتۋدى قولداۋ مەن دامىتۋعا سىڭىرگەن ەڭبەگى ءۇشىن, سونداي-اق فرانكو-قازاقستاندىق ءبىلىم بەرۋ ىنتىماقتاستىعىن نىعايتۋعا قوسقان ۇلەسى ءۇشىن اكادەميالىق پالمالار وردەنىنىڭ كاۆالەرى اتاعىنا يە بولدى. اكادەميالىق پالما وردەنى 1808 جىلى يمپەراتور ناپولەون I قۇرعان فرانتسياداعى ەڭ كونە ازاماتتىق سىيلىق ەكەنىن ەسكەرسەك, رامزيا فااتقىزى ەڭبەگىنىڭ ەلەۋلى ەكەنىن اڭعارۋعا بولادى.
بىلىكتى پەداگوگ, ىسكەر باسشى, بەلسەندى دەپۋتات, حالىق قالاۋلىسى رامزيا فااتقىزى قوعامداعى, الەۋمەتتىك سالاداعى وڭ وزگەرىستەرمەن بىرگە ادامدار دا جاقسى جاعىنا قاراي وزگەرەتىنىنە قۋانادى.
– قوعامداعى جاقسى وزگەرىستەر, يگى امالداردىڭ اسەرى مول. وسى ارقىلى ازاماتتاردىڭ وزىنە دەگەن سەنىمى ۇلعايىپ, بولاشاققا ۇمتىلىسى كۇشەيە تۇسەدى. سوندىقتان دا ءومىرىم بوسقا وتكەن جوق, دەپۋتات, مەكتەپ باسشىسى, ادام رەتىندە تالاي ابىرويلى ءىستى اتقاردىم, ءالى دە عۇمىرىم جەتكەنشە وسى باعىتتاعى يگى جۇمىستارىمدى جالعاستىرا بەرەمىن, – دەيدى رامزيا ومىرباەۆا.
ول ادامدارعا قول سوزىپ, ومىرىنە ايرىقشا اسەر ەتكەن جىلدارىن وسىلايشا ەسكە الادى. شىن مانىندە كومەكتەسە العانىن وسىلاي ماقتانىشپەن جەتكىزەدى, ويتكەنى حالىقتىڭ سەنىمىنەن شىعۋ – ابىرويلى مىندەت.
رامزيا فااتقىزى الداعى ۋاقىتتا دا ساياسي بايگەدە ەلىنىڭ ەرتەڭىن, بالالارىمىزدىڭ بولاشاعىن ويلايتىن ناعىز حالىق قالاۋلىلارىنىڭ ءباسى باسىم بولارىنا سەنىمى مول. دودادا ىرىكتەلگەن ازاماتتار ءماسليحات مىنبەرىنە ساي مەملەكەتشىل, ادىلەتتى قازاقستاننىڭ ناعىز پاتريوتتارى بولادى دەگەن ۇكىلى ءۇمىتى بار. ال حالىقتىڭ قولداۋىنا يە بولعان پرەزيدەنتتىڭ تاعدىرشەشتى قادامدارىن جۇزەگە اسىرۋعا ايانباي اتسالىسۋ – بارشامىزدىڭ مىندەتىمىز.
