«استانا اقشامى» گازەتى ەلورداداعى الەۋمەتتىك ماڭىزى بار ازىق-تۇلىك تۇرلەرىنە مونيتورينگ جۇرگىزۋدى جالعاستىرۋدا. بۇل جولى زەرتتەۋگە تۇرعىنداردان تاپسىرىس قابىلداپ, ۇيگە دەيىن جەتكىزۋ قىزمەتى قاراستىرىلعان «استىقجان», «مەترو» جانە «ەۆرازيا» سەكىلدى ساۋدا ۇيلەرىن الدىق.
اتالمىش دۇكەندەردە ازىق-تۇلىك تۇرلەرىنە تاڭداۋ جاساۋ ىڭعايلى. ۇيدە وتىرىپ-اق ىزدەۋ جۇيەلەرى ارقىلى قاجەت تاۋاردىڭ ءتۇرىن, باعاسىن سالىستىرا الاسىز, ءتىپتى شىعارۋشى كاسىپورىن تۋرالى دا انىقتاما الۋعا بولادى.
سونىمەن, قالا شەتىندە ورنالاسقان «مەترو» سۋپەرماركەتىندە كوپتەگەن تاۋارلارعا جەڭىلدىك قاراستىرىلعان. ارنايى اكتسيا اياسىندا كەيبىر ازىق-تۇلىك تۇرلەرىن ەكى ەسە ارزان باعاعا الۋعا بولادى.
«استىقجان» دۇكەنىنىڭ ينتەرنەت دۇكەنى جوعارى جىلدامدىقپەن جۇمىس ىستەيدى ەكەن. قالاعان زاتىڭىزدى سەبەتكە سالىپ, باعاسىن ءبىلىپ العاننان كەيىن تاپسىرىس بەرە بەرۋگە بولادى. ال «ەۆرازيا» ساۋدا ءۇيى قالانىڭ ىشىندە بولعاندىقتان, كەيبىر باعالار جوعارى. ءماسەلەن, كارتوپ – 120, پياز – 160, قىزىلشا – 150, قىرىققابات 120 تەڭگەدەن ساتىلۋدا.
– جۇمىستان تىس بوس ۋاقىتىم بولا بەرمەيدى. سوندىقتان «استىقجان» دۇكەنىنە ينتەرنەت ارقىلى تاپسىرىس بەرەمىن. وندا جەمىستىڭ, كوكونىستىڭ تۇرلەرىنە تاڭداۋ مول, باعاسى دا قولجەتىمدى. جەتكىزۋ قۇنى دا كوڭىلىمنەن شىعادى. اسىرەسە, اپتا سايىن باعالاردى باقىلاۋعا مۇمكىندىك كوپ. جەڭىلدىكتەر ماۋسىمىندا تەك ازىق-تۇلىك تۇرلەرىن عانا ەمەس, باسقا دا تاۋارلاردى ارزان ساتىپ الۋعا بولادى, – دەيدى قالا تۇرعىنى گۇلجامال ورازقىزى.
جالپى, استانا قالاسى اكىمدىگى ەلورداداعى بازار سورەلەرىندەگى الەۋمەتتىك ماڭىزى بار ازىق تۇرلەرىنە كۇندەلىكتى تالداۋ جاسايتىنىن ايتقان ەدىك. سوڭعى جۇرگىزگەن زەرتتەۋگە سۇيەنسەك, كەيبىرىنىڭ باعاسى ارزانداعان. مىسالى, پيازدىڭ باعاسى 109 تەڭگەدەن 105-كە, قىزىلشا 132 تەڭگەدەن 130-عا تۇسكەن. مونيتوريگ بويىنشا كۇرىشتىڭ ورتاشا باعاسى – 305, ءبىرىنشى سۇرىپتى بيداي ۇنى – 144, ۇنتاق جارماسى – 200, قاراقۇمىق جارماسى – 360, سۇلى جارماسى – 218, ارپا – 140, تارى – 250, كەسپە – 190, سيىر ەتى – 1348, قوي ەتى – 1400, تاۋىق ەتى – 670, ءسۇت – 195, ايران – 225, سۇزبە – 1400, ىرىمشىك – 1650, جۇمىرتقا – 280, سارى ماي – 1340, كۇنباعىس مايى – 450, قىرىققابات – 110, پياز – 105, قىزىلشا – 130, ءسابىز – 125, كارتوپ – 135, قانت – 305, تۇز – 51 تەڭگە.
گۇلميرا ايماعانبەت
