ەرىكتى ورەندەردىڭ ەكپىنى ەرەك
ەلوردانىڭ جالپى ءبىلىم بەرەتىن 63 مەكتەبىندە «پوليتسيانىڭ جاس دوسى» اتتى جاساق بار. بۇعان ءوز ەرىكتىلەرمەن قوسىلعان ۇلانداردىڭ قاتارى بۇگىندە 467-گە جەتىپتى.
پوليتسيانىڭ ءجاسوسپىرىم دوستارى ءىىد جەرگىلىكتى پوليتسيا قىزمەتى يۋۆەنالدىق پوليتسيا ءبولىمىنىڭ قۇقىق قورعاۋشىلارىمەن بىرگە جۇمىس ىستەپ, كوپتەگەن رەيدتىك شارالارعا قاتىسىپ ءجۇر. ورەندەرگە مەكتەپ ماڭايىنداعى ءتارتىپتى ساقتاۋ, قۇقىق بۇزۋشىلىقتىڭ جولىن كەسۋ جونىندە 80-نەن استام ءدارىس وقىلعان ەكەن.
–بالالار – ەلىمىزدىڭ ەرتەڭى. ولاردىڭ بويىنا قازىردەن باستاپ, ءتارتىپتى بولۋدىڭ الىپپەسىن, قانداي بۇزاقىلىققا دا توزبەۋ قاعيداسىن سىڭىرسەك, ەرتەڭگى كۇنى ولار قوعامداعى تارتىپسىزدىككە بەيجاي قاراي المايتىن ازاماتتار بولىپ قالىپتاساتىنى انىق, – دەيدى يۋۆەنالدى پوليتسيا قىزمەتكەرلەرى.
جاساق قۇرامىنداعى جاستاردىڭ دەنساۋلىعىن نىعايتۋ ماقساتىندا سپورتتىق شارالار دا وتكىزىلىپ تۇرادى. سالاۋاتتى ءومىر سالتىن ناسيحاتتاۋعا باعىتتالعان شارالارعا 800-گە جۋىق ءوسپىرىم قاتىسقان. ءوز قۇربىلاستارىنان وزىق شىققان جەتكىنشەكتەر ارنايى ماراپاتتالىپ, ولارعا قۇندى سىيلىقتار تارتۋ ەتىلگەن.
«پوليتسيانىڭ جاس دوسى» جاساعى 7 دوڭگەلەك ۇستەل جيىنىن ۇيىمداستىرىپ, وعان استانا قالاسى ءىىد جەرگىلىكتى پوليتسيا قىزمەتى يۋۆەنالدى پوليتسيا ءبولىمىنىڭ باسشىسى, سالاۋاتتى ءومىر سالتىن قالىپتاستىرۋ ورتالىعىنىڭ وكىلدەرى مەن دارىگەر-ناركولوگ, ۋچاسكەلىك ينسپەكتورلار قاتىسىپ, وي-پىكىرلەرىن ورتاعا سالعان.
قىمبات توقتامۇرات