ەندى استانالىق كولىك ءجۇرگىزۋشىلەر جول قوزعالىس ەرەجەسىن بۇزعانىنا بايلانىستى سالىنعان ايىپپۇلداردى جىلجىمالى POS-تەرمينالى ارقىلى دا تولەي الادى. بۇل جۇيەنىڭ ارتىقشىلىعى سول, ايىپپۇل كولەمىنە 50 پايىز جەڭىلدىك جاسالادى.
بيىلعى ءساۋىر ايىنىڭ اياعىنان باستاپ, پيلوتتىق جوبانى ىسكە اسىرۋ شەڭبەرىندە جەرگىلىكتى پوليتسيا قىزمەتىنىڭ جول-پاترۋلدىك پوليتسيا ءبولىنىسى مەن اكىمشىلىك پوليتسيا قىزمەتكەرلەرى تەرمينالدارمەن جۇمىس ىستەۋ جونىندە وقۋ كۋرستارىنان ءوتتى. ەندى مامىر ايىنان بەرى POS-تەرمينالدار ارقىلى قولما-قول اقشاسىز ايىپپۇلداردى تولەۋگە بولاتىنىن ەستەرىڭىزگە سالامىز.
استانا قالاسى ءىىد اكىمشىلىك پوليتسيا باسقارماسى اۆتوماتيزاتسيا جانە ەلەكتروندى قىزمەت كورسەتۋ ءبولىمى باستىعىنىڭ ايتۋىنشا, اتالعان پيلوتتىق جوبا تەك استانادا عانا جۇزەگە اسىرىلۋدا. بۇل امالدار اكىمشىلىك ايىپپۇلداردىڭ تاركىلەۋىن ارتتىرۋعا, جۇرگىزۋشىلەردىڭ ۋاقىتىن ۇنەمدەۋىنە جانە دە باسقا دا ىڭعايلى جاعدايلاردى جاساۋعا مۇمكىندىك بەرەدى.
العاشقى جەتى كۇننىڭ ىشىندە سول جەردە ايىپپۇل تولەيتىن جۇرگىزۋشىگە 50% جەڭىلدىك جاسالادى. تەرمينال ارقىلى تولەگەنى ءۇشىن كوميسسيا مولشەرى ايىپپۇل سوماسىنىڭ 1,5 پايىزىن قۇرايدى. ايتالىق, ايىپپۇل مولشەرى 5,250 تەڭگە بولسا, الىناتىن كوميسسيا – 79 تەڭگە دەگەن ءسوز.
POS-تەرمينالدار سىرتتاي سەنسورلى تەلەفوندارعا ۇقسايدى. ولاردى پايدالانۋ وڭاي: حاتتامانىڭ ءنومىرى مەن ايىپپۇل مولشەرىن ەنگىزۋ كەرەك, ال باسىپ شىعارعان كەزدە كوميسسيا مولشەرى كورسەتىلەدى. تەرمينالداردى زاريادتاۋدىڭ قاجەتى جوق, ءار كۇننىڭ اياعىندا قوندىرعىلار اۆتوماتتى تۇردە قانشا چەك شىعارىلعانىن, ەندى قانشا چەكتىك لەنتا قالعانىن ەسەپتەپ شىعارادى.
تولەم تولەۋدىڭ مۇنداي ءتاسىلى جۇرگىزۋشىلەرگە دە ءتيىمدى. ولار بانكتەردە ۇزىق-سونار كەزەككە تۇرمايدى, ۋاقىتىن ۇنەمدەپ, ايىپپۇلدى جىلدام تولەۋگە مۇمكىندىك الادى.
قىمبات توقتامۇرات
